昔日身高 5呎 5的梁潔華十分圓潤，有點雙下巴，點都有 120磅，現在瘦剩 98磅。
滾熱辣
梁潔華暴瘦至 98磅 黃日華：佢要吊營養奶
去年尾，黃日華太太梁潔華因患上壞血病，在浸會醫院接受化療，至今一直未有露面。本刊收到消息，近日暴瘦了廿幾磅兼甩髮的梁潔華，已轉到沙田威爾斯醫院就醫。為免愛妻舟車勞頓覆診，黃日華更秘密在沙田凱悅酒店長租一個高層房間，讓老婆靜心療養。
連日來，黃日華父女車輪轉到酒店照顧梁潔華，又在酒店停車場租了個月租車位，方便出入。被問到太太激瘦，黃日華說：「最瘦 98磅……佢要吊營養奶。」
連日所見，黃日華與愛女黃芷晴頻頻撲撲到沙田凱悅酒店，輪班探望及照顧梁潔華。上月 28日，記者目擊黃芷晴出席完一個公開活動後，悄悄坐的士，前往沙田凱悅酒店，在後門側邊的酒店職員入口處閃身入內，直到深夜也未離開。
坐的士避記者
至於黃日華的座駕，則長期停泊在酒店的月租車位內。但他為了避開記者耳目，連日來都沒有駕車，反而在大埔寓所坐綠 van，然後轉乘的士到酒店。臨入酒店前，他更吩咐司機在附近多兜幾個圈，確定沒有記者，才悄悄在後門或側門下車，警覺性甚高。除了黃日華外，好友兼鄰居的「三嫂」戚美珍及親友探梁潔華，都在凱悅酒店停車場的後門靜雞雞上房探望。
甩髮戴帽暴瘦
消息人士說︰「華嫂（梁潔華）之前雖然出咗院，不過以前佢一頭濃髮，依家就甩咗好多。原本一百二十幾磅，幾好肉地嘅佢，依家得番九十幾磅。
「華嫂依家因為要定時去醫院打化療針，身體咁弱，華哥唔想老婆咁頻撲，加上之前寓所有好多記者等，怕太太出入唔方便，咪決定喺醫院附近租間酒店房俾太太休息養病囉。華哥好好，差唔多日日煮嘢俾老婆食。個女得閒就去陪阿媽，仲安排咗個菲傭廿四小時照顧。佢哋揀凱悅酒店都係貪呢度同威爾斯（醫院）近，車程幾分鐘就到！」
本周三，黃日華到九龍灣公園踢波，記者上前訪問。問到他的太太身體如何，黃日華說︰「 OK，進展好好，一個月做一次療程，仲有兩次化療，完曬後再抽骨髓，冇事就康復。不過依家每個禮拜都 check血色素同白血球嘅度數。佢次次做完療程都好攰，我會特別小心，每次出入都戴口罩，因為佢抵抗力好弱，易受感染。」
問到是否避記者耳目刻意不駕車時，他無奈笑笑沒有回答。記者追問︰「哦！你係坐村巴離開嗎？」黃日華笑笑點頭：「你哋話呢！」再追問他是否將太太搬到沙田凱悅酒店養病。他支吾以對，只說︰「只係想佢靜靜養病。」
問到太太是否甩頭髮及暴瘦，他說︰「冇！磅數好正常，都係一、兩磅上落，依家肥番。（咁最瘦幾多磅？） 98磅。之前要吊營養奶，吊完肥番，依家 103磅。（聽講話佢甩頭髮喎！）咁做親呢啲（療程）都會。我𠱁佢醫生話出番（頭髮）嚟仲靚，只要佢喺我心目中冇變咪得囉！」
問到有傳三哥及劉華出錢出力為梁潔華醫病，黃日華一笑置之︰「佢有保險㗎嘛！依家係全 claim，好彩佢份住院夠啫！（係咪轉咗威爾斯）冇！浸會嘅醫生同護士好好，一直都喺嗰度，冇轉。」
據知華嫂雖然身體較虛弱，但療程十分順利。不過，有好老公、乖女兒及老友支持，相信華嫂有足夠正能量去與病魔對抗。
華嫂 病情反覆
黃日華太太梁潔華去年接受化療，後來發燒再度入院。雖然黃日華與女兒黃芷晴均否認梁潔華病重，但久未露面的她，健康情況令人關注。
13年 11月 驚爆血病
黃日華的 54歲太太梁潔華去年 11月底，傳患上急性重病，要入住浸會隔離病房及接受化療。黃芷晴強調媽咪並不是患血癌，亦指母親是在 13年 12月中才病發。
14年 1月中 聲稱出院
黃芷晴表示梁潔華康復情況理想，並已經出院，但需要定期檢查。她更直認母親患的是壞血病，但表示母親可在半年內完全康復。
|
鍾意就快D Share啦！
|
|
|