掃呢頁CODE去手機

2013年5月10日 星期五

羅嘉良否認不孝 前妻首開腔:贍養費加咗一倍




上周五( 3日),方敏儀為羅父守夜後,去到華貴邨的便利店購買消夜,之後才乘的士回貝沙灣。

滾熱辣

羅嘉良否認不孝 前妻首開腔:贍養費加咗一倍

上月十八日再度榮升父親的羅嘉良(撈家),其父親在孫女出生前一星期(上月 11日)病逝。面對紅白兩事相沖,撈家只向外分享弄瓦喜悅,對喪父一事隻字不提。上周五晚(三日)羅父設靈時,撈家缺席,翌日早上才現身殯儀館。

近日有周刊爆羅家良不孝,對父親喪事不理,推給胞姊處理,更指他以每月加贍養費 8千元至總金額 2萬元,迫前妻與現任老婆蘇岩見面。據知報道出街後羅嘉良震怒,更表示會透過經理人發聲明澄清。本刊就此致電其前妻方敏儀,自與羅嘉良離婚後,她首度開腔談及與撈家離婚後關係,並透露兒子升中後,撈家將贍養費加一倍。

日前,有周刊爆撈家父親上月 11日在公立醫院伊利沙伯醫院病逝,而太太蘇岩於一星期後在私立港安醫院生女,又在深圳坐月中心休養,花上數十萬,與父親的待遇有天淵之別;加上父親上周五設靈,撈家守夜冇影,指他六親不認未盡孝。此外,又爆撈家由萬二贍養費加至二萬,目的是迫前妻與現任老婆食飯。

上月 18日,羅嘉良再做父親,但原來同時亦經歷喪父之痛,怪不得當日他笑容勉強。

私院使七十萬

自 08年離婚,羅嘉良前妻方敏儀一直對外封嘴,當年只是接受過一間周刊訪問,說過一句︰「離婚係一種解脫」。之後有周刊爆羅嘉良給予前妻的贍養費高達四千萬,但方敏儀多年來甚低調,從未回應與撈家離婚後關係。

就周刊對羅嘉良指控,本刊致電撈家前妻方敏儀,她卻如此解釋︰「當年撈家嘅爺爺去世,撈家老竇因為趕唔到返鄉下,都係由個仔(羅嘉良)擔幡買水。今次嘉良都係有工作在身嚟唔到守夜,佢屋企人個個都明白!」對於撈家闊佬老婆蘇岩,孤寒老竇,她作以下回應。

記:撈家冇送老竇去私家醫院?

方:其實農曆年後,爺爺(前老爺)入咗浸會醫院住咗成個月,後來見情況穩定,至轉去公立醫院。因為想安排爺爺去療養院,但未等到,爺爺就月中走咗。

記:佢住浸會成個月,咪好貴?

方:埋單接近七十萬。

記:邊個埋單?

方:梗係撈家啦,邊個有能力俾?佢對屋企人盡咗能力,只係依家常駐內地,少見家人啫。

記:你喺靈堂上打點一切?

方:唔好咁講,打點嗰個係佢家姐,我只係幫手摺嘢(衣紙)。撈家唔想出面,怕有記者知,所有嘢都係佢家姐搞。守夜嗰日佢要做嘢嚟唔到,佢屋企人明白嘅。

記:話出殯嗰日佢遲到?

方:佢嗰日冇遲到。

神傷現喪禮

上周六( 4日)羅父出殯,只見羅嘉良雙眼紅腫,神情憂傷,捧父親遺照的重任,亦交由兒子羅裕珹負責。

下巴爆瘡

在靈車上,羅嘉良把握機會閉目養神。圖中可見他下巴爆瘡,狀態欠佳。

關係良好

和羅家關係良好的方敏儀,和不少羅家親戚相熟,故亦有攙扶長輩出入。

冇愛情有感情

記:依家同前夫關係點?

方:識咗三十幾年,爺爺(前老爺)當我女一樣,就算同撈家分開咗,無愛情都有感情啦,佢(指撈家)對我兩母子都盡咗能力。

記:有傳你為咗八千蚊見撈家現任太太蘇岩?

方:荒謬!我點會令自己有 hard feeling?贍養費幾多我唔想講,但佢(撈家)見個仔升中學,學費貴,都主動加一倍(贍養費)俾我。(即係萬二加一倍?)總之唔係雜誌講嗰個數,其實佢都開支大,個女又剛出世,我覺得盡能力 OK啦。

記:同前夫現任太太見面唔怪咩?

方:冇人迫到我,我哋見過兩次㖭。最近嗰次係爺爺過身後,同撈家嘅屋企人一齊食飯,佢(指蘇岩)份人好爽朗,成日笑,我同佢都有傾有講。有啲嘢我都放低咗,況且阿仔好崇拜老竇,我哋離咗婚但都係個仔嘅父母,冇愛情都有感情。保持好嘅關係,對個仔嚟講最好。

醫完肚探父母

去年 11月尾,羅嘉良帶埋蘇岩返香港,為顧嘉煇演唱會做嘉賓,他落機就同蘇岩去大牌檔醫肚,相當平民化。

同日傍晚時分,羅嘉良 set好個頭,兩夫婦去到梨木樹一屋苑,和羅嘉良父母食飯。

聽話囝囝

上周五( 3日),羅裕珹跟隨母親方敏儀為爺爺守夜,離開殯儀館時方敏儀不時對兒子耳語,羅裕珹則乖乖聽母親吩咐,看得出兩母子關係密切。

撈家嬲爆發聲明

身在內地的撈家,被指不孝,十分憤怒:「觀眾認識我咁多年,會明白我,(點解 3號嗰晚你唔返嚟守夜?)嗰晚我拍緊嘢。對於唔係事實嘅報道,我會採取行動。我最嬲係啲人利用我去世嘅爸爸亂造謠言,依家準備向傳媒發聲明,澄清事件。」說畢匆匆收線。

據知羅嘉良會透過前經理人公司寰宇發聲明,指有關報道傷害他之餘,也傷害其家人。

守完夜,羅裕珹和方敏儀去便利店買消夜,方敏儀去俾錢,羅裕珹就乖乖打住機等媽咪。

雖然時常不在香港,不過羅嘉良一返香港,都會把握時間見兒子。 10年,羅嘉良被發現帶兒子買遊戲機,不過佢忍唔住周街扯煙,要扣分。圖片

前妻投資有道

08年 7月羅嘉良與前妻方敏儀離婚,羅嘉良將當時愉景灣物業轉贈前妻。

10年方敏儀以$1,380萬將愉景灣物業賣出套現,之後再以$1,138萬轉買貝沙灣一個單位,現已升值至$1,500萬,眼光準確。

貝沙灣單位

10年 1,138萬買入,現值 1,500萬。

升值 362萬

愉景灣單位

03年 1,050萬買入, 10年 1,380萬賣出。

賺 330萬

清水灣曉嵐閣

99年 780萬買入, 03年 800萬賣出

賺 20萬

共賺 350萬

老襟一家親

離婚夫妻雖然婚姻結束,但因為仔女關係,依然再見亦是朋友,就連對方的新一半都可以接受埋,圈中例子唔少。

林青霞 張天愛

張天愛 87年下嫁商人邢李㷧,誕下愛女邢嘉倩,兩人 3年後離婚。之後, 94年邢李㷧再娶林青霞,青霞將邢嘉倩視為己出,早前邢嘉倩在香港仔開幼兒學校,親生阿媽及繼母齊齊出席宣傳,兩人更親切合照。

劉天蘭 謝寧

劉天蘭 84年下嫁岑建勳,誕下一女岑寧兒, 4年後離婚,但兩人再見亦是朋友。 91年岑建勳再娶港姐謝寧後,兩夫妻更試過約埋劉天蘭見面一家親。

謝賢 鬍鬚 Kong

謝賢與拉姑 79年結婚, 95年離婚收場,但因為仔女霆鋒與婷婷,依然經常見面飯局, 00年拉姑嫁飛機師鬍鬚 Kong,而謝賢身邊亦不乏女朋友,兩 pair人不時被拍下四人茶敍。

其他影片
  • 羅嘉良喪父愁爆


鍾意就快D Share啦!