直擊恒基總部簽約作實 陳豪豪宅豪贈陳茵媺

娛頭

直擊恒基總部簽約作實　陳豪豪宅豪贈陳茵媺

拍拖已兩年的拖友陳豪陳茵媺，恩愛再升溫！早已鎖定對方為結婚對象的陳豪為盡快完成人生大事，近年密密搵儲彈藥，上週被本刊拍得他親身到位於中環 IFC的恒基地產總部，撲槌簽約，以 3368萬購入大埔比華利山 4000呎獨立屋。

未正式簽字結婚，但陳豪相當識做，樓契預咗加埋女友名，陳茵媺呢個「豪嫂」，走唔甩！

其間，陳豪不斷跟身旁的兩名經紀密斟。

陳豪購入的比華利山別墅，位於湖景道，發展商原本意向逾 4,325萬元，但因一手樓新例即將實行，所以劈價近兩成，以 3,368萬超筍價成交。

單位總面積共 4,000呎，望曬吐露港全海景。

上週五，陳豪到恒基總部簽完約後，手持印有恒基 logo的公文袋離開。

拍拖唔夠半年，陳豪與陳茵媺即租住深井碧堤半島同居，更被拍得在家中餵食。

開聯名戶口

財經界普遍認為樓市在未來兩年向下調，但早想成家的陳豪卻不想夜長夢多，睇準時機，趁一手樓新例殺到前，以低出市價兩成，購入比華利山最後一幢別墅。

單位位於屋苑內湖景道，建築面積 4000呎，實用面積 2461呎，共分四層連天台，飯廳客廳及主人套房外，還有三間客房及兩個車位，景觀飽覽吐露港全海景。

與陳茵媺拍拖後，陳豪事事以女友行先。早前陳茵媺在大馬拍攝新劇《單戀雙城》，疑被臨時演員非禮，陳豪二話不說，即飛當地安撫。

據了解，陳豪為給女友驚喜，今次的買樓大計，由搵樓、睇樓到撲槌，全盤親自策劃，更打算在樓契中加上女友名字，由二人共同持有。接受訪問時，他更透露稍後會開聯名戶口，有錢與女友齊齊使，進一步確認「豪嫂」地位。

「 Moses個人好穩重， Aimee就比較活潑鍾意玩，兩個性格一凹一凸，但又出奇夾， Moses同身邊啲朋友都講過，結婚係遲早嘅事，而家只係專心做好啲準備，儲多啲錢， plan好啲佢同 Aimee嘅將來；又話遲啲同 Aimee開個聯名戶口，反正佢哋而家啲錢都係共用，一齊開戶，反而可以更有計劃咁儲錢同投資。」陳豪身邊朋友說。

有指拍拖後，陳豪下禁令，要求女友封胸，更嚴禁她與其他男藝人拍親熱戲。

早前陳豪陳茵媺被拍得相約麥包一家到赤柱食飯，更在對方搭路下，搵苗師傅睇風水，增強事業運。

週日（廿八日），陳豪駕車返回母親位於銅鑼灣的寓所，逗留了一小時後，便與哥哥拎住幾袋紅白藍膠袋離開。

高人睇風水

近幾年開始信風水的陳豪，在麥包（麥長青）介紹下，由娛圈禦用風水高人苗師傅睇風水；前年他與陳茵媺租住深井碧堤半島，今次買比華利山獨立屋，全部由高人教路。

「 Moses仲搵苗師傅夾過佢同 Aimee嘅時辰八字，擺埋風水陣。跟苗師傅嗰批藝人，唔係住貝沙灣就係碧堤半島同比華利山，好似黎耀祥、麥長青、張兆輝、古天樂全部都係聽佢話，個個有名有利， Moses同 Aimee搬咗入碧堤都真係好旺， Moses唔使講，最緊要帶旺埋 Aimee，今年搵多咗好多。」

第二日撲槌

上週五（二十六日）中午十二點，一早約好地產經紀的陳豪，現身位於中環 IFC的恒基地產總部，直上七十三樓的營業部，簽臨時買賣合約，只見他拎住其他樓盤樓書，詢問經紀意見，在內逗留接近兩個鐘，拎住公文袋的陳豪才與經紀離開。

「比華利山呢個盤都有好多藝人住，之前徐濠縈同 Eason都睇過樓，不過佢哋嫌大埔太遠，但 Moses一睇就好啱心水，睇完樓第二日，就打俾經紀撲槌。」

週二（三十日），陳豪出席《金枝慾孽貳》宣傳活動，被問到買樓一事，即刻笑到見牙唔見眼：「睇吓啫！（咁係咪會結婚呀？）等上天安排啦！結婚一定公開，唔公開好衰！」

正在大馬拍攝《單戀雙城》的陳茵媺，有傳被臨記胸襲，事後陳豪即放下手頭上工作，飛往當地安撫。

密密買工廈

自稱穩陣派，鍾意買磚頭保值的陳豪，手上除了持有將軍澳都會駅單位及一間西貢村屋，原來早於○四年，便與家人聯名，以一百二十萬購入柴灣工業城一個寫字樓。今年二月，他與家人成立新公司「 The Black Drop Limited」，準備再出擊。據了解，簽約當日，陳豪對恒地最新推出、位於黃竹坑的環匯廣場寫字樓單位，十分有興趣。

「嗰日佢問經紀攞曬資料， Moses對中層嗰啲一千呎嘅單位最有興趣。其實佢一向有投資買寫字樓，全部都係同屋企人聯名持有， Moses眼光都幾準，賺唔少。」知情者說。

今年二月，陳豪成立新公司，準備全力出擊，投資房地產保值。

陳豪有意購入新落成位於黃竹坑環匯廣場的中層千呎寫字樓單位。

明星別墅

位於大埔三門仔半島的比華利山別墅，是區內最大型的別墅屋苑，屋苑分三期，共有 535戶。雖然屋苑洋房建築密度高，私隱度不足，但飽覽吐露港海景，又擁有超豪會所，設施包括影院、網吧、宴會廳、泳池、緩跑徑等應有盡有，吸引大量明星客入住及投資。

方力申、鄧麗欣

拍拖八年的方力申和鄧麗欣，早年在西半山租住碧麗道洋房同居，去年以月租八萬進駐比華利山 4,000呎別墅，有指二人睇中屋內有私人泳池。

黃浩、徐淑敏

11年，黃浩父親黃文霖病逝，為免觸景傷情，加上徐淑敏再誕下細女，於是舉家搬進比華利山銀地道的 4,300呎別墅。

謝安琪、張繼聰

原本以 4,000元租住大埔村屋， 10年搬到月租 28,000的比華利山翠樺道 2,600呎連 700呎花園洋房，租約期滿後，再搬到附近同樣呎數的單位。

舒淇

11年，舒淇以發展商超筍價 1,830萬購入比華利山翠樺道 2,600呎獨立屋，作投資用途。

雷頌德

09年以 2,300萬購入比華利山湖景道單號屋，面積 4,046呎，享有船灣海景，他更指屋苑的會所設施多，加上大埔空氣好，適合兒子居住。

信者得救

近年深受圈中人擁護的風水師苗師傅，行事低調不愛曝光，平日只能靠用傳真聯絡，追隨苗師傅的圈中藝人如黎耀祥、麥長青、古天樂、張家輝經他指點後，事業一帆風順。

張家輝

08年，搬入背山面海的貝沙灣後，轉投英皇電影，憑住電影《証人》，成為七料影帝。

何韻詩

11年，何韻詩聽取苗師傅意見搬入貝沙灣，並以綠色改運。其時何韻詩凡出席公開場合，都一身綠色打扮，國語碟也以《 GREEN》命名，之後更出奇打入台灣極具分量的「金曲榜」女歌手五強。近年她主演的舞台劇《賈寶玉》叫好叫座，不時在內地巡迴公演，長做長有。

黎耀祥

早年開始跟隨苗師傅放生積福及布家居風水陣，搬住碧堤半島後， 09年出現事業第一個高峰，憑住《巾幗梟雄》成為視帝，近年繼續當旺，分別在 10年及 12年再度奪視帝。

古天樂

02年，苗師傅建議古天樂買下京士柏山當旺屋，自此片約一部接一部。 10年，古仔再依指示搬入貝沙灣，年拍七片的他賺過億，近年的《單身男女》、《竊聽風雲》等，票房大收，片酬颷升到千三萬人仔。

崑妝趕客

無綫四月劇集檔期先後推出兩套重頭劇，八點半時段，三料視帝黎耀祥主演的《神探高倫布》持續「柴九」式誇張演技，加上劇本唔掂，被網友圍插「悶到想爆電視」。九點半時段，以為久等九年的《金枝慾孽貳》可以補番數，一樣失望！花了六十萬拍攝的崑曲重頭戲，大戲妝下，平日稱得上「四正」的陳豪、關禮傑走曬樣，極之趕客；加上崑曲不為港人所熟悉，兩人表現吃力不討好，觀眾網友齊聲叫悶。

《金枝貳》頭兩集十八個角色一齊出，人物關係加上對白，觀眾短時間內無法搞清；一班主要演員如鄧萃雯、蔡少芬、陳豪都算有演技之人，可惜配角不濟，葉翠翠「唸口簧」，苟姑姐廣東話唔鹹唔淡，就連主角之一的伍詠薇，都被批浮誇，講對白如「急口令」，節奏未能配合其他演員，劇集出街首週，同《神探高倫布》一樣，平均收視同得 23點，比起八點播的處境劇《愛•回家》有 24點，還要低。

撰文、攝影：娛樂組

mailto:nextb@nextmedia.com

鍾意就快D Share啦！

下一篇 》