今日已變為肥師奶的吳茜薇周一（ 21日）接受本刊訪問。提起過去十一年有老公等如冇老公，兩女有老竇等如冇老竇的日子，十分無奈。
滾熱辣
招振強出走 11年突嗌離婚 吳茜薇：佢大陸唔止一個女人
87年憑處境劇《城市故事》「蚊豬」一角彈起的吳茜薇， 92年下嫁金牌監製招振強後便宣布息影，並誕下兩女。
事隔 20多年，原來吳茜薇和招振強經已此情不再，二人正在搞離婚。據知十一年前已離家出走、多年來隱身於內地的招振強，前年忽然發律師信俾吳茜薇要求離婚，更反指對方收埋兩個女，令他不能盡父親責任。
多年來要獨力湊大兩個女的吳茜薇，其實已經接受冇老公的事實，如今又被離婚官司困擾，逼使她向本刊控訴招振強掟家用落地、招惹小三小四、懶理大女死活等罪狀。一個大好家庭被摧毀，吳茜薇哭着說：「只怪我睇錯人，佢大陸唔止一個女人！」
當年外形嬌滴滴的吳茜薇，如今經已變成 49歲的脹爆師奶。 92年下嫁招振強後，便決心退出娛圈，全職湊女。旁人以為她家庭生活美滿，但 03年沙士，改變了她和招振強的夫妻關係。
當年香港電視圈一片死寂，招振強有樣學樣北上搵食，點知一去冇回頭。吳茜薇對本刊記者說：「嗰年之後，佢攞番嚟屋企嘅錢唔多。喺大陸返嚟兩個月之後，又話接到 job再上去（北上），唔輪到我俾唔俾佢上去㗎！嗰時開始，招生已經唔似係我識嘅一個人。」
掟家用落地
招振強北上後只每隔幾個月返港一次俾家用，當時要照顧兩女生活的吳茜薇徬徨無助，但又唔敢向家人求救，「我當初完全唔聽父母勸阻去嫁招生，有困難時邊好意思同佢哋講。」為了生活，即使招振強亂發脾氣，吳茜薇只好忍氣吞聲。「 04年開始招生俾家用唔定時。 06年佢返咗嚟一次，我話冇錢，問佢攞家用，佢掟錢落地俾我。我又冇做錯嘢，我問你攞家用啫！你唔使掟俾我呀！幾千蚊都掟落地下，跟住鬧我黐線，特登開大度門俾隔籬鄰舍聽。我當時都有名氣，雖然肥咗少少，但都有人認得我㗎嘛！」自此之後，吳茜薇和招振強不相往還，雖然未辦離婚手續，但婚姻名存實亡。
而招振強失蹤期間，最惡劣時期吳茜薇連買奶粉、交學費都冇錢，要靠叔仔及娘家接濟。
懶理大女患重病
自己受辱忍得就忍，最寃枉是兩個女自此沒有了爸爸。吳茜薇苦笑：「最初兩個女返學本手冊，我都要冒簽（父親名）。」她憶述當時母兼父職的苦況時，愈說愈激動：「大女好黐爸爸，以前讀幼稚園返學放學都係爸爸接佢。之後招生去北京唔見咗人，我負責接送。個女因為唔見爸爸發脾氣唔肯拖我隻手，仲大力打我個肚。但半年後有一日佢突然主動拖我隻手，嗰刻我喊咗出嚟。咁細個就要佢哋明白呢樣嘢！真係好殘忍。」說罷感慨落淚。
正當兩個女開始接受沒有爸爸的日子，好景不常， 08年大女 13歲時，突然患上免疫系統急病，要入深切治療部（ ICU）隔離。大女經歷生死邊緣，吳茜薇此時將夫妻情仇拋諸腦後，希望招振強返港見大女。「醫生話佢（大女）好危險，隨時會冇命，我好驚。打電話俾招生叫佢即刻返香港陪個女，點知佢話冇錢買機票喎。佢可以唔再愛我，但唔可以唔盡做爸爸嘅責任。呢次我真正死心。醫生叫我搵佢爸爸簽名時，我話個女冇爸爸。」
收埋多個女人
招振強是金牌監製，當然招惹不少女士埋身，吳茜薇當年曾親耳聽到招振強俾女人嗲。她對此記憶猶新，「佢返咗大陸九個幾月，俾我知道佢有第二個。有日我哋傾電話，佢冇收到線喎，俾我聽到有人講嗰啲嘢（小三嗲招振強）。嘩！聽完之後直頭傻咗，我不停喺電話大喊。依家諗番，唔知係咪佢特登俾我聽。」
現時二人已再冇聯絡，但吳茜薇透過友人得悉招振強在內地繼續風流。「佢喺大陸好多女人，第一個（女人）係好耐之前，依家嗰個已經唔係同一個人嚟㗎喇！」
否認搶莊文清老公
當年有指因為吳茜薇介入，導致招振強和莊文清離婚，因此現在輪到吳茜薇遭內地小三破壞家庭，有網友就揶揄事件是天理循環。她肉緊說：「我唔係第三者，一定唔係第三者。佢同莊文清嗰時已經離咗婚三、四年， 89年招生追我， 90年我先接受佢嘅追求。佢哋結婚到離婚，我都未入行。」當時招振強為了將吳茜薇追到手，更拎出他和莊文清的離婚證明書表示誠意。
現時大女已經 19歲，細女亦 15歲，吳茜薇希望重出江湖。「我兩個女仲要讀大學，父母都老喇！我希望可以重新踏入娛樂圈。肥唔緊要，我可以做細細粒（陳嘉佳）媽咪㗎，鬥肥吖嘛！我可以 keep，但 keep咗靚唔靚得過葉蘊儀，冇人知㗎喎！」
至於身在內地的招振強，對吳茜薇所說還未表態，記者多次致電其手機，但他未有接聽。看來這單離婚 case仲有排搞。
律師：贍養費父母都要負責
失蹤 11年的招振強， 2010年入紙申請與吳茜薇離婚，並以找不到她為由，拒絕俾贍養費。但吳茜薇指招振強多年來拒接聽她電話，也甚少俾家用及照顧兩女。雙方各執一詞，仍在打官司。
有律師指這類官司存在很多灰色地帶。「因為男方有可能證明自己唔係冇做（俾錢照顧）。至於過去 11年冇俾家用同女嘅教育費，依家喺香港嚟講，父母雙方都要負責嘅，或者只會判男方俾番一半之類，但都要雙方講掂數，先至會判。呢類案件通常都有排搞。」
心理學家：單親子女要搵代替
臨牀身心行為學家李寶能，認為出身於單親家庭的小孩，容易因期待有父親或母親而尋找代替的人。他說：「這種本能喺心理學上同行為學上其實係一個好基本嘅概念。單親小孩遇到一啲令佢哋產生安全感嘅人而開心，即使佢哋冇開口叫對方做父親母親，但佢個心都會安定落嚟，呢種係一種替代關係。家長應該好好同小孩溝通，如果處理不當，小孩很易產生自卑或者怨恨。」
吳茜薇入行僅八年
84年，當時 19歲的吳茜薇，參加大台第十三期藝訓班入行，於 87年的處境劇《城市故事》中扮演「蚊豬」角色令她成名。但由於之後缺乏擔正主角機會，她 88年轉投亞視，在《小白龍》一劇反串演男主角。
之後她轉到台灣發展，與姜大衞、李婉華等合演過電視劇《刺馬》。 92年便與招振強結婚，退出娛樂圈生女。
招振強搶手監製
招振強畢業於大台第一期藝訓班，其後他轉投幕後，由助導做起，然後升任編導、監製。他是 80年代的著名監製，製作了不少受歡迎及有口碑的電視劇集，例如鄭少秋的《倚天屠龍記》和周潤發、呂良偉的《上海灘》。
之後轉投亞視，由於電視部人事變動，他很快被解僱。 92年到台灣發展，之後再重返大台，監製由陳錦鴻演出的《新上海灘》。 2000年，他導演過電影《鬼名模》，票房和口碑極差，其後北上發展，但多年來代表作欠奉。
單親女星有排捱
娛圈女星日捱夜捱總望搵個好歸宿，不過萬一嫁錯郎，分分鐘要母兼父職，孭起供養子女包袱。
葉蘊儀
葉蘊儀 95年閃婚退出娛圈，誕下一對子女，不過結婚 4年她發現老公陳柏浩偷食離婚收場。為了獨力撫養仔女，她讀博士課程、藝術等，開設香港黏土藝術學院。前年她更復出拍劇，於大台師奶劇飾演「肥菜」一角。
魔女蒲頭
除吳茜薇外，近年亦有唔少絕跡娛圈多年的藝人忽然蒲頭。有些變為凍齡魔女，有些則成為肥師奶。
莊靜而車房阿太
莊靜而於 80年代曾主演《 IQ成熟時》、《香城浪子》等劇集，更透點拍攝電影《山狗》。 83年她拍電視劇《老洞》與監製招振強傳緋聞。早前她舉家由加拿大回流返港，現為丈夫打理車房生意，持家教女。現年 54歲的她，發福富泰。
苗金鳳至索 old嬋
粵語片紅星苗金鳳，以《一水隔天涯》等代表作轉入電視圈，之後嫁電影公司老闆做少奶奶，經歷兩段婚姻。年過 60的她，早前復出拍劇做惡奶奶，她皮光肉滑加上弗爆的 26吋黃蜂腰，即時彈出。
景黛音防腐 OL
現年 52歲的景黛音，是 80年代花旦，她令人深刻印象有《鹿鼎記》中演建寧公主。她淡出嫁人後轉職保險界，幕前銷聲匿跡廿多年。年前她現身微博，狂 post自拍大頭相，大眼 V面、肌膚嫩如少女。不過早前有雜誌拍得她真人殘爆，指她微博索相全部 PS過。
|
鍾意就快D Share啦！
|
|
|
