15/11 10:40am
單手握拳，張開個口，再加青筋暴現， 37歲陳山聰明顯 fit過同超雲拍拖嗰陣，狀態回勇；除咗衫跑，豬腩肉明顯冇咗，但肚臍下的舊紋身一樣冇變。
真面目
充闊佬 住居屋碌過海 陳山聰 chok跑富豪徑
曾經跟賭王千金何超雲戀愛大過天的陳山聰，高調拍拖 2年，但 5月正式被超雲狠撇之後，「潮山聰」風光不再頓成「樵山聰」，近月港澳兩邊走的他，曝光率明顯比風光時下跌一大截。
不過掛住賭王千金前度個名，山聰依然可以繼續撈版位。上週一（ 11日）山聰突然出席舞獅公開活動即成傳媒焦點，他更大曬瘦身成果，揚言要參加今年的全馬！
上週五（ 15日）本刊發現陳山聰從九龍灣居屋竇出發，開近半小時車往中半山寶雲道跑步。嗰度係唔少巨星富豪跑步勝地，大費周張過海操 fit，睇嚟陳山聰仍然懷念在高尚地區出沒的日子喎！
37歲陳山聰與超雲拍拖 2年過足富豪生活，可惜年初超雲在微博透露「 Love=Money」之後，二人戀情亦同時玩完，陳山聰馬上打回原形，搬返九龍灣居屋舊居麗晶花園居住。
減肥做 buyer
分手初期山聰甚少外出，附近鄰居更透露山聰寧叫外賣都唔出街，不過長期踎喺屋企坐食山崩唔係辦法，約 3個月前，山聰已經自信返曬嚟，並加入時裝公司任職買手。「山聰𠵱家做緊嗰間公司，個老細識佢，都係因為超雲，你知山聰把口啦，要喺出面搵份工唔算難，加上佢對潮流確係有認識，聽講佢𠵱家都做得幾開心。」
山聰上週一（ 11日）忽然出席舞獅活動，被問到幾時返無綫拍劇？山聰正經答：「其實自己有工作，同娛樂圈冇關，喺生活體驗上想試嚇唔同嘢，唔係自己生意，係打工！至於拍劇就隨緣啦！」據知 TVB高層樂易玲和陳山聰確曾見過面、飲過茶，但山聰暫未有意返回 TVB，「佢話拍劇幾時幾老拍都得，至多角色唔同，但呢啲工作機會冇咗就冇咗。」知情者說。
被指四失的山聰，如今搵到新工作、新財路，惟獨形象和感情未見得人，而且作為時裝買手需要四圍走見人，故返工冇耐，山聰已下決心要跑走豬腩肉。
「呢啲唔講！」
據知陳山聰之前會隔日到寓所附近的運動場跑步練氣，上週一（ 11日）山聰亦對傳媒公開說：「原本係諗住跑步練嚇氣，點知跑跑嚇就上癮，今年報咗『全馬』，係挑戰！」
上週五（ 15日）早上 9時半，陳山聰獨自由麗晶花園寓所步出，再花半小時自行駕車到山頂寶雲道，先在公園做完熱身運動，山聰即圍繞寶雲道跑圈。當日天氣微涼，但山聰依然跑到身水身汗，後來更跑到連衫都唔著。跑了約一個鐘，陳山聰再開車直駛到梅道 1號。據知山聰依然有唔少有米朋友，估計他當時上朋友家借廁所梳洗。
週一（ 18日）下午 2時半，陳山聰獨自駕車返家，其間本刊記者問山聰為何要去老遠的中半山跑步時，山聰亦禮貌回應：「嗰邊空氣好啲嘛！（定係想識多啲有錢人？）唔關事，嗰度都好多婆婆㗎！不過我其實度度都跑嚇。（嗰邊近返工？）工作唔關娛樂圈事，唔講喇！（ keep到身形咁 fit，諗住搵番超雲？）我要跑全馬嘛！冇喇，呢啲唔講。」
明星富豪跑步徑
位於中半山的寶雲道，向來都多明星及富豪到此行山徑跑步做運動，好似周星馳、梁朝偉和徐子淇等，貪嗰度近屋企、空氣好兼人流不多，所以大家得閒去嚇，分分鐘撞到明星！
|
鍾意就快D Share啦！
|
|
|
