除了無綫小花孫慧雪、G Cup女星崔碧珈及一眾𡃁模參與寫真戰，今年亦有一位宅男至愛女神推出寫真，大家準備接招！
擁有碩士學歷、有自己品牌生意、樣靚又身材好的時裝設計師Lilian Kan（簡幗儀）將於書展推出第二本個人寫真，絕對是Fans大喜訊！其實Lilian在Instagram擁近10萬Fans，在網上被喻為超級女神，人氣不下於雪雪！
玩百變造型
書內全部造型都由Lilian包辦設計及服飾搭配，但有別於去年較統一風格，今次她大玩百變造型，書名叫《This is Lilian, Too》，就是想表現Lilian同樣能駕馭不同造型，她說：「我畀人感覺一直係公主、Sweet、可愛，今年想紀錄多啲變化，分享對唔同事物嘅睇法，亦想探索吓性感，試吓性感可唔可以擺喺我身上，原來都OK。」
唔接受行泳衣騷
咩話？Lilian行性感？相信大批Fans立即開心到彈起！Lilian遠赴歐洲取景，寫真內有不少唯美又性感的造型，包括晚裝、泳衣同浸花瓣浴，更有勁似學生運動衫的短褲仔Look。而最性感一定是復古黑色開胸泳衣，胸前Cutting超低，酥胸半露的Lilian大騷三吋事業線，平日純純兔的她難得大解放，勢令Fans鼻血直流！
要性感唔要挑逗
問到拍攝泳衣照有否尷尬？她說：「呢輯相喺比利時影，只得15度，好凍！只係想快啲影完，同埋攝影師係我識咗好多年嘅女性朋友，大家好有默契，好清楚要表達啲咩。（今次係破格性感？）都係，想性感得嚟優雅，唔係挑逗，今年我接受多咗性感，但呢樣只係女性其中一面，唔係唯一賣點，如果只係得性感，係好可惜，女仔畀人欣賞地方仲有好多！（下年再性感啲？）唔會呀！下次做第二啲嘢，其實我都幾怕醜，未接受到行泳衣騷，因為好多嘢控制唔到。」
有冇錢都尊重自己份工
寫真集內亦有散文部分，Lilian以四季做主題比喻人生高低，望為讀者帶來正能量：「以我為例，我身份既係設計師又係模特兒，有啲人可能覺得好矛盾，但只要相信自己，好多嘢都可以解決，好多人唔夠勇氣追夢或好易放棄，事實上我呢一年都去到谷底，但我仍然堅持撐起間公司，就算有冇錢都咁尊重自己工作，唔會賺到錢就放鬆，或者冇咩錢就覺得自己冇用。」
曾短時間蒸發逾四十萬
Lilian表示去年中突然被業主要求收回辦公室，她要在三星期內找新地方、裝修及繼續處理訂單，結果要捱貴租租新舖，在短時間內蒸發了逾四十萬港元，但事件令她愈來愈堅強，EQ再增強不少：「每一次我以為事業順利少少，就會再有新風浪，但我睇長遠，如果只係做model、做個網絡紅人，係冇咩成本，可能賺錢仲快，但我視設計師係我終身職業，所以要堅持，嗰陣時我好大壓力，我冇家底，要靠自己捱過去，但依家諗番，呢段經歷令我做人處事更成熟。」
夠堅毅努力
表面上看似一切順風順水，Lilian更有天使美貌，因而獲封「人生勝利組」，Lilian對此卻有話要說：「好多人覺得係，但我好少訴苦，解決晒問題我先會講，我承認我係有幸運嘅地方，但我唔止有天生條件，好多事我都要努力爭取，我有畀心機讀書，我唔係IQ高，但我夠堅毅、努力，不過我又好難畀人知我有幾努力，唔通成日講我開工做到半夜三點？呢種抱怨冇咩用，我認為好多事唔係天生就有，要努力先得到。」
|
鍾意就快D Share啦！
|
|
|
