熱爆娛樂: 難忍男友四圍溝女　朱慧敏電視城炒大鑊

2013年9月21日星期六

難忍男友四圍溝女　朱慧敏電視城炒大鑊

孤獨食晏

男友在樓下煲煙，本身在電視城拍緊《愛•回家》的朱慧敏，放飯時則獨自到 canteen買飯，和男友劃清界線。

娛樂喧

難忍男友四圍溝女　朱慧敏電視城炒大鑊

04年港姐亞軍朱慧敏，與 EO2成員兼華星冰室老闆 Eddie（彭懷安）拍拖兩年，表面上愛得如膠似漆，實情 Eddie不時被拍得攬女夜蒲，激得女方紮紮跳。

據知逼婚無效的朱慧敏終忍無可忍發難。上月尾，有人目擊兩人在電視城內的 16廠化妝間嘈交。其間朱慧敏更向男方怒吼：「你有冇理過我感受㗎……成日講大話！」當日吵架事件更驚動無綫製作資源總監樂易玲。

上周，本刊訪問 Eddie，他迴避問題，更直言「冇諗過結婚。」 Eddie打死唔肯結婚，難怪恨嫁朱慧敏嬲到震！

「車震事件」過了八年， 32歲的朱慧敏修心養性，落力洗甩「小三」姣名。努力有回報，近年她除升呢做處境劇《愛•回家》的女主角，與 EO2成員 Eddie的感情亦穩定，有傳男方早前曾向她求婚，做人妻有望，但據知最近兩人感情又起暗湧。

今日各行各路　

冇癮煲煙　

正在拍《飛虎 II》的 Eddie，就算和女友同時身處電視城，二人都刻意冇碰面。正與朱慧敏冷戰中的 Eddie，一個人在錄影廠外煲煙，神情落寞。

主動搭枱

買完飯後，朱慧敏瞄到同劇配角羅天池同樣在 canteen食飯，即主動走過去搭枱，但心情麻麻的朱，全程冇同對方講說話。

女方發難嘈交

昔日甜蜜拍拖

朱慧敏和 Eddie拍拖兩年，多次被影到在街上調情耍花槍。 Eddie亦試過被拍到出入女友清水灣半島香閨，但二人至今仍堅稱只是好朋友關係。

上月底，有幕後目睹朱慧敏和 Eddie在電視城內炒大鑊。據該幕後說：「 Eddie近排開緊《飛虎 II》。嗰日見到佢喺 16廠化妝間出面同個女仔講嘢講得好大聲，聽到個女仔話：『你有冇理過我感受㗎？去玩唔緊要，咪講聲囉。成日講大話，咁樣好難落去。』行近啲，先見到個女仔係 Queenie（朱慧敏）。 Eddie見有人行過，仲專登拉埋 Queenie一邊，不過 Queenie繼續好大聲話：『你尋晚話開工，點解有人見到你喺灣仔喎， call你又玩熄機，咁算點？』」據知，由於二人爭執聲浪頗大，途經的工作人員和藝人亦為之側目，而事件最後更傳至高層樂易玲耳中，樂事後亦有召見朱慧敏了解情況。

恨嫁心切

事實上，童年在單親家庭成長的朱慧敏，一直冇乜安全感，亦極度渴望組織小家庭。她亦直認恨嫁：「我好想結婚，有個完整家庭。」可惜，她前年箍唔住花心台灣 IT男友 Rick Chang，臨門一腳分手。自此她講明拍拖唔會再公開，驚一講就散。不久，她搭上 Eddie，二人除多次被影到拍拖睇戲和食飯外，早前更索性在清水灣半島同居。雖然多次遭斷正拍拖，兩人卻一直否認，造就男友繼續以單身形象溝女。

知情者透露：「 Eddie夜蒲慣， Queenie就鍾意匿喺屋企玩煮飯仔，拍拖初期， Eddie都有就佢，但耐咗就回復本性，晚晚去蒲。佢份人好 friendly，慣咗同女性朋友攬頭攬頸，舊年佢俾雜誌影過兩次攬女。 Queenie都有同佢嘈過，但佢講極唔聽。今次 Queenie喺大庭廣眾咁嘈，嬲到火遮眼，都唔係咁易𠱁。」

對於同朱慧敏嘈交，日前本刊訪問 Eddie，他最初避忌地說：「嘈交？冇冇冇，我哋冇喺 TVB見過。」問他嘈交是否因自己緋聞，他則扯開話題說：「啲人成日話我多緋聞啫，啲緋聞都唔係真。（你有冇諗過結婚？）冇諗過結婚喎。（ Queenie 30幾歲唔等得喎？）咁我都 30幾歲啦，兩人都仲好細啫。」而在截稿前，本刊仍未聯絡到朱慧敏。恨嫁朱慧敏遇上爛蒲友，睇怕都係冇運行。