真面目
禽流恐慌 H7N9大陸死 14人 鄭嘉穎橫店啪藥狂呻鼻
TVB出名人工奀兼捱死，所以近期唔少當紅無綫人，一係離巢過檔王維基揸旗的 HKTV、一係就密密北上強國搵人仔。好似視帝鄭嘉穎，近年便頻頻北上掘金。
不過近期內地 H7N9禽流感不斷擴散，最新確診人數更累積至 62人，死亡人數增至 14人（至週一），疫情緊張。本刊發現身在內地橫店拍古裝劇《華胥引》的鄭嘉穎不幸患上重感冒，鼻水猛流，要準時啪感冒藥控制病情。雖然 H7N9肆虐，但病到死死吓嘅嘉穎無論出街或拍戲全程冇戴口罩，唔顧自己，都顧吓其他人啦！
43歲鄭嘉穎，前年憑內地劇《步步驚心》爆紅全中國，現時嘉穎身價已暴漲至 50萬人仔（約 62萬港幣）一集，好過於 TVB捱騾仔，所以近年嘉穎亦主攻內地市場。單是 2013年便已接拍了《葉問》、《英雄》及《滾滾紅塵》等大陸劇，而最新一套就是由吉林衞視製作的古裝劇《華胥引》。
感冒唔戴口罩
《華胥引》早於 3月頭已開拍，《華》劇講述關於夢境的奇幻故事，鄭嘉穎於劇中飾演一名風度翩翩的公子蘇譽，而作為此劇核心人物的他，更連串起 4個小故事。
雖然 H7N9肆虐華東（上海、浙江、江蘇、河南及安徽）一帶，至今單是華東確診人數已達 57人，死亡人數 13人，但一眾在橫店開工的電視劇卻未有因此停工，嘉穎仍在橫店為《華》劇趕工。
聽落得人驚，但上週四（ 11日），本刊記者見到披頭散髮、穿上古裝拍群戲的鄭嘉穎，就算埋位前，被超過 20位「粉絲」近距離圍住亦冇戴口罩防備，全無防疫意識。
病都要食煙
拍攝途中，嘉穎曾換上便服去到片場附近探其他劇組班，之後便由助手陪同下到片場以外的茶餐廳醫肚。
只見嘉穎一坐下，便急急向侍應要了一杯水送感冒藥。雖然感冒纏身，但嘉穎仍冇戴口罩，而且還對着助手不斷呻鼻涕「包雲吞」。話就話病到眼淚鼻涕出曬嚟，但煙癮一起，嘉穎更不理茶餐廳是室內場地，照樣煙駁煙，就算病到死死吓，頂咗煙癮再算。
疫情擴散
內地 H7N9禽流感不斷擴散，繼華東及華北地區外，最近連華中亦失守。至週一（ 15日）江蘇及浙江再多 2人確診，而早前 1名南京市的確診患者亦宣布死亡，令確診人數累增至 62人， 14人死亡，聽見都心寒。
陳浩民勁驚 H7N9
《華胥引》除鄭嘉穎外，有份演出的香港演員仲有陳浩民。上週四（ 11日）嘉穎拍完戲後，換上便服去另一戲組探陳浩民班，感冒纏身的嘉穎全無意識戴口罩；而陳浩民就相反一停機即急急戴口罩，話曬老婆蔣麗莎同 1歲半大的女兒陳雅薷等佢養，陳浩民真係唔可以病。
雖仍未證實能人傳人，但為免染上 H7N9，陳浩民拍完每一場戲即叫助手遞上口罩（左圖）。而就算見到嘉穎同場探班，佢都盡量少說話，以免被傳染。
撰文：何家文
|
鍾意就快D Share啦！
|
|
|