探熱針
四洲太子女打本睇鋪 黃宗澤光速換畫
二月初驚爆「崢澤戀」後，楊崢的臭史傾巢而出，加上澤媽嫌棄，令黃宗澤「棄械投降」，即閃！
走得快，好世界！據知飛走「老楊」後， Bosco話咁快已將四洲太子女戴凱欣（ Kennis）黐上手，一齊合資在九龍城開甜品店，攞正牌拍住上。
旅行氹阿媽
黃宗澤瞞住阿媽同楊崢拍拖，無法接受兒子「多個阿媽」，澤媽激到血壓升見暈，兩母子更發生爭拗。唔想進一步傷害母子感情， Bosco最終投降，同楊崢「拜拜」。
「 Bosco一向孝順，佢見澤媽今次企得咁硬，知道冇商量，所以即刻同楊崢斬纜，仲請阿媽去旅行，氹老人家開心！澤媽雖然冇再嬲個仔，但上星期臨去旅行前，仲千叮萬囑 Bosco唔好趁唔喺香港玩翻撻，否則兩母子都冇情講。」知情者說。
早前有報導指 Bosco有計劃和楊崢合作開餐廳，因為女方沒有否認，一度令外界以為「崢澤戀」仍未了斷。事實上， Bosco再開餐廳確有其事，但合作對象則另有其人。
十足女主人
今個星期一（三月十七日）下午五時，本刊到九龍城南角道 Bosco與四洲太子女戴凱欣合資的甜品店「笑甜甜」查察，當日雖然是甜品店開張大日子，為了低調起見，店內外均沒有放恭賀花牌。
記者走入甜品店，服務員熱情招呼，並表示「笑甜甜」的老闆與隔籬的蠔吧「 Oyster Mine」同一老闆，即是 Bosco。
晚上八時多， Kennis（戴凱欣）同友人坐七人車到，招待完朋友試甜品後，再帶他們到蠔吧介紹一番，如同女主人一樣。朋友離開後， Kennis留守甜品店，直到閂門，再跟員工食埋消夜，接近淩晨二時才離開。
一鋪一拍檔
「 Bosco之前喺九龍城開蠔吧，餐廳刻意冇甜品供應，因為佢早就諗咗要喺蠔吧附近開甜品店，佢話咁可以做到一站式服務，因為喺同一條街，客人唔會覺得唔方便。 Bosco都知自己資金有限，所以每次開餐廳都會泊多個碼頭，好似蠔吧有餘小雅（曾與 Bosco傳緋聞的酒吧老闆娘）撐住，甜品店就有四洲太子女 Kennis。」知情者說。
歐洲洗底
有得有失！搭上黃宗澤，令楊崢人氣翻幾番，曝光高，身價升；可惜人怕出名，一籮臭史，同樣被翻箱倒槓。
「崢澤戀」快來快去，楊崢絕對贏頭輸尾！據了解，楊崢下月便會出發歐洲，在當地留數月試菜，為下一本美食書做資料搜集，順便暫避風頭。
做唔到澤嫂，做番才女洗底。
兩個月搞掂
據知， Kennis與 Bosco認識已久，不時也會約埋飲酒耍樂。「佢哋有班朋友玩開嘅，每次出嚟， Kennis都鍾意黐住 Bosco，飲多幾杯就會繑住， Bosco亦會送佢返屋企，圈內人都知 Kennis勁冧對方， Bosco咁精，梗係唔會抗拒仲講話自己想開甜品鋪，問 Kennis意見， Kennis聽到就話要夾份，連自己想搞嘅 cafe都放埋一邊。話咁快，搵鋪連裝修唔使兩個月搞掂曬，甜品店嘅裝修同 Kennis喺廣州間 Mori Cafe好似。」
短訊轟炸
雖然 Bosco聽阿媽話，但被「快放」的楊崢，卻不甘被判「即時死亡」。
「楊崢不停電話同短訊轟炸 Bosco，但澤媽係 Bosco生命中最重要嘅女人，佢唔會為咗個女人唔要阿媽，加上佢嗰排趕劇，所以都冇理到；楊崢見 Bosco無聲無氣，知復合無望，最近都冇搵 Bosco。」知情者說。
Bosco走佬！楊崢連商台開咪份工都冇埋！
「佢開咗咪年多，但都係計日薪，雙方一個星期通知都可以唔做或者換人，而家商台換咗阮兆祥頂佢，《一圈圈》啲訪問生鬼好多。佢自己都知會咗商台話唔做，要去歐洲幾個月喎！」知情者說。
追星戀
一向鍾意追星的戴凱欣（ Kennis）是全國政協委員、四洲集團創辦人戴德豐之女，多年前已插手家族生意，是 ball場常客，更鍾意埋明星堆，常與名人傳緋聞。
|
鍾意就快D Share啦！
|
|
|
