媽咪姐
星級世界盃 邊個堅識波？
Yo！ 4年 1度嘅世界盃又嚟喇！嗱，老老實實，媽咪姐唔算係 super球迷，但憑著對 honey嘅一份真愛，都做咗唔知幾多晚「陪睇員」，嗌到聲都沙埋。足球，已經變成我嘅朋友嘞！正所謂開心要 share，梗係搵班明星藝人一齊講嚇波經，估嚇波衫，睇嚇邊個堅識波！以為 C朗係西班牙嗰啲，開波前唔該溫嚇書先！
溫碧霞美斯變柏斯
呢件藍白色波衫真係好易估，美魔女溫碧霞諗都唔使諗就答到係阿根廷，但係問到佢知唔知有邊個當家球星就即刻露餡，口快快答咗句：「柏斯！」嘩！連阿根廷球王美斯個名都記錯，認真唔掂！佢仲話其實以前好鍾意睇碧咸，依家佢退咗休所以冇咩留意，果然女人係睇靚仔先！
蔚雨芯靚仔行先
魔鬼胸 Rainky（蔚雨芯）話自己唔識波，俾咗件波衫佢， Rainky仲𠱁記者俾貼士，不過佢都係將呢件德國隊波衫講咗做法國隊，仲話：「其實我係好靜嘅女仔，以前都係陪屋企人睇，今屆世界盃都會試嚇睇，可以睇嚇靚仔嘛。」
黃又南西班牙變葡萄牙
一聽到話要考認波衫，又南即刻話：「睇開足球嘅我，大家都知我好熟」講完自己都忍唔住笑，揸住件衫，估完葡萄牙之後，先估中係西班牙。其實一睇心口個金色 logo就應該知係上屆冠軍球隊問佢知唔知西班牙有咩球星呢？要媽咪姐放曬水，俾美斯、 C朗、費拓佢揀先估到，咁大路都唔識，又南你真係要惡補嚇喇！
楊愛瑾認住兩個 C
估唔到 Miki（楊愛瑾）都幾醒，拎咗件波衫上手就話：「唔知『都 Min俊 C』會唔會踢波㗎呢！」擺明認得出呢件係韓國隊波衫咁噃！佢仲話：「其實我唔係好識波，我唯一識嘅得 C朗，不過嚟緊世界盃會同朋友出街睇，感受嚇吖嘛！」
官恩娜波中有愛？
Ella一嚟就估到呢件係法國隊嘅波衫，仲認叻咁話：「其實一拎出嚟我就認得隻公雞，同埋個 tag有法國國旗。」見佢好似好熟足球咁，但問到法國有咩球星？佢就無厘頭咁話：「足球我真係唔熟，不過我可以同佢哋講句示愛說話 je t'aime pour toujours。」 I love you forever？咁都俾你兜到，俾個叻你！
森美諗多咗嘞！
我哋俾咗件哥倫比亞波衫俾森美估，佢一嚟即刻話：「件波衫又黃又有個『 porn』字，咁色情嘅！」其實人哋成句係「 unidos por un paí s」意思係「國家團結」，男人果然係諗呢啲先！不過問到佢會唔會睇波？佢就話睇波係一樣好好嘅親子活動，所以會同小朋友一齊睇呢。
波衫知多啲
唔好以為今年世界盃巴西做主辦，佢哋嘅波衫就一定最好賣，據波衫專門店老闆 Ken哥話：「今屆世界盃最好賣嘅係德國同日本波衫，事關呢兩隊嘅款式變動唔大、襟著，所以多人搵啲。」唔講唔知，依家仲有啲波衫出埋女裝 cutting，件衫修曬身，唔怪得之有咁多女仔嚟買啦。呵呵，媽咪姐都買番件襯嚇 honey先！
服裝提供： Kitroom Sports
|
鍾意就快D Share啦！
|
|
|