媽咪姐
哀悼巴西 群星倒數世界盃
睇件波衫，就知媽咪姐係德國隊 die hard粉絲啦。 Yeah，我哋順利殺入決賽，努力！加油！全能足球萬歲！不過咁，周三（ 9日）四點爬起身睇波，見到巴西喺上半場未過一半已經兵敗如山倒，輸成 5粒咁多，真係即時醒一醒，再拍嚇自己塊臉，懷疑係咪發夢㗎！
唉，輸波事小，但巴西今勻係恥辱性大敗，埋單輸 7比 1，仲要係主辦國，真係傷心死一班巴西躉，圈中好多藝人都喺網上哀悼巴西，喊曬口㗎。正所謂「失敗乃成功之母」！媽咪姐就搵咗最近出嚟講波嘅隱世好波之人林敏驄，同大家分析嚇巴西大敗原因同世盃走勢（ P. 22仲有珊珊波經），陪你倒數！
林敏驄：「大菲（巴西領隊 Luiz Felipe Scolari）衰格囉！揀人揀埋啲廢柴。你知唔知點解？因為兩年前洲際國家盃，佢哋贏咗嘛！贏得好漂亮，尼馬光芒四射，又劏咗前冠軍西班牙，咪心雄囉！以為用番原班人馬依然夠殺。（咁你有冇買波？）我中咗 7場波膽啦，已經買咗兩個島啦，點知俾個死大菲斷我條纜。（買咗兩個島？）一個係搵我唔到，一個係搵我唔 Q到！」
查實波已輸，草已鋪，林敏驄話家陣疊埋心水捧阿根廷。「邊隊有冠軍相？我梗係想阿根廷幫南美隊報仇啦，不過嗰邊又係得個美斯，後防危危哋，過到荷蘭，都未必過到德國！」
Chilam開口中
Chilam張智霖喺周三（ 9日）嘅個唱度（《媽咪姐 Chilam開騷俾女摸 靚靚爆喊監場》有全版報道！），講起巴德大戰，亂噏話全場入波至少有 5球以上。結果，佢個髮型師跟住買，中咗 125倍獎金呀！
|
鍾意就快D Share啦！
|
|
|
