[FACE - 395] 大蝦細 憎佢腳長 楊秀惠兇吳若希除裙換褲 吳若希,楊秀惠,MF,

楊秀惠同吳若希同係《姊妹淘》主持，不過楊秀惠經常蝦佢，劇組亦識做唔安排二人一齊同場，近兩個月都冇合作喇。

真面目

大蝦細　憎佢腳長　楊秀惠兇吳若希除裙換褲

女人圍埋就一定有是非啦，何況喺電視台。 J2台節目《姊妹淘》 11年首播，全女班做主持，爭位爭出鏡預咗。最近有傳二綫姐仔歪面楊秀惠忽然覺得自己係一姐，除咗經常呼喝工作人員，仲「大支嘢」上身，就連細佢 8年嘅大台新貴吳若希都敢點。

話說喺一次拍攝《姊妹淘》時，見吳若希條裙短過自己，唔抵得人騷長腿，竟然要若希 BB改着褲，若希 BB亦只有乖乖就範。聽講若希 BB係「山姐」老公愛將，今次得罪方丈，楊秀惠恐怕……

女人最易眼紅人哋，據知楊秀惠就唔妥吳若希入大台唔夠一年，已經有得密密做。連拍兩劇又做主持，佢首《越難越愛》年尾仲攞硬獎，於是楊秀惠實行當佢新人咁恰，除咗搶佢對白，仲試過叫佢換褲唔準條裙短過自己。又試過叫吳若希改髮型，踩到上面，搞到吳若希試過一次見到拍檔是葉翠翠時大呼：「好彩係你咋！我冇講邊個呀！」

吳若希任《姊妹淘》差唔多一年，同葉翠翠關係最好，二人經常喺微博互讚對方。

曾經發生「換褲」事件，問到吳若希幾時發生，她只以「 hahahaha! I am not in hk」回應。

「唔知點解啲人亂咁講」

由於二人關係惡劣全組都知，故已冇安排二人同場主持。問到吳若希被楊秀惠兇時，她只肯以 WhatsApp說：「 I can't answer anything」，「 HaHaHaHaHa! I am not in HK!」。而「一姐」楊秀惠則例牌否認話：「唔知點解啲人亂咁講，我當係一種宣傳啦。不過我就一定冇叫佢換裙。同埋我都幾鍾意 Jinny，我覺得佢做得好好。」

兩位死對頭講嘢行貨，但節目開山主持莊思敏就有唔同睇法喎，她說：「我又覺得唔好成日覺得 jinny畀人恰， Jinny唔係一個傻嘅人。 Jinny都係聰明架，唔係咁易恰到佢。」睇嚟場戲有排做喎！

莊思敏話拍《姊妹淘》只當返工，同其餘三位主持關係良好，她說：「我剩係返工做好個節目為先，其他事我唔理。」

吳若希雖然今年 1月先入大台，不過就連拍兩劇《衝綫》、《倩女失魂》，又做《姊妹淘》主持，首〈越難越愛〉年尾總算又攞硬獎，難怪有人眼紅。

蜀中冇大將

楊秀惠除咗初道時拍過《四葉草》多人留意外，近年被人討論都係因為塊面愈來愈歪，不過大台啲花旦走得就走，楊秀惠今年開始上位。最近拍緊《鬼同你 OT》劇中不時勾引陳豪，唔怪得開始擺款啦。

楊秀惠本為索女，但塊面唔知點解愈嚟愈歪。《忽然 1周》圖片

楊秀惠喺大台做咗差唔多 10年，今年喺《忠奸人》先有大茄角色做，戲分仲少過小寶。

大台花旦狂走，令楊秀惠都有位攝，喺新劇《鬼同你 OT》佔戲重，劇中不時勾引陳豪，唔怪得以為自己係一姐啦。

識造新聞

吳若希自簽咗大台後，事業好似坐火箭咁，除咗做主持又拍劇。不過曝光多，新聞亦自然嚟。講真佢造新聞能力都唔弱！

今年大台台慶吳若希同黃翠如一齊做訪問，期間主持攞咗蕭正楠同吳若希啲緋聞做話題，吳若希當場叫黃翠如道歉，令翠如 BB超尷尬。

12年吳若希原本有份表演《翡翠歌星紅白鬥》點知綵排前話跳到出血，佢仲話：「痛咗 3日，留院 1日」

鍾意就快D Share啦！

下一篇 》