上週五（ 4日）， Fred首次有份參與台慶亮燈儀式，排位好、又搶鏡，難怪整晚風騷到爆。
真面目
受保護 嫌角色衰 鄭俊弘推劇保王位
《星夢傳奇》令 29歲鄭俊弘 Fred成功翻生，更被稱為「高分王」和「小歌王」，雖未真正攞《星夢》冠軍，但無綫將重開的唱片部「星夢娛樂有限公司」已趕住收歸旗下。
原本， Fred一早亦接拍新劇《點金勝手》，更屬男二身份，終可一脫大茄之名，但據知《點》劇其角色沉迷炒股，又連累家人，無綫覺得有損高分王正面乖仔形象，即刻幫佢推咗個角色， Fred當然 no say啦！佢仲一頭霧水咁話︰「推咗個角色，自己都有種奇妙嘅感覺。」
大眼乖仔樣的 Fred，入行以來拍劇大多數做閒角，對白都冇乜兩句。憑着《星夢傳奇》成功彈起，唔少監製搵佢拍劇，但貴為無綫新金蛋，所有同 Fred形象有衝突的，無綫通通擋！
黃嘉樂頂替
《點金勝手》有黃宗澤、徐子珊、胡定欣，監製特登搵個好位畀 Fred，戲分更屬男二。知情人士說︰「當初 Fred聽到可以做第二男主角，真係好開心，但收到劇本先知原來個角色幾負面，又沉迷炒股，仲連累家人，佢都有啲擔心，同埋公司𠵱家咁錫佢，過咗一陣就有人通知佢，個角色由黃嘉樂頂替咗。」
本週一（ 7日），黃嘉樂在電視城開始拍攝《點》，本刊問到他頂替 Fred的角色，黃嘉樂說︰「最近先接咗呢套劇，監製都有講個角色原本係 Fred！我自己就冇乜感覺，因為成日有呢啲事發生，同事做唔到，我做都好正常，公司安排啫！」
無綫呵番
Fred近日為《星夢傳奇》本週六、日的總決賽準備，只出席一些商場活動。不過無綫亦有呵番，在另一套新劇《愛我請留言》安排 Fred客串。
上週五（ 4日）， Fred首次出席台慶亮燈儀式，問他推劇一事，他說︰「自己都知道劇裏面個角色，同以往演開嘅好唔同，會有好大突破，但因為撞咗其他 job，惟有推咗套劇囉！其實推咗個角色，自己都有種奇妙嘅感覺！（接咗咩 job要推劇呀？）咁我又未知住，因為公司安排，我真係覺得個角色係好好玩㗎。 Anyway，因為《星》最後兩集喇，我會花多啲時間去揀歌同練歌，希望做到水準。」有大後台錫住，冇咗個男二，當輸粒糖贏間廠囉！
「部頭」頂替「親生仔」
第十七期藝員訓練班出身的黃嘉樂，現時為無綫部頭合約男藝員，入行至今演出 40部劇集，但多年來大多只飾演閒角，作品有《古靈精探 B》、《舞動全城》、《盛世仁傑》等等，而電影方面，為人熟悉的只有葉念琛《我的最愛》，今次冷手執個熱煎堆，都有可能跑出㗎！
執 Fred攤
黃嘉樂承認頂替 Fred的角色，仲好大方說︰「同事做唔到，我做都好正常，公司安排啫。」
連踩 2日玩公投
《星夢傳奇》最後五強將進行最後 2場總決賽，分別本週六、日（ 12日和 13日）。 12日當晚不設「觀眾評判團」， 5位參賽者各自演唱一首歌，再由 4位「星級專業評判」選出表現最差一位淘汰，餘下 4位順利晉身「第二回合」比賽。最後四強在 13日的總決賽，要得到觀眾支持票數，由觀眾一人一票選出最後冠軍人選。當晚各位專業評判亦會選出心目中「最佳表現」的參賽者，頒發「專業推介表現大獎」。
|
鍾意就快D Share啦！
|
|
|
