熱爆娛樂: 被收聲　許亦妮嗲錢國偉兇收口　寸嘴 Barbie：許亦妮,錢國偉,MF,

2013年11月20日星期三

被收聲　許亦妮嗲錢國偉兇收口　寸嘴 Barbie：許亦妮,錢國偉,MF,

寸嘴 Barbie雖然出名寸嘴，但面對導演「收口令」，當然唔想被封殺，但都直言片場入面個個「尊敬」許亦妮。

真面目

被收聲　許亦妮嗲錢國偉兇收口　寸嘴 Barbie：𠵱家啲港姐大曬！

《夜蒲 3》自開拍以來是非多多，先係擔正的陳靜 DaDa退出，搞到要臨時易角，換上許亦妮頂替。之後又爆出許亦妮搭上有米高層盧啟邦，欺淩戲中一班𡃁模，被狂數扮大牌、呼喝新人、搶戲服和卸膊四宗罪。

文凱玲 Connie、寸嘴 Barbie夏尉喻、雨僑和何佩瑜 Jeana齊齊受氣，原本眾女齊齊指證，但劇情峰迴路轉。據聞帶頭數爆許亦妮的文凱玲，已被禁出現電影宣傳，導演錢國偉亦向各人出「封口令」，唔怪得被許亦妮屈偷睇電話信息的寸嘴 Barbie，都笠曬水，不過都忍唔住：「𠵱家啲港姐真係大曬！」

最近爆出許亦妮（ Whitney）搭上有米高層男友，成功由女主角再升呢做「老闆娘」，片場打橫行，被戲中一眾𡃁模逐一數臭。受害人之一的文凱玲，更大爆被 Whitney搶過兩次私夥衫，其後寸嘴 Barbie、雨僑和 Jeana都一人一句加多腳。不過，據知導演錢國偉講到明自己偏幫許亦妮，下令所有女演員收口，而文凱玲更首當其衝，「被消失」各宣傳活動。

許亦妮擔正《夜蒲 3》女主角，又有富貴男友撐腰，家下導演又力撐，就算在片場蝦蝦霸霸，其他配角好似 Barbie都只能啞忍。

Barbie在《夜蒲 3》與港男吳雲甫有激情肉搏場面，要裸露上身，首次大膽演出，當然怕被封殺，最怕就梗係 cut戲啦！

行先死先

「自從 Connie（文）同報紙指證 Whitney，錢國偉同伍健雄（監製）即刻落咗 order，唔畀 Connie出席所有《夜蒲 3》嘅宣傳活動，擺明攞 Connie開刀殺一儆百。雖然個個都知係 Whitney唔啱，但所有演員都收到通知，邊個再講 Whitney壞話，就會同 Connie同一下場！其實最受氣唔係 Connie，有次 Barbie被屈偷睇電話，仲喺片場俾 Whitney呼喝先最慘。」劇組人員透露。

原來， Barbie和許亦妮是共用一位化妝師，當日 Barbie同化妝師在許亦妮身後傾偈，許亦妮忽然彈起身，指住 Barbie大喝︰「喂！你做咩睇我電話？」之後寸嘴 Barbie不停擰頭話冇，仲即時死狗道歉，許亦妮「哼」一聲就繼續化妝。

問到勒令叫一班女星收聲，又封殺文凱玲，錢國偉話文凱玲本身有份正職，可能出席唔到活動，大家明啦！

文凱玲早前大爆許亦妮搶戲服，仲上載一張與許亦妮有米緋聞男友盧啟邦咀面相，公然與許亦妮挑機，宣洩怒火。

片場打橫行

問到被許亦妮呼喝兼被屈，寸嘴 Barbie接受本刊訪問時，語帶不甘地說：「係有呢件事，總之片場個個工作人員都好『尊敬』佢（ Whitney），咁佢係女主角吖嘛！（同 Whitney係咪不和？）公事合作都 ok，不過私底下做朋友都係唔好喇！（佢屈你偷睇電話信息？）𠵱家啲港姐真係大曬㗎喇！」問到 Barbie是否都有收到「封口令」，她只說︰「唉，唔講喇，驚講多錯多！」不過上週五（ 15日），已經被打入冷宮的文凱玲則唔怕死，再度炮轟許亦妮，仲寸許亦妮嗰位富貴男友扮單身溝女。

而本月 7日，許亦妮出席無綫節目巡禮就澄清：「其實件事已經回應過！（話你搶衫又鬧人？）重申一次，所有戲服都係服裝指導安排畀我！唔想再回應。」

而被指下令一班女星收聲，上週五（ 15日），錢國偉對本刊說：「佢（ Connie）有份正職，可能有啲宣傳活動出席唔到啫！（唔畀佢出席？）都有預埋佢。（係咪邊個再講 Whitney壞話，就 cut曬所有宣傳活動？）梗係冇！」不過家下個個都驚，咁係港姐大曬，定係背後再有高人出手呢？

寸嘴 Barbie因拍《夜蒲 3》與無綫港男吳雲甫撻著， Barbie仲大讚男方高大又 gentlemen。