GiGi睇中醫心急求子
【銅鑼灣】梁詠琪（GiGi）後日便38歲，她與西班牙籍老公Sergio結婚近三年，一直恨生BB，可惜肚皮唔爭氣。據悉GiGi近年四出搜集懷孕偏方，昨日好姊妹關心妍出席活動時踢爆她飽覽育嬰書，又每日吃黑糖進補，前日GiGi在老公陪同下秘密到銅鑼灣中醫診所調理身體，穿上平底鞋、鬆身衫的她不時蹺手遮肚，孕味甚濃，相信好快便會傳來好消息。
相信梁詠琪今年的生日願望就是盡快有喜，皆因她去年開始體重暴增，已先後多次被誤傳懷孕，可惜每次都令大家空歡喜一場。後天便是GiGi的38歲生日，深知自己已屬高齡產婦，近年GiGi十分積極尋求偏方懷孕方法，日前她與楊千嬅在北京出席電影《香港仔》記者會時，千嬅提起當年收到一位剛生完BB的排舞師送贈的驗孕棒後，不久便懷孕，GiGi聞言即躍躍欲試。
■恨生B的GiGi前日在銅鑼灣睇中醫，離開時穿上平底鞋的她沿途蹺實老公，十分小心。
做針灸療程
前日下午1時許，GiGi離開中環寓所，登上七人車，由助手陪同下直駛往謝霆鋒位於銅鑼灣的錄音室。GiGi在錄音室逗留約三小時後離開，但她沒直接回家，而是到附近香港大廈內的報德善堂中醫診所，GiGi為掩人耳目，刻意經後巷搭電梯，對地形非常熟悉，似乎非首次求診。GiGi在診所內進行多項療程，從門隙中見GiGi正在施針，可能等得太久，GiGi的助手先行離開，而GiGi老公Sergio約7時到達，並攜著兩包飲品，被問是否做治療？他緊張地說：「No,no,no.」據悉該中醫診所由林顯增醫師開設，善用針灸、燒艾等治療，林顯增約7時半出門外了解，被問GiGi何事求診？他笑笑口說：「我哋唔方便講。」及後記者再致電查詢有沒有懷孕偏方？負責人表示沒有，強調要懷孕必先調理好身體，相信GiGi也深明此道。
■GiGi在中醫診所內針灸，幫助調理身體。
■做完針灸，GiGi與老公齊齊步出門口。
■GiGi等老公出車，其間蹺手似護肚。
經過兩小時治療，約晚上9時，GiGi與老公拖手離開，問GiGi是否有病？她說：「唔係。」今年生日願望是否生仔？她笑著說：「想膊頭快啲好番，𠵱家好痛。」見Sergio全程好緊張老婆，雖然GiGi穿著平底鞋，但Sergio好像照顧大肚婆一樣，上落幾級樓梯都拖到實，而GiGi到停車場取車時，不經意蹺手遮掩肚皮位置，她說：「你哋去食飯啦，冇嘢影㗎嘞！」顯得避忌，之後由Sergio駕著Mini Copper直駛返寓所。
GiGi昨在電話中被問是否要調理身體生B？她說：「我最近有肩周炎，嚟緊要做宣傳，想快啲醫好佢，如果唔係坐飛機腰骨又痛，膊頭都會影響做嘢。但去開睇中醫，點都會問埋調理身體，係正常保健嘢。」幾時有喜事宣佈？她說：「順其自然啦，忙埋電影宣傳，之後休息嚇，就睇嚇體力……哈哈再決定。」
飽覽育嬰書
另外，GiGi的好友關心妍（Jade）昨日在青衣出席慈善跑，她直言與GiGi一樣想生仔，Jade說：「GiGi好專業，成日睇書（育嬰書），佢有送書又送黑糖補給品畀我，我都好乖日日飲，我哋睇完書都會交換心得。」
GiGi未懷孕已博覽育嬰書，莫非她好心急？Jade說：「每個女人結婚後，都想生BB，但最急嘅時間已經過咗，老爺奶奶唔再催喇。情人節老公送咗隻狗畀我，叫Butter，等佢頂住先，造人計劃唔會放棄，不過需要時間。」Jade也有關心前老闆羅傑承的官非，表示有短訊問候羅太梁芷珊。
採訪、攝影：梁繼光、潘冠恩、楊浩賢、朱志聰、卓寶花
■關心妍昨日爆GiGi每日食黑糖進補。
|
鍾意就快D Share啦！
|
|
|