近日有家長在電視機前講了一句「贏在射精前」，揭示了「怪獸家長」為了保護子女到荒謬地步。其實除了幾個月大的小朋友，就算是剛出來社會的廿歲年青人，仍然活在「怪獸家長」的陰影下。今次請來3位專做本土生意的中小企創辦人，大談現今社會工作的光怪陸離現象。過去數年香港勞動市場的流失率高企，尤其是年青人經常被標籤「唔捱得」及「冇交帶」，經營生蠔海鮮的Ocean three創辦人何智聰（Hamish）就表示旗下員工都是23至25歲的後生仔，都是肯博肯捱的「90後」，但亦有人受家長影響而選擇辭職：「我問同事點解要辭職，佢話離職原因係因為阿爸阿媽覺得呢份工好辛苦，叫佢唔好做！」他強調不是「個別事件」，而是經常有後生仔因為父母叫他們不要太辛苦而辭工。他這些員工一般都冇甚主見，聽從父母指示，即使家境並不富裕，亦甘願冒失業風險而劈炮：「有啲同事可能住公屋，屋企環境唔算太好，爸爸做司機，但佢爸爸一句話唔好做，佢就辭職。我問佢去第二度做會唔辛苦咩，佢哋又話唔係喎，好奇怪。」eBanner創辦人陳剛雄（Chris）亦指出好多怪獸家長的奇怪做法，正影響年青人成長：「嚟見工嗰時父母一齊嚟，主要interview係個父母，個仔唔出聲嘅。咁我同阿爸阿媽講，你哋嚟做定你個仔嚟做，你個仔冇出過聲喎，不如你問吓你個仔想唔想做先啦，可能你個仔都唔想做呢！」他認為後生仔在父母過份照料下成長，心態及價值觀會也會扭曲：「以前我哋返新工會執正啲，又會早多半個鐘返公司，特別緊張。但而家啲人冇所謂，遲到咪遲到，遲咗10分鐘覺得好應該，甚至佢屋企人都話，喂我個仔遲咗十分鐘之嘛，唔使咁大件事呀？」他指出，當年青人的家人及朋友都覺得無問題時，年青人就會覺得無責任感其實真的不是問題：「例如叫佢星期五做嘅嘢，星期一問佢點解未做完，要人哋追佢，佢就話都係遲兩日啫，唔覺得有問題。」洗樓王創辦人王嘉源遠（Ray）亦指父母過份溺愛，令子女踏出社會更難適應：「例如將廣告掛係牆身度，用索帶，可能一個廿幾歲ｏ靚仔連索帶都唔識穿嘅，或者有時將啲停水通知紙貼係鐵閘度，有時搣膠紙貼上去，但連搣膠紙嗰吓都唔識。我會同佢哋講，你喺我度做唔係做一世，裝備好自己，日後去第二度做或者開公司做老闆都有用。」何智聰認為並非每個年青人都無責任感，大部份都很有創意：「俾個任務佢，佢會幫你開OT去做，就算冇錢都做到夜晚10點，例如玩fb marketing，或者instagram，佢會唔願走嘅，想做好呢件事，資歷深做得比較耐嘅同事，佢會諗開OT，咩水位先？」記者：陳新政掌握財經生活資訊，即Like「蘋果ATM」fb專頁
http://fb.com/appledailyatm
|
鍾意就快D Share啦！
|
|
|
