[壹週刊 1248] 謝霆鋒降價搲生意 霆鋒,謝霆鋒,M1,

霆鋒為瑞士手錶做代言人，主動力 sell「 PO朝霆」做後期製作，拍廣告不忘傾生意。

探熱針

謝霆鋒降價搲生意

吼啱○三年沙士經濟低迷，謝霆鋒化危為機，開設「 PO朝霆」製作公司做老闆，短短幾年大張旗鼓，業務擴充到上海、北京，並計劃上市。要照顧公司上下過百員工飯碗，身為 CEO的霆鋒甚至做埋 PR，積極搵生意。

早前霆鋒一連兩日為瑞士品牌 ORIS手錶開工拍廣告，廣告由拍攝到後期製作，全由「 PO朝霆」一手包辦，為求一條龍式合作，霆鋒將代言酬金要由八百萬降至五百萬，蝕頭賺尾，寧願自己袋少啲，最緊要幫公司接到大生意！

見招拆招

肥水不流別人田！謝霆鋒孭飛的電影《救火英雄》，戲中所有特技 CG鏡頭，均由他旗下的「 PO朝霆」包辦，成功為公司帶來一筆千萬計的生意，和味！

今次代言手錶廣告，謝霆鋒照辦煮碗，以「一條龍」服務向品牌力 sell，廣告酬勞連製作費，兩嚿錢袋曬。

「單生意係霆鋒傾番嚟嘅！不過個客都好手緊，價錢拉鋸咗好耐，好似霆鋒嘅代言酬勞收開八百萬，最後俾對方壓到得番五百萬，霆鋒肯減，佢話當拉上補下，最緊要公司接到做製作同後期單生意。」知情者說。

自己賺少啲無所謂！但合作過程中，謝霆鋒仍遇到不少阻滯。

一見有記者追訪，霆鋒即刻怒睥鏡頭。

全日面燶燶的霆鋒，對住外籍模特兒視而不見，甚少交流。

霆鋒有份主演的《救火英雄》，戲中有二千個電腦特技鏡頭，全由「 PO朝霆」製作。

「廣告商壓價不特止，仲不停 cut budget，幾萬蚊租個廠拍硬照都唔肯俾，最後要喺拍 tvc嗰陣，喺條街順便影埋相。仲有女主角，對方話要有知名度，提議用吳千語，點知得五萬蚊 budget，最後唯有搵個外籍 model算數。」

有指霆鋒一連兩日為廣告趕工後，便收爐飛新加坡陪兩個寶貝仔過新年。

栢芝帶仔定居新加坡，霆鋒定時定候會飛去當地探仔，早前便被人發現家四口在聖淘沙的餐廳食飯。

貴為 CEO的霆鋒，早前與霍啟剛、陳志雲出席講座，教青少年營商之道。

黑面開工

上週一（一月二十七日）黃昏六點，謝霆鋒現身灣仔海濱長廊開工，當晚氣溫只有十四度，著住西裝的他企街食西北風，除咗埋位照 chok，其餘時間面燶燶，鏡頭前後與外籍模特兒近乎零交流，拍至淩晨兩點，全體收工。

第二晚（二十八日），導演安排謝霆鋒坐上開篷車，在灣仔謝斐道一帶兜圈拍攝駕駛場面，由於有大批 fans聞風而至，部分更不顧危險衝出馬路影相，令現場一度混亂。

為免費時失事，開車兜了幾個圈，導演便勉強收貨，之後有 fans要求合照，謝霆鋒亦充耳不聞，衝出人群，上車閃。

霆鋒揸住開篷跑車在灣仔鬧市取景，被 fans重重包圍，一面不悅。

業主追租

03年，謝霆鋒創辦了後期製作公司 Post Production Office「 PO朝霆」，之後擴充營業，以月租 35萬在銅鑼灣租用四層樓作為辦公室總壇，從事數碼剪接、混音、特效等後期製作的「 PO朝霆」，近年已在上海和北京開設分部，盛傳每年利潤高達億元。

去年七月，公司卻傳出欠租消息，被業主入稟高院，指「 PO朝霆」拖欠 81萬租金，要求收樓及追討欠款和利息。事後公司表示只屬一場誤會，強調無任何財政壓力。

鍾意就快D Share啦！

下一篇 》