拍拖初期，柏文同 Jeana經常糖黐豆， sweet到爆。（《忽然 1周》圖片）
探熱針
口不對心 扮箍煲 張柏文背 Jeana搵女消暑
與張柏文拍拖一年的 Jeana（何佩瑜）早前暗示二人感情有變，但男方不願放手，還在微博公開箍煲。
不過，箍煲純粹整色整水！上週五（五月三十一日），一邊氹緊 Jeana的柏文，趁女方人不在港，立即出動覓食充飢，陪索女暢泳。但一發現有人拍照，掩耳盜鈴的柏文即時將索女質俾男性友人帶走，扮冇事發生。
斷正轉 plan
Jeana在微博留言：「原來自己能走出這片森林……向住前面曙光繼續走。」暗示同拍拖一年的柏文分手，不過，上月底女方跟柏文出席江湖叔父陳惠敏娶新抱的喜宴，關係時好時壞。
據了解，數月前開始，二人經常嗌交，有指 Jeana因柏文經常性不忠，忍無可忍，一度搬離跟柏文入住只有半年的跑馬地愛巢，寄居朋友屋企，以示分手決心。見 Jeana玩認真，柏文積極箍煲，奪命追魂 call加長命短訊，希望 Jeana回心轉意，甚至不怕肉麻，公開在微博氹女：「溫暖回憶……會支撐我們走很遠的路。」
箍煲一件事，出去「食好嘢」又另一件事。上週五（三十一日），柏文趁 Jeana出埠開工大好時機，跟兩男帶住三名索女，三對三到石澳鴛鴦戲水。為此，柏文更向友人借咗架戰車，三男三女在石澳解暑至黃昏，原本打算載索女離開的他，發現有人拍照，即轉 plan將索女交託另一男性友人帶走，自己則同另一友人上戰車離開。
俾栢芝鬧
柏文頻頻出招，確令欲斷難斷的 Jeana心軟，計劃待馬來西亞的工作完成後，再俾多次機會男友。
「柏文唔俾 Jeana出去蒲，但自己就成日趁女友出去開工去飲酒溝女，兩個成日為呢啲事嘈交， Jeana想分手，但每次柏文氹幾氹又冇事。其實成班朋友都希望 Jeana唔好再拖，雖然柏文做緊雪條代理，亦喺網上賣自家品牌衫，但最弊佢玩多過做，冇乜錢賺，好多開支都係 Jeana俾，個個朋友都勸緊佢唔好再心軟。聽講之前 Jeana喺微博暗示分手，即刻俾栢芝鬧，話佢分手都要低調，唔好影響柏文。」知情者說。
對於柏文唔願分手， Jeana有保留地回應：「總之我哋仲係好朋友，希望佢以後勤力啲做嘢，我都想佢好！我大個女，經歷咗啲嘢，依家覺得事業重要啲。」
突解婚約
感情生活一直多姿多采的柏文，最爆的一次是 09年同圈外女友廣發請帖在大除夕於深灣遊艇會結婚，但二人卻在婚前一日吵大鑊，一怒之下柏文取消婚約。結唔成婚，本來包起整個婚宴的栢芝，又要無端端使一大筆賠酒席訂金。有家姐照，一個仙都唔使出的柏文，鍾意話分就分。
|
鍾意就快D Share啦！
|
|
|