真人騷
等一個人擔正…… 姜皓文：大把時間等呢日！
常聽藝人們把「天時地利人和」掛在嘴邊，亦有不少人說重點是要有個性，娛樂圈的生存之道，我最近又聽說了另一個理論「鬥長命」，上兩期 44歲的唐文龍說過，這一期輪到 48歲的姜皓文。
這種鬥長命的說法，要說成功例子，黎耀祥、古明華、梁健平等等等等，數起來的確不少，不過失敗的更多，做足廿幾三十年戲仍然叫不出名字的也更多。
姜皓文算是比上不足比下有餘， 86年當選亞視《電視先生選舉》亞軍出身，剛好撞正亞視最輝煌年代，踩足三線劇集還在綜藝科吃香，年年爆騷忙到沒空想跳槽；到亞視末路窮到無糧出，又讓他成為香港電視史上第一人，同時是亞視、港視合約藝員，一口氣拍下港視五套劇集；可惜港視開台好事多磨，不過也沒閒着的姜皓文，他在電影圈愈來愈站得住陣腳，最近更埋得杜琪峯堆……求其數數近年大製作，《證人》、《激戰》、《奪命金》、《風暴》，快上畫的《第 7謊言》、《大茶飯》、連拍緊嘅《五個小孩的校長》、《賭城風雲 2》同《壹獄壹世界》……姜皓文竟然無處不在。
我說姜皓文這種狀態，已經是很多綠葉王心目中的事業巔峰：有工開有錢搵，人人都叫得出你個名但又未鋒芒畢露受名氣所累，夫復何求？
他說他還有一個未圓的擔正夢：「我唔知係幾時，但係我覺得始終會有呢日，一套戲用姜皓文做賣點、觀眾買飛入場係為咗睇姜皓文，我大把時間等呢日，就算要我等多 29年！」
這一刻，我對綠葉王肅然起敬，也對「鬥長命」這三個字有了更深一層的體會。
講亞視，見好就收！
點解唔續約？因為入面太亂？
想拍多啲電影。佢（亞視）入面發生咩事其實都唔關我哋藝員事，又咁啱當其時電影機會多咗，索性就拋個身出嚟拍電影。我同好多人都好記得你喺亞視扮梁國雄！係呀《香港亂嗡》，但係亞視係見好就收……睇到咁上下就唔俾你睇㗎喇，吊一吊你癮先！其實真係好無癮，唔淨只幕前，亞視幕後都有好多有火又有料。其實你呢啲位幾好，個個拍戲都記得搵你，執埋執埋唔少，但係又唔使承受太多成名負累。我冇睇我咩位置，就係鍾意演出咁簡單。一套電影有得參與，電影應該係團體製作，哪怕一個侍應角色、去斟一杯茶，都係參與，我唔介意俾人叫綠葉王。綠葉都有觀眾睇到，都有司機大佬或者銀行職員同我講：「喂，我好鍾意睇你做嗰套乜乜乜戲……」雖然佢未必嗡得出個角色名。又有一次同太太去銀行入數，個櫃員小姐話好驚我：「琴日先睇完你套《證人》，嚇死我喇……」好過你上台攞獎！
最近角色都係惡人多？
開始唔同，多咗啲金盤洗手嘅惡人，最近最多係做老竇。唔知點解喎，《五個小孩的校長》係老竇，《樹大招風》又係做老竇，仲要清一色個個都係生女。
最近角色都係惡人多？
開始唔同，多咗啲金盤洗手嘅惡人，最近最多係做老竇。唔知點解喎，《五個小孩的校長》係老竇，《樹大招風》又係做老竇，仲要清一色個個都係生女。
會唔會撩起你個爸爸癮？點解唔自己整番個？
唔使喇，我啲細佬妹、老婆個細佬妹個個都大把細路，我成日都話不如一齊養。好過自己生，責任太大。有人話冇小朋友屋企唔得齊整，我又覺得無所謂。
19歲點解會去選亞洲電視先生？
我當時本來跟張泉先生玩雜技，佢係我幼稚園同學嘅哥哥，佢係無綫特技人，最出名係幫無綫台慶做特技、幫楊盼盼。細細個已經無心機讀書，跟住師傅周圍去夜總會登台，我自己又鍾意表演，得閒都會出去撈下啲演員。純貪得意，見到有個咁嘅比賽，就攞份 form，落去聯合道影幾張傻瓜機相，咁就去廣播道交 form。玩㗎咋，無諗住咁就變咗終身職業。
剛剛選完亞洲電視先生，都曾經雄心壯志想做男主角？
一定有，當年我鍾意鄭少秋，覺得啲大俠真係好有型，一有得做電視，最恨就係黐頭套，就算係「武林人士」，都覺得好興奮。但係現實就係唔到你自己諗，我係多嘢做到唔到我自己再去闖，由劇集組轉到亞視綜藝科，幾乎每個節目都有我份，年年爆騷。當年安德尊、陳啟泰都反而跳下槽，我係唔得閒出去闖。
咁多年無綫都冇撬過你嘅？
係囉，咁多年都冇，我冇問過人亦都冇問過自己點解。其實我份人好順其自然，好被動，可能有人叫我、我就真係走咗。不過世事就係咁，過咗無綫就實有機會咩？世事邊話得埋？
做戲做慣惡人，小時候呢？又黑又高大，係唔係蝦蝦霸霸嗰啲？
唔係㗎，我細個個樣好鈍，又因為媽媽係馬來西亞華僑，天生黑，成日俾人笑俾人蝦。嗰陣時麗的有個電視劇《奇女子》，有個差仔，我咪成日俾人笑差仔囉、俾人收埋啲嘢、又掉我書包落坑渠，我冇諗過反抗，冇打過一次交，仲要個人內向，升到上中一先至第一次夠膽行出去操場！反而我阿婆就惡喇，佢細細粒，但成日幫我出頭。接我放學時好有鋪排，離遠叫我行埋去指俾佢睇邊個蝦我，佢就喺後邊一頭就扯埋去㗎
講大台，過檔未必好！
但你個樣唔打得都嚇得，有冇俾人利用？
咁又有喎。𡃁仔嗰陣，有啲所謂黑社會話自己係大佬，叫我哋放學去扑人，佢屋企開士多，酬勞就係落佢鋪頭飲汽水囉。結果人又扑唔到，個大佬返屋企反而俾佢阿爸打到仆街。
呢行呢？有冇俾人白眼過？踩住上過？
踩住上就冇，但係曾經好好朋友、稱兄道弟，唔知點解，可能人哋紅咗啩，再見到已經唔係嗰樣……唔緊要嘅，唔同階段有唔同朋友，唯一一個 friend到𠵱家，係當年選亞洲電視先生嘅孫興。
跟住去玩雜技至學識拳腳功夫？
咁你就錯喇，反而係學識煮飯，一個人攞住幾蚊，買同煮十幾廿人飯餸，餵飽成班師兄弟。我大個特別鍾意睇烹飪書同飲食節目，十年前冇乜嘢拍，開私房菜都係因為呢段歷史。
點解無再諗過做飲食？
唔只做飲食，根本做生意都係一件難事，最難係請人，𠵱家啲人一個二個都係打工皇帝，唔捱得。
好似娛樂圈一樣，大把綠葉捱咗幾十年默默無聞，但有啲新人出道無耐就要嘈上報？
可能佢哋真係覺得自己付出咗好多呢……但係機會未到咪就係未到囉，未到咪就係要檢討下自己囉，你係得，人哋點會見你唔到？冇戲拍咪做住廚先囉，你估個個咁好景？𠵱家都大把行家揸緊的士搵餐晏。寃枉路邊個未行過？
講高潮，我仲未等到！
行過寃枉路，事業高峰你覺得你等到未？
所謂高潮，《我和殭屍有個約會》、《屋企有個肥大佬》勉強算係，但一個代表作，我覺得自己未有，仲等緊。想就一等想，但絕對要有個心理準備，可能個事業高峰一世都唔會有。好多前輩同我講，等下啦，一日喺呢行，遲早都會輪到你……就算輪唔到，都有得你做自己最鍾意嗰樣嘢囉，仲想點？
點解一個月減三十磅咁大決心？
因為拍《五個小孩的校長》時伙食太好，又近酒樓，一完咗我已經肥到 180磅。想減肥節食做運動見有成績，就繼續落去。
但係又唔可以太大隻？唔係潮流興咩？
唔得，會對角色有局限，唔係個個角色需要大大隻，我都唔想千篇一律做大隻佬。就算係綠葉，原來都要 keep身材？時刻準備好，原來都係一種演員道德。係呀，我鍾意做戲，我珍惜每一個演出機會，哪怕係過一個鏡、做一個侍仔、淨係捧一杯奶茶，我都心滿意足。如果有老闆對我咁有信心，俾個主角我做當然開心，但就算係人哋心目中嘅綠葉，我都唔覺得有問題，我嘅身體、我有幾多嘢，都係我自己嘅財產，都要 keep好佢。
惡過、搞笑過、從良過，最近最多做爸爸，你最想導演、觀眾睇到你邊一面？
冇所謂㗎，肯睇就得㗎喇！睇到我已經偷笑喇！哪拍冇人肯睇，冇機會播……等肯等就得喇，呢一行就係鬥長命。等啦，我等緊有一日，有人入場係為咗睇我姜皓文。
你覺得會有呢一日？
我唔知係幾時，但係我樂觀，覺得一定會有呢一日，有一日，姜皓文係套戲嘅賣點，我嘅強項就係等。
即使等咗 29年，都仲係覺得會有呢一日？
我有心裡準備，就算係等多 29年。我由細到大都係咁，樂觀而堅持，永遠都睇到有希望嘅一面。係嘅，失敗嘅例子總有，做人點會冇失敗，但係大把人亦都成功過，你唔好同我講你見唔到有人成功。
還是覺得妳最好
20年前，姜皓文在亞視結識亞姐金慧英，拍拖 5年、結婚 15年。
睇姜皓文做戲做惡人做得多，其實他在老婆面前柔情似水，有時候親自下廚炮製燭光晚餐、有時候送百支玫瑰或自製蛋糕，年年 12月最後一個星期，因為連住兩公婆生日同結婚紀念日，一定留番俾老婆開 P或出埠。講到老婆，姜皓文一輪嘴讚：「家居、飲食、財政，所有嘢你諗到嘅、諗唔到嘅，都處理得妥妥貼貼。你問我，毫無疑問，老婆係呢個世界上最好嘅女人！」
回下帶先， 99年結婚前姜皓文一度與金慧英感情告急，也正是因為感情路上有過這麼一段小插曲，今天聽姜皓文這一番話，才特別覺得他是打從心底裡：「還是覺得妳最好」。
|
鍾意就快D Share啦！
|
|
|
