掃呢頁CODE去手機

2014年10月31日 星期五

[忽然1周 - 1005] 雲頂直擊踢爆假箍煲 周三微博宣布離婚 吳啟華要女唔要乸 吳啟華,MW,




周二晚,吳啟華一家返港。鏡頭前,石洋子罕有拖住女兒,但她連日來在雲頂,都冇拖過個女。

打頭陣

雲頂直擊踢爆假箍煲 周三微博宣布離婚 吳啟華要女唔要乸

本周三( 10月 29日), 50歲的吳啟華與 29歲妻子石洋子,齊齊透過微博,同步宣布離婚。而前一天( 28日),吳與家人返港時,亦向本刊親證︰「我哋分居咗好多年。」

上周吳啟華自爆婚姻危機,曾表示會為女兒箍煲。上周四( 10月 23日)更帶埋老婆及 6歲女熙兒飛到馬來西亞雲頂登台,順道共享家庭樂。可惜四日三夜行程中,本刊發現兩夫婦零交流,石洋子掛住掃貨好少理個女,就知呢段婚姻冇得掹!

石洋子長駐北京發明星夢、大使、唔湊女,夜蒲黐仔,表面罪狀一籮籮;但吳啟華其實亦不遑多讓,不時用微信獵女,更傳溝同劇演員黃心穎。

廿四孝慈父吳啟華,表示誓奪女兒撫養權,皆因吳母恨湊孫。吳啟華若爭贏女兒,石洋子冇咗個女做籌碼,可謂失婚失女失水喉!










曾經歷過一次婚姻失敗的吳啟華, 07年與細他 21年的大陸奀星石洋子結婚。可能因為曾經滄海,吳第二次結婚時,確想要定下來,所以婚後翌年便誕下女兒吳熙兒。

吳啟華愛女如命,就算在外地工作,也會每天致電女兒,今年 6歲的熙兒亦十分黐老竇,兩父女一見面就糖黐豆。上周四( 11月 23日),吳啟華由香港飛到雲頂登台,特別安排老婆、岳母及女兒同行,共享天倫。

愛女宣言

吳啟華周三早上喺微博發聲明,證實自己打算離婚。他強調以不影響女兒成長為大原則,反映他十分愛女兒。

嫩妻求變

石洋子亦在微博解釋離婚原因,她表示希望自己在女兒面前可以獨立,又話以後都不提吳啟華,拒黐金糠。

傳出黃心穎疑似小三

吳啟華宣布離婚之際,有傳第三者是與吳啟華合作拍《再戰明天》的黃心穎。不過,黃卻否認戀人夫︰「完全唔係,唔會私下聯絡……唔知點解啲人咁講。」更謂不會因而避忌。

老婆墮後

上周四( 23日),吳啟華一家由香港飛往雲頂。上機前,吳啟華拖住女兒熙兒,而石洋子就只顧篤手機,懶理女兒。

恍如搭枱

上周四晚,吳啟華一家與「 M Club」女一起食飯。吳啟華坐在女兒身邊,石洋子就坐到好開,全程與眾人甚少交流,甚有搭枱 feel。

𠱁女開心

為免女兒被一班姨姨悶親,吳啟華不時餵女兒食嘢,又在她耳邊講笑話逗她開心。

嫩妻愛夜蒲

出生於長春的石洋子,現年 29歲,畢業於中北英皇演藝專修學校。 2004年首次拍電視劇《俠醫神探》時認識吳啟華,首日開工兩人已有對手戲,加上她非常主動,經常煮埋麵探吳啟華班,兩人火速撻着,並於 07年結婚,翌年誕下女兒。

雖然婚前吳啟華講明希望太太留在家中,但石洋子一直發明星夢,將女兒留在長春交給母親照顧,自己在北京拍劇,從而賠上婚姻。兩人公開分訊後,石洋子成為網民批評對象。

石洋子喜愛夜蒲,不時在微博大晒自己的「集郵照」及夜蒲相。

雖然身為人妻,但石洋子連內衣照都晒,益街坊。

老竇與女糖黐豆

92年,吳啟華與泰國富家女 Varintra結婚(圖),兩人三年後離婚。之後他與金巧巧及羅泳嫻拍拖,後與石洋子拍拖兩年,至 04年結婚。他身旁為胞兄吳啟明,是他炒股軍師。

據記者連日觀察,雲頂四日三夜行程中,吳氏夫婦不時貼錯門神,甚少交談,就算石洋子主動搭訕,吳啟華也愛理不理,反而頻頻拖住女兒,又捽她面珠,兩父女喁喁細語,好不親密。石洋子卻經常與吳氏父女相距幾個身位,如路人甲低頭狂篤手機,就連大夥兒食飯,兩夫婦都坐到離行離列。與其說兩人箍煲,不如話他們只是在女兒面前演戲。

吳啟華口中,石洋子為事業長駐北京,女兒近年也是由岳母全權照顧。根據記者幾天以來觀察,熙兒與母親的關係十分疏離,反而與外婆感情要好。而熙兒也算懂事,雖然連日母親掛住掃化妝品、買波鞋、玩手機,連她手仔都冇拖過,但她卻沒有扭計。

女尿急媽懶理

由於吳啟華要到場館綵排準備表演,熙兒大部分時間都要跟着母親及外婆。但兩位大人幾天來在雲頂商場買、買、買,行到攰就去腳底按摩店揼骨,完全冇帶熙兒到樂園玩,就連她尿急也不察覺,熙兒惟有在店外等到腳夾夾。

28日黃昏,本刊追訪從雲頂返港的吳啟華夫婦,問到兩人為何全程冇偈傾,石洋子對所有提問都封口,只謂︰「你問啟華吧。」而吳啟華初時亦口硬話︰「有同太太傾過,努力緊。」但當遭本刊踢爆是否在女兒面前扮恩愛時,他才說︰「佢仲細,唔知發生乜事!」其後記者再追問,他才爆咗句︰「我哋分居咗幾年!」可能知道紙包不住火,吳啟華與老婆翌日齊齊透過微博宣布離婚, 7年婚姻分居 4年,不開心的日子佔大半數。

離婚既成事實,吳啟華一早心中有數。雖然現在女兒主要由岳母湊,但他有感女兒開始長大,想與女兒多點時間見面,所以就算離婚他都會爭回女兒的撫養權,更部署接番個女在港定居。

尿急曲腳

熙兒等到悶,於是出去睇商場表演。點知熙兒開始急尿,用雙手㩒住小厴,曲着雙腳企,忍了十五分鐘,才大着膽子叫媽咪帶她去小便。家庭科醫生關嘉美指,小孩若習慣忍尿,容易有尿道炎。

老母當草

上周五( 24日),吳啟華中午去綵排,石洋子就帶熙兒行街。其他父母驚走失,拖到小朋友實,不過石洋子就篤手機要緊,唔拖女兒。

扮靚大晒

石洋子先逛 Body shop再行莎莎,她試了多款眼影,並 keep住篤電話,不過就冇理過個女。

老竇當寶

同日早上,吳啟華趁有時間,陪熙兒食早餐。餐後兩父女拖手漫步商場。有父在旁,熙兒開心到笑出嚟。

密謀接女兒返港

石洋子大使,是吳啟華不滿她的原因之一。石洋子曾拉住吳啟華到名店買伯爵表,當時她孭住 Hermés手袋。

「啟華其實一直都想個女喺香港讀書,甚至想接佢嚟香港陪父母住。不過吳母已七十多歲,難以獨立照顧孫女。依家啟華正物色人選,因為佢岳母唔會長駐香港幫佢湊女,依家仲煩緊。但佢會要番個女,皆因佢知個女有阿媽等於冇阿媽,唔想個女變人球。」知情者說。

據知,吳啟華寧願多付石洋子贍養費,也要爭回愛女。其實石洋子一向大使,以往跟老公來港,她一定去名店狂掃名牌,但吳啟華對女人好疏爽,他深知拍劇與老婆聚少離多,所以經濟上盡量滿足老婆需要。

「石洋子每個月使費唔少,啟華個個月俾六萬人仔家用都唔夠。石洋子試過一個月碌卡達六位數字,雖然老婆不事生產又大使,但最令吳啟華不滿嘅,係佢為咗發明星夢,長駐北京唔理個女。兩人亦因為呢樣嘢嗌過好多次交。」一個北京、一個香港,這四年來兩人就是長期分居,感情淡到可有可無。

怨偶人前扮恩愛

作為父母,總會放仔女在首位,不少名人就算感情有變,仍會在仔女面前扮恩愛。

黎瑞恩 曾智明

兩人 02年結婚,婚後有一仔一女。去年傳出兩人感情出現問題,最初黎瑞恩仍否認,並多次帶一對仔女回曾家大宅見老爺。但兩夫婦最終在今年離婚。

羅霖 劉坤銘

兩人 96年結婚,有三名兒子。他們在 2012年低調離婚,兩人仍同住一屋,表面上生活如常,直至發生家暴事件後,羅霖才搬走。

朱玲玲 霍震霆

06年朱玲玲突然宣布,與霍震霆早在 97年分居,並於 04年離婚。兩人分居多年,但對外對內仍維持「夫妻」名份。

謝賢 狄波拉

兩人彼此感情早已轉淡,只是為了霆鋒及婷婷在完整家庭下成長,延至 95年才正式離婚。

教打牌冧模

婚姻生活得不到滿足,吳啟華近年亦開始結識其他異性。雖然疑似小三黃心穎拒認戀人夫,但另有香港𡃁模 A小姐向本刊爆料,指去年吳啟華借微信向她展開追求。

去年中,𡃁模 A在友人生日派對認識吳啟華,兩人交換電話後便開始微信聯繫。𡃁模 A說︰「吳啟華好細心,佢知我鍾意賭錢,就話教我打大陸牌。佢好豪,一鋪可以二、三千人仔上落,我最初都係睇佢打,佢贏錢後仲會買小禮物俾我。

「試過我生日佢要拍劇唔喺香港,佢事先在網上面訂咗幾支貴價紅酒俾我,然後通知我去攞,總之同佢一齊好多驚喜,佢仲教我炒股票同陪我落賭場一齊賭錢。」

台上風騷

上周六( 25日),吳啟華和一眾「 M Club」女出騷。吳啟華一出場,不但台下女 fans尖叫,葉蘊儀更一手攬住他的腰,難怪他一臉風騷。

老婆唔撐

吳啟華無論怎樣受 fans歡迎,始終冧唔掂老婆,台下的石洋子繼續篤手機,唔睇表演。

微信獵女

吳啟華不時在網上「覓食」,他早前力溝一名 25歲𡃁模 A,又送靚酒又教打牌,可惜最後未能成事。

chok相溝女

他在微信以西裝 chok look做大頭相(圖),有別於微博的父女照。

為母爭女

吳啟華母親(左)已經 70多歲,老人家想多親近乖孫,侍母至孝的吳啟華,自然想女兒在香港升學。

半年情玩完

03年吳啟華都試過背住正印女友羅泳嫻,喺北京拖夜總會小姐到酒店 happy。

𡃁模 A指吳啟華每次出外工作才會密密跟她微信︰「可能因為佢已婚,有避忌啩!我都知佢有老婆,但佢𠱁女仔係有一手。不過佢當時未離婚,我又唔敢做第三者,加上佢因為工作成日飛,見得少自然感情淡,所以我哋曖昧關係 keep咗半年就玩完。」

記者求證吳啟華,問他有冇約會其他異性?他就話︰「嗰啲只係朋友。」

四年來,吳氏夫婦分居兼各有各玩,離婚是必然。吳啟華是否好老公見仁見智,但他卻百分百是個好爸爸。至於石洋子,好老婆當然談不上,也絕不是好媽媽。

隨時冇一半身家

據本刊連日直擊,石洋子對女兒有疏忽照顧之嫌,會否不利爭取熙兒的撫養權?

謝偉俊說:「是否疏忽照顧,其實要睇長時間,同埋有咩證供。基本上,特別喺香港,會以小朋友嘅利益為最大依歸,通常年紀比較細嘅小朋友,判俾媽媽機會大啲。(小朋友跟開外婆住,對媽媽係咪有利啲?)咁對媽媽爭撫養權一定有利,因為可以減少小朋友環境嘅轉變。」

對於石洋子能否分吳啟華一半身家及贍養費,謝偉俊說:「如果喺內地法院申請離婚,以往係硬性一半,但依家就未必。香港法庭多數喺 1/3至一半之間去調節,視乎雙方嘅能力同需要。」



鍾意就快D Share啦!