設計圖片
滾熱辣
爭演星爺美人魚 Coffee：要我做乜都制
一年前周星馳執導的《西遊．降魔篇》內地票房勁收 12億人仔，他今年再籌拍另一科幻電影《美人魚》，日前更高調在中、港、台進行網上招募。星爺揀女，令不少發明星夢的少女爭崩頭，由 7月 31日至今，已有超過兩萬人報名參加。
因「殘廁 Gathering」成名的 Coffee（林芊妤）亦唔執輸，自小崇拜星爺的她亦決定參加招募，雙腳拗上頭、身體比常人柔軟就是她的賣點，她還力 sell：「點醜我都肯制！」
一向敢於在電影起用新演員的周星馳，今次籌備開拍新戲，由中、港、台三地進行海選，報名活動到 8月 15日截止，並定於 9月 14日由星爺親自挑選 4名女演員參演《美人魚》，預計 2016年賀歲檔期上映。
回顧過去，星爺執導的《功夫》有黃聖依，《長江 7號》有張雨綺，就知道星爺揀女確有一手。據內地劇組人員透露：「周導現在拍片比過往更嚴謹，今次選角不單止要挑美女，更要挑有實力的。雖然片中會一如既往加入大量電腦特技。不過這故事是發生在海中，為求逼真，演美人魚的女角必須懂游水與徒手潛水。」多年前拍《少林足球》時，星爺亦同樣鋪天蓋地搵新人，從過萬人當中選出來的李卉，最後卻只演了一幕踩蕉皮「趴街」的戲，不過依然吸引無數少女爭做星女郎。
瞓身做醜角
要演活美人魚，身體柔軟度高自然勝人一籌。 Coffee（林芊妤）因殘廁「成名」後，現時轉行做全職瑜伽導師，她隨意可舉腳過頭或做出一字馬，坦言不介意為星爺演一條極醜的美人魚。
Coffee說：「依家我專注喺瑜伽事業上，但仍然對演戲好有興趣，由細到大都好鍾意星爺，今次都想把握機會自薦。希望有幸被揀中，就算只係做綠葉醜角，我都會好俾心機演。我係唔介意有咁醜得咁醜，為套戲好做乜都肯制。平時我教開瑜伽身體柔軟度好，絕對可以配合到角色，演一條好醜好搞笑嘅美人魚，任佢哋魚肉都得。」根據網上報名的資料發現，寸嘴 Barbie夏尉喻日前亦報了名，更自拍一段極為爆笑的短片上載。
星爺揀最後四強
近日正為新片《辣警霸王花》拍攝最後幾場戲的錢國偉，月前收到星爺親自致電邀他為新戲《美人魚》擔任選角評審。周二晚（ 5日）他在電話中表示：「本來星爺係叫我做執行導演，會一齊度吓古仔同一啲場景創作，但依家選角最為重要，所以先處理選角。雖然我識好多藝人，但因為我係評審身份，所以比賽前，我都唔可以對任何人有評價，只會叫佢哋有時間就上網登記報名。不過我就可以俾小小 tips大家，星爺係好重視氣質同自然美，因為到最後四強會由佢親自揀。」
據知，錢國偉一眾愛將都會報名，當中有 38H逼爆上圍的崔碧珈。而近年注專國內發展，甚懂水性的阿嬌（鍾欣潼）亦有機會參與演出，其經理人 Mani表示：「我哋對星爺套新戲好有興趣，不過入圍之後如果要簽約，咁就未必參加到。」至於男主角方面，早前曾傳出星爺會搵羅志祥或徐崢演出，其實如果星爺自己演番，票房可能會破宇宙紀錄喎！
《美人魚》賽制
選拔賽制分兩組─「美女偶像組」和「實力演技派」，經網上報名後要過三關。首輪海選由 7月 30日至 8月 15日，以公開網上投票形式選出 40強，性別年齡國籍不限，當然亞洲人會優先。之後再進行劇組試鏡，而 8月 19日至 8月 29日期間，會在國內進行直播選出 12強，最後在 8月 30日至 9月 14日，進行培訓再互相比拼，由星爺親手選出 4名女演員在新戲內演出。
故事會以愛情加動作為藍本，講一艘船在海上遇劫，美人魚勇救這艘船，而船上一名青年對美人魚一見鍾情，譜出一段「人魚戀」。
出位星女郎
歷年由周星馳執導的電影中，演員就算只做綠葉大茄，都有機會彈起，就好似元秋同何文輝（醬爆）。如果有幸被星爺揀中做女主角，就更加上位在望。曾在《食神》中爛面加西瓜刨造型的莫文蔚，當年有份被提名「最佳女主角」；張栢芝 99年拍《喜劇之王》演夜總會小姐爆紅；拍《長江 7號》的張雨綺，現嫁了國內出名導演王全安成了少奶奶。難怪咁多女仔想做星女郎
|
鍾意就快D Share啦！
|
|
|
