2017年8月6日 星期日

【Bob嫂月底生仔】四個夠晒數 林盛斌考慮結紮:當禮物送畀老婆 __,Bob,林盛斌,

林盛斌(bob)孖老婆、細囡機機,同文頌嫻仲有囡囡Jamie,今日到銅鑼灣皇室堡出席親子活動,仲齊齊上台表演。活動中文頌嫻就陪住Jamie表演彈琴,B ...


林盛斌(bob)孖老婆、細囡機機,同文頌嫻仲有囡囡Jamie,今日到銅鑼灣皇室堡出席親子活動,仲齊齊上台表演。活動中文頌嫻就陪住Jamie表演彈琴,Bob就同機機一齊唱周柏豪嘅《最好不過》,Bob話呢首歌平時揸車嘅時候,幾個女成日聽所以好鍾意,經常都跟住唱。講到細仔喺今個月底出世,問到Bob嫂依家陀B情況?Bob話:「老婆糖尿指數都係有啲高,初時知道有咗都有同老婆講,如果真係陀得辛苦,其實我哋有三個女就好足夠,不如算啦。」Bob續稱:「但係老婆都堅持話要頂埋佢,而家每日都要靠打針嚟控制指數,每日要打四支針,所以真係好偉大,我仲真係有打算做結紮,當係送畀老婆嘅禮物。」至於Bob有份主持嘅大台節目《BigBoys歷險記》內,法科師傅杜慶龍(龍哥) 喺節目入面鬼上身,引起唔少觀眾同網民熱烈討論。今日就有報道指大台有意將原定4集嘅節目Cut到2集,有關龍哥嘅戲份亦都全被Cut走。Bob表示自己有睇過報道,但係其實佢只係負責做其中一集,佢直言:「電視台要考慮嘅嘢好多,我哋做幕前嘅係收指示去做。」 佢又話:「知道余小姐有講過節目上係有啲調動,我哋都好希望日後可以喺其他途徑俾觀眾睇番,始終台前幕後大家都用咗好多心機去拍。」至於文頌嫻同Jamie接受訪問時就話到,囡囡相當為食,佢笑言:「成日都好擔心佢會畀人用零食拐走咗,所以經常都同佢講陌生人嘅嘢唔好立亂食,但係佢每次都照食,當然每次我喺佢身邊。」講到囡囡公開表演,佢話都唔係第一次,曾經去過演藝學院同文化中心,文女話做表演都係想訓練囡囡嘅自信同埋膽量:「因為第時搵學校都要佢自己面試,所以增強自信心有好處。」

(攝影:曹家誠) Bob話打算結紮,當係送俾Bob嫂嘅禮物。 Bob話原本3個女就好足夠,不過Bob嫂堅持生第4個。
文頌嫻話囡囡好為食。

來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...