【短片】【慳妹本色】鍾嘉欣手揸4層樓 請劇組食飯 位位收番$35
2014-10-28 17:37:00
入行10年嘅鍾嘉欣近年先受大台力捧，坐正做一姐，一年拍五套劇、撈埋唱歌，勝在現年30嘅嘉欣BB登台接騷吸金力強，唔係早前廣告商被指「走尾數」，大台上月入稟法院追討，先知原來嘉欣BB收成百萬代言費。
今日有報道爆，嘉欣BB出道以嚟一直「慳」字行頭，唔蒲唔玩嘅佢曾自爆買個名牌手袋都會內疚，多年扮靚嘅服飾都係靠贊助，16歲喺外國考咗車牌，但嘉欣BB都唔肯養車，拍劇多數黐車坐，又唔多出街食飯。
據知早前去台灣拍外景，傳嘉欣BB請完劇組演員食嘢，事後同劇組收每位35蚊嘅飯錢津貼，獨霸間酒店房唔肯俾差價，堅持「慳妹」本色，去買嘢又唔會理明星身份，照樣講價，不過嘉欣BB事後只回應請食飯有畀錢，冇提有冇問攞津貼。
據報道表示，生活好慳嘅嘉欣BB好勤力，甚少請假，成日密密接job冇時停，搵到錢就全部用喺香港同加拿大買樓。聽講06年出道兩年，已經成功做按揭上會，買咗當時樓價196萬嘅第一個物業，五年之後，收入多咗幾倍嘅嘉欣BB睇中將軍澳一個千呎單位，仲一炮過畀晒550萬，供都唔使供，有兩樓揸手嘅佢，去年仲有傳用咗1500萬喺加拿大買五千平方呎嘅大宅。
早前該報道問過嘉欣BB，佢都話香港有兩個單位係自己名，加拿大嗰兩間就同爸媽分別聯名。雖然已經喺加拿大置業，不過嘉欣BB仍然想買多間俾父母住，仲話第時想喺新加坡買樓。
報道又影到，指嘉欣BB接job冇揀擇，上個禮拜三坐的士去中環嘅酒店去私人派對，逗留咗3小時穩袋10萬離開。
(微博圖片)
全身都係贊助!?
開工嘅嘉欣!
成日去登台
|
鍾意就快D Share啦！
|
|
|
