掃呢頁CODE去手機

2013年5月9日 星期四

穀底王 陳冠希 有線發爛足本睇




我擺明恰你!(設計對白)

探熱針

穀底王 陳冠希 有線發爛足本睇

靠自家品牌 CLOT吊命的陳冠希,早前曾接受有線電視新節目《賺大錢》專訪,由於 Edison全程採取不合作態度,有線遂將專訪抽起唔出。條氣唔順的 Edison竟在 instagram爆粗反擊,並指負責訪問的鍾健威問題愚蠢,將黑面合理化。

據了解,唔肯面對人氣跌,一聽到人氣兩字便發爛的 Edison當日黑住面做完有線訪問後,轉頭在自己公司派對上,對住一眾傳媒追問新歡舊愛,卻笑曬有問必答,非常分裂。

糟質主持

本刊記者於有線翻看陳冠希的黑面專訪,節目開始時,主持的鍾健威介紹 Edison及其拍檔 Kevin(潘世亨), Edison已經好似食錯藥,黑曬口面,對跟他打招呼的鍾健威視如不見,唔係耷低頭就擰歪面,態度極差。

主持和 Kevin聞到味,在整個訪問過程中,鍾健威明顯用盡方法氹「黑面 son」, Kevin見拍檔十問九唔應,亦積極地幫口補位。

據了解, Edison接受訪問前,先經過 CLOT的公關與有線溝通,聲明專訪只講生意經,其餘緋聞、家人及台灣女友 Ann,全部不可以提,問題亦先經他本人過目「審批」。有線全面配合, Edison落閘的問題,一個都無問。

黑面低頭

一開波已黑曬面的 Edison,無論主持問佢乜,佢一副冷淡態度,低頭十問九唔答,要幫他代答的 Kevin表現難為。

狂索鼻

其間經常索鼻又擰歪面,堅持做訪問唔望人,主持讚他係潮人,佢一句寸對方:「唔係潮唔潮人,只係人囉!」

當人透明

到坐低訪問, Edison繼續燶面,大部分時間粒聲唔出,掛住按腳同痕。

直至就人氣問題發爛, Edison才抬頭望住主持。但唔係傾偈,係狂轟。

為配合 Edison的 CLOT跟法國品牌 crossover搞慶祝派對,主持專登在鏡頭前攞住他們的新產品硬 sell,但 Edison毫不領情,即使偶然「開金口」,但雙眼只肯望住地下,同主持零眼神交流,連基本禮貌都欠奉。

為緩和氣氛,鍾健威不時向 Edison送高帽,讚他是潮人代表,點知 Edison一樣唔啱聽,仲寸爆:「唔係潮唔嘲人,只係人!」

鍾健威又扮「矮仔」,自稱唔係潮人,唔識著 CLOT啲衫,向 Edison請教,點知一樣被對方糟質。「你自己研究多啲先啦!(鍾:我唔識,所以要跟你學吓嘢!)唔好話嚟跟我哋學嘢,你自己想要咩先……」硬食一棍,令鍾健威相當尷尬。

遭有線封殺後, Edison在網上爆粗還拖,鬧曬有線全台主持,仲叫有線夠膽就將訪問出街,等人睇吓問題有幾蠢。有線高層曾展章話唔排除向 Edison採取法律行動。

早前 Edison陪女友 Ann返台灣,見接機傳媒小貓三隻,就露出黑面真我本色。(台灣《蘋果日報》圖片)

抽起 Edison訪問後,有線節目《賺大錢》即請來出名脾氣好的周秀娜同丁子高等接上。

觸動神經

你有你問, Edison好少理,低頭按腳玩手指痕,極不尊重。據記者觀察,主持鍾健威提出「點樣吸納年輕客人?」,「兩人合作有爭拗時點處理」等問題,既正路亦毫無難度,但當對方 stupid的 Edison,全程表現無品;在旁為他執手尾的 Kevin,被主持問到 Edison是否比較靜?亦乘機踢爆:「佢睇人㗎咋!睇心情。」

到訪問尾聲,鍾健威提出人氣同生意是否掛鈎的論點,戒備心即起的 Edison唔使拍檔,自己嚟!之後主持再問:「人氣有波折時,你點樣維持呢盤生意?」用詞唔算挑釁,但已觸動 Edison神經,馬上發爛:「我想問吓你點計人氣,你成日提人氣(提過兩三次)!」

被 Edison嚇倒的鍾健威怯住回答:「人氣即係睇報導你嘅篇幅有幾大!」 Edison:「所以我唔識答你,你哋今日若問我呢啲所謂賣衫同鋪頭嘅嘢,點解要提起?你想做娛樂訪問,可以再約我講!」

在旁的 Kevin幫手收拾殘局,望住 Edison說:「佢哋可能好奇啫!佢哋睇嘅角度同我哋唔同。」受盡氣嘅鍾健威仍保持風度,禮貌跟 Kevin傾多幾句先收檔,一完錄影, Edison第一時間起身,除咪就走。

No bye即走

發完爛渣,訪問草草了結。 Edison冇 say bye,率先除咪走人,主持同 Kevin好尷尬。

變臉笑曬

黑面接受完訪問,隨即出席派對的他,對住成班傳媒變臉笑曬,由舊菜阿嬌講到新歡阿 Ann,無任歡迎。

點解要受氣

當日做完有線專訪後, Edison隨即出席公司派對,面對一眾傳媒,變臉四萬咁口。所謂禁忌問題,由台灣女友到舊愛阿嬌張栢芝,均有問必答,與之前在有線做專訪,判若兩人。事後有線索性將 Edison的專訪抽起,進行封殺。鍾健威亦不好過,遭 Edison爆粗問候,又被他的 fans在微博洗版。

「訪問原定六點開始,佢( Edison)六點半先到,嚟到已經黑曬面。我唔明點解要咁受氣!反而 Kevin好好,不斷幫手,完咗訪問佢仲幫 Edison講好話,話佢冇做過關於生意嘅訪問先會咁!(日後會否主動跟 Edison打招呼?)會,起碼我尊重自己!」鍾健威說。

鍾健威承認跟 Edison訪問鬧不快後,其微博即遭對方 fans「恐怖襲擊」,數百個鬧爆留言洗版。

同時間,不少高登友亦寸 Edison的所作所為。



鍾意就快D Share啦!