探熱針
用心良苦 曾志偉鋪路救欣宜
過去半年，工作量不多的欣宜，體重卻有增無減，「翻脹」 40磅，直至近期的起心肝密做運動，一個月已減去 10磅，身形開始有改善。
欣宜減磅救事業，多得曾志偉。據知，志偉發起舉行的《開心果永遠欣想你演唱會》，預備了半小時給欣宜獨唱念亡母外，無綫九月開拍的新劇《 Aerobic Girls》，也留了一角給她，俾曬位欣宜努力減磅，用心良苦。
兩年無碟出
肥姐病逝後，曾志偉對欣宜一直照顧，每年的賀歲電影，總會預她一角。雖有一班 uncle、 auntie睇住，但主力做歌手的欣宜，自一一年推出第二張唱片《故事的配角》後，至今已有兩年無碟出，幕前演出機會亦不多，失去目標加上暴飲暴食，令身形「翻脹」四十磅。
「欣宜冇乜嘢做已經唔開心，又冇咗個男朋友，要用食物嚟滿足自己，其實反映佢有情緒上問題。雖然佢算唱得，啲歌亦受歡迎，但唱片市道唔好，都冇辦法； hea咗年幾，而家先開始有新歌錄音。」欣宜身邊人透露。
唯一免試鏡
沈殿霞逝世五周年，曾志偉以召集人身份，出面請了汪明荃、張學友、陳百祥、任賢齊、草蜢等人，於六月一日（肥姐生忌），在紅館舉行《開心果永遠欣想妳演唱會》，以歌紀念和分享肥姐生活點滴，曾志偉亦一早講明，其中有半小時，撥留讓肥姐愛女欣宜獨唱。
「有兩個原因嘅，一來志偉想圓咗肥姐希望女兒紅館開騷心願，二來見欣宜冇乜嘢做，唔想佢自暴自棄繼續肥落去，等佢有個目標。」
除了紅館演出，九月無綫開拍大堆頭新劇《 Aerobic Girls》，也預留了一角給欣宜。
「套劇有梁家輝、陳慧珊、佘詩曼，卡士好強，好多人爭住想做，參演嘅女藝人都要試鏡，唯獨係欣宜唔使，因為志偉一早 mark咗個角色俾佢，雖然明知好多人都會眼紅，但志偉想拉番欣宜起身，佢認為大家應該體諒，俾機會幫吓個細路女。」一名無綫工作人員說。
無預鄭少秋
據了解，由於肥姐的紀念演唱會是臨時發起，籌備時間很倉卒，嘉賓名單仍未完全落實。
「都係因為有哥哥逝世十周年紀念演唱會，先有肥姐呢個騷出現，前後構思加搵人都係得一個多月。」
有指鄭少秋未有獲曾志偉邀請，出席肥姐的紀念演唱會，欣宜在活動上也表示因為秋官不在香港的緣故；本刊記者致電鄭少秋助手，問到秋官是否因工作未能出席演唱會？對方卻回應說：「咁遠嘅事未知住，到時唔知有冇嘢做，所以答唔到。」
兩父女口供不一，何其諷刺。
邵氏連續三年的賀歲片，都是由志偉籌備，而志偉每次都有預欣宜份，非常有心。
mailto:nextb@nextmedia.com
|
鍾意就快D Share啦！
|
|
|
