出錢出力 火併胡軍 劉華吊掛搏老命 劉華,劉德華,MF,

受咗傷嘅劉華為追大賊胡軍，不惜駕車撞向對方架車，再跳車撲埋對方行駛中嘅車度，用力拉實司機位車門。咁危險，唔係個個男明星都肯制。

真面目

出錢出力　火併胡軍　劉華吊掛搏老命

由劉德華有份投資及主演的 3D警匪片《風暴》，將於聖誕檔期上畫。《風暴》亮點除了有連場大陣仗 3D警匪激戰，最激梗係 52歲劉德華親身演繹多場驚險動作鏡頭，跟片中死敵胡軍齊齊搏「老」命鬥個你死我活！好彩拍攝時老婆朱麗倩未有第二胎，否則真係嚇親大肚老婆。

胡軍要捱被劉華架車撞，見到胡軍血流披面，就知最後邪不能勝正，正義萬歲啦！

距離聖誕節還有一個月，將於 12月中上畫，由劉華孭飛嘅 3D警匪片《風暴》已開始宣傳造勢。故事講華仔飾演的警察，同罪犯林家棟，仲有大賊胡軍的恩怨情仇。

主動打真軍

講明是警匪片，由袁錦麟執導的《風暴》當然走唔甩跳樓追車爆炸樣樣齊，不過《風暴》最大賣點唔係槍林彈雨，而係 52歲的劉德華多場親身上陣的驚險場面。當中一幕劉華為追捕大賊胡軍不惜用車猛撞對方，之後更成個人撲上胡軍架車，吊掛車外，冒求將對方繩之於法更是全片高潮，稱得上是劉華入行以來最搏命演出。劉華賣關子話：「嗰場戲係因為我啱啱遇到一個引爆點，最後為咗令對方入罪而走歪路……呢個角色內心有好多不同嘅『風暴』。」胡軍答嘴話：「要被他用車撞，真的遍體鱗傷。」當然唔係真傷啦！

劉華飾演正義警察，而胡軍就飾演曾參與多宗械劫案，兼殺人無數嘅悍匪。二人首次合作，即有火花。

話明警匪梗會有鬧市槍戰場面，其中一幕仲要喺最旺嘅中環畢打街一帶取景，又玩爆炸，當然係後期 CG特技搞掂。

據知，原本動作指導錢嘉樂為呢場戲安排咗兩位替身，但劉華同胡軍為效果好，竟然主動要求親身上陣，連錢嘉樂都嚇一跳。劉華講笑話：「因為冇人肯做我替身，個個都去做模仿騷賺大錢，所以我咪自己做囉。」劉華呢個 gag，大家 get到冇？

林家棟　男一變男二

林家棟由男一變男二，於《風暴》內由原本的警察變到飾演罪犯，分分鐘仲唔夠胡軍搶戲，唔嬲就假。

傳聞劉華當初以《風暴》男主角利誘愛將林家棟續約，但最後男主角竟由劉華自己做番，而林就慘變男二，令佢心灰意冷，想唔續約。最近二人出席宣傳活動都避開呢個傳聞，不過劉華就為自己由出品人及幕後，變成男一解畫：「開始時我只希望做監製，但後來整個製作愈來愈大，江老闆（安樂影片老闆江志強）希望我能參演，我才答應。」其實劉華做男一，邊會有人反對呀？

鍾意就快D Share啦！

下一篇 》