【獨家村人緣差】34D袁嘉敏被寸玩小學雞遊戲 杜汶澤：猿糞
2015-01-27 13:55:00
早前有報道爆09年最上鏡港姐袁嘉敏「一脫憂鬱」，聽聞拍《鴨王》為爭做女主角，答應露兩點上陣，片酬只收廿萬，有指原先劇本只係安排兩場床戲，點知臨時拆6場情慾戲份，點知日前佢拍嗰場，喺遊艇半裸露34D上陣嘅短片外洩，對於電影未上映，就流出片段，袁嘉敏情緒好激動，甚至有指佢喊到手震。
今日又有周刊表示，向來「獨家村」嘅袁嘉敏人緣唔好，拍《鴨王》嗰時，已經好惹是非，先後同劇組女角傳不和，當中同Jeana(何佩瑜)直情公開出言互寸，不和到出晒面，連同戲男主角Dominic(何浩文)都忍唔住喺本月初於facebook開口寸佢，Dominic寫道：「我真係冇興趣玩埋小學雞遊戲，自己唔知自己咩有問題就問下其他人發生咩事，點解自己被針對。」
據報道指，屢傳同袁嘉敏因為拍《3D豪情》搞到勢成水火嘅杜汶澤都有喺facebook回應Dominic，先問「我懷疑你講緊一條八婆」，Dominic即回覆：「大佬醒目到個程度，可唔可以教細佬兩招太極洗下。」阿澤又話「八婆係唔洗對付嘅，因為點都唔會得，紅唔倒係其次，最重要係，痴(黐)線唔單止影響其他人，自己亦唔見得開心」阿澤同Dominic講講下，仲講咗句「其他人同佢，就係佢地之間嘅猿糞」。講到「猿糞」，唔知「猿」字，同姓袁嘅袁嘉敏有冇關呢?
冰封三尺，非一日之寒，袁嘉敏一向喺圈中，人緣唔多好，該報道都訪問過唔少知情人士，指袁嘉敏拍《3D豪情》本來答應露點演出，又話咩都得，點知到日本拍外景忽然「冇口齒」，臨時反口，話係客串價，睇過劇本覺得同戲太多AV女優，自己唔需要露；到拍《鴨王》做女主角，就不時呼喝劇組，擺款做一姐，成日改導演劇本，即場黑面、喪發脾氣，態度極之惡劣。
又有傳曾做電影發行主任嘅袁嘉敏，喺大台浮沉5年，簽咗俾太陽娛樂，先有機會衝上大銀幕，該周刊指，袁嘉敏初入太陽娛樂喺周年晚會抽到大獎5萬，在場嘅人叫佢「萬歲」請食飯，點知佢就寸爆話簽咗俾太陽娛樂，接少咗好多job，又要被抽佣，出面接司儀job搵嘅多過依家份人工。
(資料圖片)(蘋果日報)
(facebook圖片)
|
鍾意就快D Share啦！
|
|
|
