掃呢頁CODE去手機

2013年10月18日 星期五

[忽然1周 951 ENTERTAINMENT] 官太哈囉喂 MW,




細女馬露玲與符傑廉喺四季酒店筵開 33席,馬時亨夫婦開心到不得了,全程笑騎騎,個口冇合埋過。

媽咪姐

官太哈囉喂

周一( 14日),商務及經濟發展局前局長馬時亨細女馬露玲出嫁,喺中環四季酒店擺酒,請來好多猛人賓客。除咗商界、演藝名人,仲有新舊政界高官。平日個底麻麻嘅官員,表現古靈精怪,搞到一班甚少對鏡頭嘅官太要執生配合。官太們,哈囉呀!喂喂,望鏡喇。

伏明霞最福氣

前財政司司長梁錦松老婆伏明霞,盛裝到場,一身黑裙都難掩圓碌碌身形。佢落車嗰陣好鬼大風,吹到披頭散髮,不過佢超級敏捷,兩秒還原靚頭,金牌運動員係唔同啲!

財爺太太最樸素

講到最樸素,都算係財政司司長曾俊華太太,一身紅花裙嘅佢,素顏見人,連雀斑都唔遮,勝在笑容燦爛。反而財爺相都唔願影,一支箭入場。

陳茂波太太土味濃

知名梁粉、發展局局長陳茂波孭住「囤地波」、「劏房波」咁多名,做太太嘅許步明都唔敢太高調。陳太一身 C9褲裝撞閃鞋,品味認真麻麻。

林瑞麟太太夠霸氣

前政務司司長林瑞麟同太太一齊到場,林太行頭十足,巨型珍珠耳環、頸鏈搶到暈。兩個一落車,林瑞麟即時繑實老婆慢慢行,林公公果然入型入格。

葉澍堃太太好敏感

前經濟發展及勞工局局長葉澍堃,一見記者即拖住太太 Nancy急步入場。相反戴住閃鑽翡翠戒指嘅葉太對鏡頭就好敏感,一有閃燈即刻望鏡,得咗!



鍾意就快D Share啦!