左麟右李開十周年巡迴，走埠場數更愈傾愈多，無理由為義氣，有錢唔賺。
探熱針
搵錢緊要 世界盃救亡 麟李拒幫無綫講波
為挽救持續下滑收視，成功奪得今屆巴西世界盃香港獨家轉播權的無綫，半年前已遊說左麟右李擔任世界盃首席主持兼唱主題曲。一向同無綫感情深厚的李克勤，原本唔想托手踭，不過撞正今年「麟李」舉行十周年世界巡迴，如果為義氣留低講波，保守估計會損失 2,000萬收入，連經理人公司藝能亦下令禁止麟李做講波佬。搵錢行先，即使無綫出動阿叻同曾志偉做說客，一樣無面俾。
飛巴西撐場
本身是曼聯球迷的李克勤，睇波一直是他最大娛樂，四年一度的世界盃，又豈能錯過，克勤甚至一早安排好，帶埋老婆、老豆、外父飛去巴西，現場欣賞世盃冠軍大戰。
「其實兩年前，克勤已經 plan咗會同老豆、外父，帶埋兩個仔同老婆，三代同堂飛去巴西睇波，佢哋成家人都鍾意足球，好享受現場睇波嘅感覺，呢次巴西之行就連阿倫都會一齊去！」克勤友人說。
一雞兩味
至於另一邊廂，成功奪得今屆巴西世界盃獨家轉播權的無綫，原來早於半年前開始籌備節目時，便鎖定搵左麟右李擔任首席主持，除派出綜藝部門總監余詠珊做說客，更出動阿叻曾志偉落嘴頭。
「除咗有專業足球旁述，無綫希望搵有知名度又熟悉足球嘅人講波，加添娛樂性，左麟右李入曬屋，克勤講波又經驗豐富，點計都係最佳人選！」知情者說。
除了做主持，無綫見以往克勤主唱的世界盃主題曲《球迷奇遇記》、《 Victory》獲球迷受落，希望照辦煮碗，邀請麟李主唱巴西世盃主題曲。
「係人都知無綫出手低，搵外援幫手，騷錢多極得嗰幾千蚊，今次對麟李算闊佬，坐足成個月做主持，唱埋主題曲，一雞兩味價出到過百萬。」知情者說。
自去年底完成十三場左麟右李十周年香港演唱會，今年三月便開始世界巡迴演出，地點包括南寧、北京、上海、杭州、深圳、溫州、星馬、澳洲、美加及澳門等地。
「克勤一直都撐無綫，佢都好想幫手講波，但巡迴騷一早傾好曬，佢公司藝能嗰邊點都唔肯放人，始終講緊成二千萬嘅收入，就算出動到阿叻、志偉幫口都無用。」知情者說。
連克勤都唔撐，據知阿叻將頂替麟李做星級主持，旗下藝員無論識唔識講波，都要輪流出鏡做客席嘉賓，無綫想靠世界盃挽救收視，睇怕難上加難！
眾叛親離
TVB氣勢大不如前，雖然還是一台獨大，但號召力已今非昔比。
《勁歌》沒落
以往粒粒巨星的《十大勁歌金曲頒獎禮》，全盛時期有四大天王、王菲、鄭秀文等天王天後撐場，但自 09年無綫與四大唱片就版稅問題鬧翻，星光場面從此不再，加上無綫硬益自己友林峯以及「巨聲幫」攞獎，公信力及收視已大不如前。
|
鍾意就快D Share啦！
|
|
|