2014年10月25日 星期六

楊受成認放棄買亞視 英皇歌手去邊度? 英皇,亞視,楊受成,




【破釜沉舟點回頭?】楊受成認放棄買亞視 英皇歌手去邊度?

2014-10-25 11:50:00



(資料圖片)

亞視賣盤呢單嘢已經唔係秘密,有意接「火棒」嘅係近年憑澳門賭場生意,令身家水漲船高嘅嘉華國際及銀河娛樂主席呂志和及其相關人士,仲有英皇集團主席楊受成。本報早前亦已披露指英皇眾歌手包括祖兒、Twins等決定不同無綫續約,咦,如果楊受成真係入主亞視成功,咁一眾旗下歌手就自動「過戶」去亞視,唔憂冇曝光率。

但係呢,今日有周刊報道指,楊受成斟亞視賣盤單嘢已經拉倒。楊受成接受該周刊訪問時亦直認曾經傾過,但最後都傾唔成。

其實今次入主亞視行動,據知係由林建岳牽線拉攏投資者,當中包括呂志和同楊受成。之前本報亦已披露指亞視開出8億元,並且要求買方負責支付目前拖欠的員工薪金,楊受成還價3億元,亦不願為欠薪埋單,由於收購條件分歧太大,英皇可能會放棄。而據今日周刊報道之消息就指,楊受成開價五億,但亞視主要投資者王征就開價17億,原來係加埋佢之前投放喺亞視呢個無底深澤嗰筆錢,想連本帶利拎番。嘩,邊有人肯呀?

報道話,王征遲遲唔賣,就係因為佢想等一個投資者肯俾一大嚿錢佢買起亞視之餘,嗰嚿錢仲大到可以cover番佢之前投資落亞視嗰筆。但係今次收購行動,除咗呂志和同楊受成,其實仲有一個內地商人。報道指呢位內地富商從事礦產,由亞視股東、接近中共高官且從事礦業嘅黃炳均牽線。原先個plan就係呢位內地富商佔亞視七成股權,呂志和同楊受成各佔15%,收購作價為7億。

計劃原先為,若收購成功,楊受成就可以有亞視主導權,負責亞視營運,包括經理人部門,但新老闆又唔肯出售股份,換言之楊受成亦得唔到主導權。既然冇主導權,咁英皇旗下藝人利益亦得唔到保障,故最後楊受成決定放棄,但報道指呂志和將堅持到底,收購亦已進入最後階段。

提到之前英皇眾歌手拒同無綫續約,楊受成就話無綫冇要求歌手一定要簽合約,仲話雙方關係至今仲好好,未來仲會合作喎。



(資料圖片)



(資料圖片)



(資料圖片)



鍾意就快D Share啦!
Related Posts Plugin for WordPress, Blogger...