劇集《使徒行者》舉行慶功，千語 BB以女主人身份踩場。
探熱針
林峯請客 千語 BB女主踩場
佘詩曼回歸無綫的頭炮劇集《使徒行者》終於關機，上週六（五月三日），劇中演員拉隊到西環烚嚇烚嚇搞煞科飯局，三位主角林峯、阿佘及三哥苗僑偉夾份做老細埋單。
被阿佘踢爆會到現場探班的千語 BB，當晚亦以三分一個女主人身份，蒲頭踩場。
親自清場
當晚除了三位負責俾錢找數的男女主角，劇中一班演員包括陳敏之、梁烈唯、江美儀等都有出席。
飯局開始前，林峯等先與到場採訪傳媒傾偈，其間提到女友吳千語，林峯冧住話未來只會一年拍一套劇，因為要留番更多時間陪 BB。
做完訪問，林峯為打發一直在外守候的十多名粉絲離開，親自陪住眾人落樓，再逐一傾偈簽名影合照。
傳媒和粉絲悉數離開，清場後，林峯第一時間急召 BB；過了不久，便見到著住白色低 V衫襯短裙的吳千語，坐保母車到場。
唔敢飲酒
烚足四粒鐘，一行人決定再轉場到「尚膳坊」劈酒，聽見要「劈酒」，千語 BB更加唔放心，繼續跟隊做「跟得夫人」。據知，被千語 BB人盯人全面監控的林峯，全晚滴酒不沾，同其他女演員更加保持距離，超級規矩。
「聽到話要去飲，吳千語梗係唔走跟實嗰晚咁多女演員，有啲仲同阿峯傳過緋聞，點知飲咗酒會點呀！啲人笑阿峯中咗降，其實都係㗎，開工嗰陣吳千語耐不耐就蒲頭探班，喺現場個個見到佢叫『阿嫂』，俾著以前，阿峯根本唔會容許啲女喺做嘢嘅地方出現，所以呢個女仔都真係好有辦法，拑得阿峯好緊。」知情者透露。
在「尚膳坊」監場一段時間，千語 BB見男友依然保持清醒，終於安心走先。離開時因為落住毛毛雨，體貼的林峯一手擔住遮一手搭住 BB膊頭，護送女友上車後折返餐廳，一班人劈到淩晨一點半才相繼散。
|
鍾意就快D Share啦！
|
|
|
