2013年9月13日 星期五

不忿無綫唔俾獎 謝天華開公司自救




潛行老銅

上周六( 7日),謝天華揸車由寓所出發到銅鑼灣接受某傳媒專訪。自組公司後,他連助手都冇,要自己打電話問路。

滾熱辣

不忿無綫唔俾獎 謝天華開公司自救

謝天華於本周開播新劇《神鎗狙擊》孭飛,但原來這是他離巢前最後一套劇集。上周四( 5日),他爆響口自立門戶,開設「拉風工作室有限公司」。據知於無綫捱了足足 16年的他,一直對視帝寶座虎視眈眈,可惜無綫始終唔肯將獎項拱手相讓,促使他決定另覓出路。

今年 46歲的謝天華今鋪唔輸得,近日發行力度橋捧自己。上周六( 7日),記者便發現他相約三名女子商討未來大計。

謝天華今年突然宣布與無綫經理人合約完結後不再續約,更自組公司接洽工作。他 09年憑劇集《學警狙擊》中配角「 Laughing哥」人氣急升,更順勢擔正電影《 Laughing Gor之變節》及於劇集《潛行狙擊》當主角。但無綫始終唔肯造就他成為視帝,使謝天華於頒獎禮連續坐了多年冷板櫈。

扯煙充電

之後謝天華到尖沙嘴傾廣告合作,他見廣告公司員工未到,便立即扯煙充電,準備開會。

主動握手

不久,幾名廣告公司員工到場,謝天華亦放下明星架子,立即起身握手打招呼,十分識做。

靠老婆做主角

知情人士說:「 Laughing哥個角色係紅過下,但未至於可以開到套劇。不過,天華個老婆 Tina(李天恩)見老公有機會食住個勢發圍,咪搵咗喺 TVB做嘢嘅家姐幫手囉!就係咁, TVB開咗以 Laughing哥為題嘅《潛行狙擊》同電影。」前年,謝天華憑《潛》劇獲提名「最佳男主角」及「我最喜愛的電視男角色」兩獎,最終竟然輸俾另一親生仔鄭嘉穎。「佢以為個角色咁 hit,實有獎攞,點知都係輸咗。佢一直都唔開心,認為再同無綫續約都唔會有咩機會,開始計劃自己搞公司,諗住靠自己好過。」

謝天華與老婆李天恩結婚多年,雖然男方多次被拍得夜蒲,但無損兩夫妻感情,頻頻曬恩愛。

老婆佔 1%股份

為食住個勢,謝天華將公司名改做「 Laughing Workshop」,中文譯做「拉風工作室」,非常搞笑。而根據資料顯示,謝天華(原名謝興華)屬公司大股東佔 99%,其妻李天恩只佔 1%。

四出搵投資者

謝天華雖然近期忙於籌備與鄭伊健、陳小春等的《歲月有情演唱會》,但不忘積極為新公司籌謀。上周六( 7日),他獨自外出到銅鑼灣一家餐廳接受訪問,全程自己一腳踢,並沒有助手及化妝師同行。之後,謝天華立即駕車到尖沙嘴會合三名女士,應該是傾談投資事宜。其間,身穿西裝、着得官仔骨骨的他不時坐到蹺起腳,十足老闆款。幾個人更不時抽煙,傾到笑曬口,似乎合作有望。知情人士說:「其實上年尾,佢都開始唔搵無綫安排嘅經理人幫手,嘗試自己同人傾,唔少內地登台都係由佢一手一腳傾。啲內地生意人見天華自己出面傾,都會俾面出價高多幾萬。但始終冇大公司撐腰,所以佢睇合約都比之前謹慎咗。」

謝天華:我邊學邊做

周二( 10日),謝天華拍攝演唱會新歌〈消失的光陰〉。提到自組公司一事,他說:「新公司剛成立,所有事都要慢慢嚟俾自己機會邊學邊做。」

謝天華離開無綫後表現風騷,拍 MV時,他更向鄭伊健等人狂掟空的汽水罐。對於謝開公司,其兄弟亦大表支持。

資金分配保守

謝天華新公司「拉風工作室」,英文名叫「 Laughing Workshop Limited」,擺明食住當紅角色嘅水尾。知情人士透露:「天華都幾保險,公司股份自己佔 99%,老婆就得 1%。佢話自己未做過呢類型生意,開公司點都有風險,萬一蝕錢,都唔想連累到老婆。」

周二( 10日),記者就開公司自救問謝天華,他說:「開工作室係好普遍嘅做法。喺公司做咗一段日子,自己會想轉第二個環境,俾新衝擊自己。有啲人可能會選擇留番喺度,一路拍,不停拍落去。(老婆有冇俾意見?)一定有㗎,老婆點會唔俾意見呀,咁親嘅人瞓喺隔籬。(係咪因為嬲無綫唔俾視帝你呀?)視帝點爭取呀?唔係演技好先有嘅咩。我只係想有個新階段啫!」

輸獎起離心

2011年鄭嘉穎憑《怒火街頭》爆冷奪視帝,當年大熱謝天華雖有握手祝賀,但難掩失望之情。

6萬租新竇

今年,謝天華由跑馬地搬去月租約六萬元的京士柏衞理苑,看來他甩了無綫後,仍有不少搵錢機會。

《神鎗》女角 非死必傷

警匪劇集一向受觀眾歡迎,《神鎗狙擊》更承接着《衝上雲霄 II》的強勢出擊,難怪眾演員對收視頗有信心。劇中兩位女主角最後更會身犯險境,動作場面絕不輸蝕給男角。

徐子珊昏迷

有組織罪案及三合會調查科成員上官明珠(徐子珊飾)因查案途中發生爆炸導致重傷,陷入昏迷狀態。於是李浩揚(謝天華飾)在其身邊一直默默守候,不斷鼓勵,希望明珠蘇醒。

周海媚被綁

而保險經紀的王若玲(周海媚飾)則捲入警匪槍戰中,更被脅持成為人質,被吊半空。一早對若玲已生情愫的高晉堅(張兆輝飾)奮不顧身營救。晉堅與若玲因此消除誤解,有情人終成眷屬。



鍾意就快D Share啦!
Related Posts Plugin for WordPress, Blogger...