香港租金高昂，食肆為求客如輪轉，一枱客接一枱客，常有用餐限時等規矩。近期，元朗一間小店貼出告示，以「勞氣」態度警告食客切勿長期霸枱，告示在網上惹來議論，討論老闆過於敏感，還是該區充斥怪客，經常有人長坐不走？東網記者前往該店，揭開告示後的秘密。
小店位於元朗鳳攸南街旁的小巷，店面不大，打開入口玻璃門，就看到貼在玻璃門上的告示：「致：某些食客，因本店地方有限，請某些食客自律，請不要坐二至三個小時，唔係唔畀你坐，但不要太離譜！因為坐二至三個小時真係太誇張，希望你哋自己諗一諗，這行為太自私，我哋只係一間細餐廳想做多些生意請你明白。」除了玻璃門，入口處的牆身亦有另一張同樣的告示。
餐廳正如告示所說，店內面積有限，僅擺放了五、六張枱，只能容納20多名食客。不過，店舖生意頗為旺場，東網中午到訪時，店內擠滿食客。東網向女店員查詢為何張貼「趕客」告示時，她面有難色地表示：「唔係唔畀佢哋坐，但真係太過份。」又指店東正在忙碌，未能回應。
午市過後，成功找到老闆親身回應事件，雖然老闆不願上鏡，但就願意道明貼告示的因由。「其實只係寫畀兩個人睇，如果個個都坐咁耐，我都唔使做」店主表示半年來有兩名女顧客經常來食早餐，各光顧一份30港元的早餐，但每一次一坐就長達3小時。他嘆氣指，並非要兩人食完後立即離去，但佔據的時間太長，更是早上8時至11時，餐廳營業的黃金時間。他估計：「如果冇佢地霸住，張枱可以做7至8轉生意，我都要交租嫁！」
女店員補充兩人是家庭主婦，每日帶小朋友上學後，便來到餐廳食早餐兼「打牙骹」，直至接小孩放學的時間才會離去。兩名女顧客「打躉」長達半年，店主忍無可忍，但當面斥責甚感尷尬，於是張貼告示，希望兩人看到後「識做」，不再長期霸佔座位。
告示張貼至今一星期，店主的策略暫時成功，因張貼告示後，兩人未有再光顧。店主懷疑有人看到告示後轉告兩人，令她們不敢再來餐廳。
|
鍾意就快D Share啦！
|
|
|
