掃呢頁CODE去手機

2014年11月5日 星期三

[FACE - 389] 最愛主播 MF,




全知言

最愛主播

早前一班大台新聞從業員聯署反高層新聞自閹,全城大讚勇敢,其實家陣佔中新聞無間斷,大家睇新聞一定多過煲劇,望班主播仲多過望屋企人。

數新聞主播,陳嘉倩、陳嘉欣喺巴打嘅女神地位唔低過一眾明星仔,但講新聞同睇牙一樣要講實力先夠水準。其中伍晃榮嘅風趣講波依然係最令人難忘,成為唔少星心目中最愛主播。

森美 伍晃榮夠幽默

伍晃榮當然係講體育新聞 icon,經典金句:「波係圓嘅!」冇人唔識電視畫面

我最鍾意嘅男主播係伍晃榮,佢令我明白認真得嚟又可以幽默,幽默得嚟又可以不落俗套。睇佢講足球比賽,就可以睇到說話嘅技巧。女主播就係陳嘉欣,每次喺屋企睇到都忍唔住講『佢真係好靚喎』,但同一時間又畀到你莊重感覺。」

羅仲謙 有風格

我最喜愛新聞報導員係伍晃榮,我細個睇新聞好留意佢講體育嗰 part,佢用自己特別風格去講波。其實慢慢培養咗我對體育嘅興趣囉。

小儀 林曦如夠親切

男主播我揀伍家謙,女主播係林曦如。首先伍家謙高大威猛成個籃球健將,成日講體育,所以都幾 eye-catching。好早期已留意呢位男士喇,至於林曦如我就覺得佢個樣好 nice好和善,呢啲女仔感覺好親切。

林曦如好少喺 6點半新聞見到,多數出現普通話新聞時段,但樣靚話之你一秒,巴打都留意到,連小儀都 buy喎!電視畫面

陳柏宇 方健儀最優雅

如果要揀最鍾意,我會揀方健儀呀!佢畀到我一種好 elegant又高知識,總之係一種好優雅嘅感覺啦。我就做唔到新聞主播喇,因為 live太大壓力喇,驚讀錯會唔知點算好。

方健儀唔係玩女神 feel,但的確係近年最成功女主播,離開大台後去過 ICAC做公關,來年回中大教書兼做皮革。電視畫面

陸永 方東昇靚仔呀

喺我小學時候呢,已經有人話我似方東昇,我問屋企人似佢好唔好,佢哋話似佢靚仔呀。再大嗰啲再睇方東昇……又真係幾靚仔呀,一表人材呀。女就最鍾意魏綺珊,係童年回憶嚟,嗰陣睇新聞剩係得魏綺珊做緊,我就以為全香港得一個女主播。

方東昇有中大才子稱號,幽默程度唔比伍晃榮差,早前嘅新聞節目《世界零距離》亦盡顯佢幽默嘅主持手法。電視畫面

鄧麗欣

我最鍾意伍晃榮先生,記得佢以前講足球好似現場一樣,非常之生猛、搞笑,就算我唔係一個睇波嘅人都好鍾意睇佢講足球新聞,把聲又好聽;另外𠵱家有個接捧叫伍家謙,都係講波講得好好笑。

伍家謙算係近年大台新聞男神,外形高大,私下亦係籃球健將!電視畫面

學生最 like利君雅

電視畫面

巴打最 like靚女主播,不過學生就唔係咁睇,反而唔係女神級數嘅利君雅就跑出。尤其佢啲唔純正廣東話大家最 like。

蔡小姐  19歲 時裝形象學生

利君雅我覺得佢講廣東話好正,有次喺上水街頭見到佢做新聞覺得佢幾好,同埋佢幾靚女。

Venus  18歲 平面設計學生

周嘉儀講嘢咬字發音好清,同埋潘蔚林嗰次講颱風好搏命。

廖小姐  18歲 設計學生

最有印象係利君雅,佢啲中文好正。自己都識外籍人士,但佢好似特別吸引。

即時報料

有料、有相、有片即刻 send嚟

熱線 9222 0828

電郵facenews@nextmedia.com

facebook: facemagazine inbox

LINE、 we chat id: facemagazine

知無不言 言無不盡 我係全知言



鍾意就快D Share啦!