藝人黃建東（Derek）在2011年參加香港先生選舉入行，家住公屋的他人窮志不窮，一直在無綫默默耕耘，直至去年惡搞扮嘢拍片而熱爆網絡，成為新一代扮嘢王，事業方面人氣急升，原來他的感情生活亦相當美滿，秘密搭上現為王祖藍旗下藝人的前DJ瑪姬！兩人在今年愚人節上載求婚相，事後澄清是開玩笑，但之前兩人翹手齊齊出席晚宴，期間更互笠高帽，表現曖昧。直至日前兩人更被東網影到雨中甜蜜掃街，臨別更不捨擁吻，拍拖斷正！
一巾兩用
日前兩人被影到現身尖東街頭，期間下起雨來，瑪姬即翹住Derek的臂彎，之後兩人走到一間食店門外「搵食」，見Derek付了數十元買了一碗魚蛋及一碗燒賣，初時兩人各有各食，之後Derek即忍不住主動出擊，餵對方食魚蛋，而瑪姬亦禮尚往來餵番對方食燒賣，兩人餵來餵去，十分sweet！期間Derek見到瑪姬的嘴邊沾到醬汁，即貼心用紙巾幫她抹嘴，抹完之後再順手抹自己的鼻，實行一張紙巾兩份用，可見兩人關係非淺！
AA制冇閉翳
食完之後兩人起程，繼續雨中浪漫，Derek幫瑪姬戴衫帽，驚她戴不穩又出手撳實她的頭，摸完頭之後又索性摸埋膊頭。原來兩人是轉場到咖啡室，Derek安頓好瑪姬坐下後就去了買嘢食，見他買了一杯飲品及一件蛋糕回來，而瑪姬就全程坐在位上甚麼都不用做，但她亦有畀番幾十蚊給Derek，實行AA制。期間兩人甜蜜談心，見瑪姬不時被Derek氹得開心大笑，兩人一杯飲品兩份飲，一件蛋糕兩份食，夠晒慳！食飽後後兩人離開咖啡室，沿途見他man爆護花，瑪姬表現冧爆，原來Derek是送瑪姬取回座駕，臨別時不捨對方的兩人四目交投，之後Derek即忍不住攬住瑪姬，更錫對方塊面，依依不捨目送對方座駕離開後才捨得轉身走人，認真癡纏！
死唔認拍拖
東網致電東東，對於影到與瑪姬在街邊拍拖篤魚蛋，他聞言即尷尬笑，問到兩人關係？他謂：「好...朋友。（有幾好？）er...總之好朋友，你哋影到啲咩？（你哋一齊食魚蛋？）哦，朋友分享嘢食啫。（追佢？）er...認識緊。（你幫佢抹嘴？）吓？我哋有嘴？（抹嘴。）哦，正常，朋友個嘴污糟咗。」問到兩人可是拍拖？他死口不認：「好開心囉。（下次帶人食啲貴啲嘅嘢？）我好貼地、平民。」他透露兩人之前曾一起睇戲，但未上過對方屋企，亦沒有親嘴過。問到兩人可會有機會發展？他謂：「唔知架，要睇對方，唔係我話事。（你拍拖會唔會公開？）感情事我好低調，因為係私人事，同埋想保護對方，費事影響佢。」
|
鍾意就快D Share啦！
|
|
|
