探熱針
重修舊好 翻撻同居 陳司翰復收莊思明
陳慧琳胞弟陳司翰，去年四月跟莊思明分手後，女方放不下情緒跌至穀底，一度抑鬱；甩拖唔夠一年，雙方由身邊朋友刻意撮合，感情死灰復燃，對前度未死心的莊思明，更即棄拍拖只有四個月的德越混血兒新歡，重投舊愛。
未來大姑奶陳慧琳公開踢爆二人已經見家長，莊思明更加毫無避忌，火速搬往男友位於渣甸山豪宅，長駐！
掌握行踪
上週一（四月二十九日）晚上八時多，有份演出處境劇《愛•回家》的莊思明收工後，揸住 LisaＣ牌白色 Fiat，由將軍澳電視城過海返中環時裝店「 Tinselton」，幫手埋數執衫忙完一輪後，再與合夥開店拍檔，樂基兒老友劉晨芝孖住離開。
兩人到 ifc商場食上海菜約一粒鐘，主動埋單的莊思明，在中環鏞記附近放低女友，跟住踩行油往中環美國銀行中心，將車泊入停車場後，轉乘的士到男友家。十分鐘左右，有行李喼隨身的陳司翰，亦坐的士返到。
據了解，當晚陳司翰剛由北京行完騷落機，掌握男友行程的莊思明校啱時間，自動蒲頭。
敢做唔敢認
「身邊朋友都知 Lisa對 Victor未死心，今年初雙方喺朋友聚會撞番，之後 Victor幫 Lisa搞生日 party，個人亦變咗好多，冇再咁少爺脾氣，大家都特登製造多啲機會俾佢哋，雖然今次都算係 Victor做主動提出復合，但 Lisa根本就等緊佢，所以一定撻番着。兩個人本來想低調啲，只係俾 Kelly唔覺意踢爆咗。」二人身邊朋友說。
上週六（五月四日）下午，莊思明返電視城開工，問到同男友同居，她敢做唔敢認。
「我唔想回應感情事，總之我同佢依家關係良好，工作同私人生活都愉快，如果要結婚，無論同咩人，我都會公開嘅。」
反翻撻舊草
身為拿督千金，莊思明要乜有乜，偏偏愛情卻波折重重。前年戀上陳司翰後，眼淚多過笑容，糾纏在離離合合之中，甚至搞到有情緒病。
撻着
2011-3月：二人被拍得撐枱腳，事後女方稱雙方是好朋友，但又大讚對方高大威猛有風度，一個字，冧！
甜蜜期
2011-7月：拍住拖在銅鑼灣掃街，之後雙雙返回男方寓所過夜。
火熱期
2011-9月：頻頻拍拖出巡，被傳媒影到二人出發外遊時在機鐵車廂熱吻，事後莊思明承認與男友去汶萊度假。
平淡期
2012-3月：莊氏三姊妹時裝店開幕派對，陳司翰鬼祟地與一名女伴從場地後門入場。
鬧翻期
2012-4月：在澳門夜蒲後在街頭吵大鑊更驚動警方。未幾陳司翰被踢爆在台灣約會混血模貝兒，傷心的莊思明在微博寫上「 I hate you」，更揚言不會再被影到她與陳司翰出街相片，關係決裂。
各有各
2012-7月：飽受情傷，被傳媒影到終日以淚洗面的莊思明，與德越混血模男友出雙入對，陳司翰也不愁寂寞，經常有女相伴。
翻撻
2013-2月：甩拖一年唔夠再秘密翻撻，莊思明為保護復合戀情封嘴，卻被 Kelly踢爆，細佬陳司翰帶莊思明見家長。
|
鍾意就快D Share啦！
|
|
|
