2019年5月2日 星期四

【重新學習】掹番起自己拒絕沉淪 楊潮凱:冇底線去把握機會 __,楊潮凱,

攝影:陳俊強
楊潮凱11年在戚其義監製的劇集《天與地》中,飾演少年陳豪而被人認識,近年在不少劇集都見到他的蹤影,發展逐漸有起色,不過日前他在社交平台出Post,表示 ...


楊潮凱11年在戚其義監製的劇集《天與地》中,飾演少年陳豪而被人認識,近年在不少劇集都見到他的蹤影,發展逐漸有起色,不過日前他在社交平台出Post,表示自己與TVB的經理人合約正式結束,改簽普通藝員合約,期待新的轉變,新的挑戰!(新聞連結: https://bit.ly/2XVIkbh )



楊潮凱日前在銅鑼灣接受訪問,對於這個決定,他說:「真係唔容易,之前問咗好多朋友,佢哋都覺得呢幾年我嘅發展都幾好,多咗好多機會,如果而家走咗,會少咗呢啲機會?我都有呢個諗法,但係諗深一層,我喺呢個地方已經有10年,想試吓同其他唔同單位合作,簽經理人合約,要以公司嘅製作行先,某程度會放棄其他機會,所以我想有番呢個自主權,不過我喺呢個地方,仲好想同其他監製、演員合作,所以咪同公司提議,不如選擇藝員合約。」潮凱續說:「我而家有傾緊啲登台,美加同內地都有,仲有啲網劇同電影,呢一刻對我嚟講,最新鮮係覺得重拾番嗰種主導權,因為TVB係一個comfort zone,唔使理任何嘢,只要專心做好自己嘅工作,但係而家自己接工作,要知道人哋嘅市場發生咗乜嘢事,點樣傾先係最妥當,好多嘢以前我係唔識,所以而家要重新學習。」



不過潮凱剛剛榮升做爸爸,囡囡只有13個月大,在這時選擇外闖,似乎有點冒險?他笑說:「係㗎,其實初初都有擔心冇穩定嘅收入,正所謂手停口停,不過同太太傾完,佢覺得如果我有咁嘅諗法,不如去做喇,過咗幾年想走都走唔到,亦未必有呢團火,所以咁啱之前簽嗰7年約又完,可能今次係一個好嘅契機畀我去試。」



入行10年,或者有人覺得潮凱未有代表作,不過他表示對他來說,每一個階段對自己都有交代:「可能我咁多年嚟都唔係做主角,變咗可以有好多機會去試,當然一定有失意嘅時候,好似啱啱喺訓練班出嚟,有時都會諗點解呢個同學會接通告先過我?嗰陣雖然好慶幸已經係劇接劇,但係冇一個空間畀自己去思考,之後可以點樣去演出,同埋好多嘢都浮沉,好似拍《天與地》,睇到張rundown係場場都有份,但係拍完之後,即接另一套戲嘅外景,雖然都係場場有,不過只係喺後面,嗰個落差真係好大,變咗都會問自己,究竟係咪公司唔鍾意我?我真係唔識得去處理。」他續說:「呢段時間都維持咗好幾年,之後公司都同我簽經理人合約,但係都唔可以代表安排啲位係越嚟越好,呢個係好現實嘅事,唔通我唔做嘢?咁我都要食飯,我見到啲同事做得唔係特別好,我又唔係做得特別差,點解佢嘅機會會好過我?」



迷失過後,潮凱終於都想到問題所在:「原來所有嘢係運氣,呢個行業真係需要運氣,好戲同有能力當然重要,不過如果加埋好運,你條路會行得好暢順,不過我自己唔係呢類人,所以咪惟有做好自己,之後再同自己講,要更加做好自己,希望做到人哋唔搵我,係佢哋嘅損失。而家諗番轉頭,覺得嗰陣有少少戇居,我第一日入訓練班,係想做一個演員而唔係明星,點解要追求啲咁虛無嘅嘢?我今日做到主角, 但係聽日可以唔係,點解要去追求呢啲,而唔係做好啲戲,等個角色多啲人鍾意咪仲好?諗通咗之後,就知道自己條路可以點行。」



到了15年,潮凱向公司請了一個月假期,獨自出走呼吸新鮮空氣:「其實真係好任性,但係與其怨都唔會改變到個世界,只係繼續沉淪,惟有自己掹番起自己,任何人都幫唔到自己,不過呢個經歷對我真係好好,真係不枉此行,等我可以繼續行落去,而家你問我係咪好有把握,一半一半喇,有啲嘢都係講機緣、際遇,如果際遇唔好,點努力都冇用,我只可以做嘅係將自己最好嘅嘢畀大家睇,嘗試吓同多啲人接觸,我成日話唔怕去試鏡,就算我唔得,都知道自己邊方面唔得,對我係學習過程,我亦都唔會畀底線自己,乜嘢類型嘅嘢都會去試。」



撰文:何慧斯

場地提供:M2 Home(皇室堡)



《MCU寶石時軸全記錄》

1套6冊解構Marvel電影宇宙

入場睇Endgame前必讀天書!

https://hk.adai.ly/IFk7iee55V



-----------------------------

【記住63836568】全民爆相爆片!下一個爆料王就係你

https://bit.ly/2Guolu9



-----------------------------

星期一至五晚上10點半

《動腦Q》Let's Q the money!

http://bit.ly/2QW8LcI



攝影:陳俊強 楊潮凱表示娛樂圈呢個行業真係需要運氣。 楊潮凱表示娛樂圈呢個行業真係需要運氣。
楊潮凱坦言有迷失的時候。

楊潮凱坦言有迷失的時候。
潮凱希望在工作和家庭之間得到平衡。(facebook圖片)

潮凱希望在工作和家庭之間得到平衡。(facebook圖片)
潮凱近日在《鐵探》的演出受到讚賞。 (影片圖片)

潮凱近日在《鐵探》的演出受到讚賞。 (影片圖片)

鍾意就快D Share啦!
Related Posts Plugin for WordPress, Blogger...