掃呢頁CODE去手機

2014年5月16日 星期五

[忽然1周 981] 雙雄對決 甄子丹票房冰封 張家輝片酬升溫 子丹,張家輝,家輝,甄子丹,MW,




媽咪姐

雙雄對決 甄子丹票房冰封 張家輝片酬升溫

正所謂時勢造英雄。幾年前流行功夫武俠片,全世界最好打嘅甄子丹憑《葉問》鹹魚翻生,片酬愈升愈有,去年就以 3千萬人仔接拍《冰封俠:重生之門》。不過套戲喺黃金周上映,截至周日( 11日),香港嘅票房只係收近五百萬(香港影業協會提供)。套戲拍咗兩億,投資者蝕入肉就梗㗎喇。但丹爺拍呢套戲落足心機,仲身兼埋動作導演,設計動作之餘仲度橋,觀眾唔 buy都冇法!

其實《冰》片已一口氣拍埋下集,媽咪姐收到風,丹爺見到票房如斯慘淡,提議煞停上映下集。投資商梗係唔制啦,反正單係下集都拍咗成八千萬,點都要博一鋪!

觀眾唔吼

《冰》片拍攝時新聞多多,丹爺仲鬧政府唔支持電影工業,搞到電影公司再揼錢搭青馬大橋場景。雖然佢講嘢有道理,但由於劇本唔掂,得唔到觀眾支持。

連仆兩套

除咗《冰》片,丹爺舊年同陳妍希談情嘅《在一起》(圖)以及舊式動作片《特殊身份》都被網友鬧過膠,搞到票房一般。不過丹爺一早簽落嘅《臥虎藏龍 2》 8月開拍,睇嚟有轉機。

宇宙最強票房唔掂,不過張家輝就大把世界。媽咪姐收到風,張家輝上個月拎咗金像獎影帝後,當晚即刻嗌加價。五年前收八百萬嘅佢,前年拍《激戰》嗰陣已經加到成千萬,家陣再加到千二萬,仲要鐵價不二,邊個都冇情講。

雖然片酬係咁加,依然大把人爭住搵佢拍戲,事關佢請咗個高人同佢改劇本。聽聞個高人仲改得幾好,劇本經呢位隱世高人點化之後,套戲喺香港至少收二千萬。加上家輝喺片場好鬼識做,唔會頂撞導演,難怪長拍長有。呢啲咪英雄造時勢囉!

擸獎加價

張家輝憑《激戰》第二度封金像獎影帝,事後佢連踩兩場慶功之餘,竟然仲有心神諗加片酬,認真誇張。

輪住出戲

片酬加到千二萬一部,但張家輝已經落實今年接多兩套戲。早前拍落與鄭秀文合作嘅《失戀急讓》同自己執導嘅《盂蘭神功》又嚟緊上畫。會唔會飽得滯!



鍾意就快D Share啦!