胡漢清落淚反擊：分我身家，點可能
資深大律師胡漢清（Alan）與江希文（Liz）的是是非非，近日成為各大報章頭條，連日來有人向傳媒展示傷勢、晒爆粗錄音及抱女痛哭，而Alan一直只透過友人代言反擊。前晚Alan接受本報獨家專訪，首度現身剖白跟Liz的愛恨情仇，他指對方由始至終心不在他，處心積慮謀取所需，Alan對此說：「佢要同我分身家，點可能？」說到因為Liz而導致跟母親決裂，他表示最為心痛，聲淚俱下求母原諒，以後要帶眼識人！
胡漢清：胡 記者：記
記：同江希文幾時開始有分歧同決裂？
胡：佢有咗之後，我就同佢訂婚，訂婚廣告出咗後，好多人打畀我，問我識咗佢幾耐？知唔知佢嘅過去？原來有啲嘢好多人都知，淨係我唔知，後來Liz向我寫咗兩封信自白，承認一啲事，我當時受到感動，覺得佢有咁嘅勇氣承認，之後我同兩個朋友傾過，其中一個係Gary Chan，佢哋話如果你接受到，仲想同佢繼續行落去，咁Liz暫時離開香港比較適合，我選擇咗「攬」佢，BB都有埋，我又咁鍾意小朋友，我都六十幾歲啦，都唔想孤零零一個人。至於去英國係佢嘅意思，佢話嗰邊有親戚，我嘅仔女又想喺嗰邊讀書，所以我都好贊成，大家協議佢過去生BB同生活，至少到小朋友入幼稚園，時間大概三年，佢亦都同意。
胡：最後佢喺2012年10月過去，2013年4月生BB，期間我幫佢搞居英權，使咗唔少錢，又買屋買車。佢生嘅時候，我忙緊阿媽嘅事，同埋自己幫人打緊官司，行唔開，但我哋一直有視頻，幾乎每隔一個月就過去，嗰段時間大家係最開心，我每個月自動轉帳唔少於5000英鎊生活費畀佢，屋企所有開支佢唔需要支付。直至2014年4月，佢話想帶個女返香港同爸爸媽咪同個女慶祝生日，講咗8月返番英國，我回程機票都買埋，到8月尾，佢就話想過埋9月2日自己生日先，我都話OK，過咗生日，佢就話唔返英國，除非即刻去登記，大家都開始成日嘈交，佢好似變咗第二個人咁，食番煙飲番酒，成日挑釁我，然後就發生嗰次碰撞事件。
「擸餐刀鋤我大髀」
記：佢話你打佢？
胡：Liz性格好硬，我性格亦一樣，9月13日我同個女喺屋企，我見到個打火機，我就收埋佢，Liz返到嚟，問我要火機，我畀佢，佢就屈我做乜拎個火機畀個女玩，大家嘈交，佢對我講咗句粗口，我亦有講粗口，期間佢叫我畀番個女佢（當時我抱住佢），我話唔畀，佢就擸起把餐刀一下用刀尾鋤我大髀，我就推開佢，我有職業病，唔會做任何襲擊行為，我知道後果嚴重，佢跌咗落地，我即時向佢道歉。我同佢講，點解大家變成咁？話佢成日搵交嗌，又唔返英國，佢同我講數，話自己唔會返英國，除非即刻註冊，佢話我依家六十幾歲，搵錢能力愈來愈低，呢間屋就係最值錢，如果唔結婚就加佢個名，同埋所有附屬卡都要，即係想分我身家。
期間胡漢清不時拿出雙方律師的對話文件，證明事實。
「走去食環署投訴我」
談判不果，江希文開始不斷將自己受傷照傳給其他人，胡漢清不甘示弱，到養和醫院驗傷，亦自拍受傷照，自此胡避免直接衝突，就透過律師傳話，亦有叫江欣燕幫手。胡漢清指「老屈」事件陸續有來，包括指他不喜歡江欣燕。
胡：我最憎畀人屈，我點解會做律師，就係因為我細個畀人屈，所以邊個人屈我，我就唔得，亦都令我好嬲，佢就最鍾意屈我，令我情緒激動，我係被佢逼到失控，然後就錄我音裝我。佢屈我唔鍾意江欣燕，認真莫名其妙，我後來同江欣燕仲多嘢傾過同佢，江欣燕之前離婚都有問我有冇律師介紹。Liz喺英國時，我喺香港有時間就約佢屋企人出嚟食飯，江欣燕都在場，有晒相證明。不過最離譜嘅老屈事件係2014年12月，我屋企漏水，我就搵相熟師傅嚟整，佢見到就發火，話我容許陌生人喺屋企出入，又話裝修工人偷窺佢，佢要求換鎖，或者等佢搬走之後先整，師傅發咗律師信畀佢，亦都唔接呢單裝修，維修冇做，佢竟然走咗去食環署投訴我，影響公眾衞生，要對我作出檢控。佢嘅手法好陰險。
記：咁你依家想佢搬離大宅？
胡：我從來冇叫過佢搬走，我只希望佢喺自己範圍生活番，佢依家成間屋周圍霸，我同啲仔女都住唔到，又話人身有安全威脅。我同佢爸爸傾過，佢爸爸係好贊成Liz同個孫女搬返去住，而沙宣道亦預留一個房畀佢同個女，但佢係都要話同個女搬出去，要求龐大生活費，佢爸爸都贊成，個孫女有公公婆婆照顧，比佢一個人同女喺出面住係好，但佢唔肯。
被索取龐大生活費
記：佢要求幾多生活費？你願意支付幾多？
胡：佢要錢，可以傾，呢幾個月，透過協調員同佢傾，佢全部唔睬，一係要名分，拿唔到名分就要破壞我聲譽，將事實歪曲，我同佢之間有大把證人可以做證，佢每次要求嘅數目都唔同，不斷增加，五位數去到六位數，數目仲多過我正式婚姻嘅贍養費，佢要同我分身家，點有可能？我經濟能力都有限，兩段婚姻都唔平，成立咗個信託基金又少咗啲，咁我都要留畀啲仔女，而且我自己都想退休啦，我都六十幾歲，段路都秋天，做人要適可而止。如果佢係諗住藉攻擊我而拿多啲贍養費，我係絕對唔會，而且肯定仲會有反效果。
記：你覺得佢有冇愛過你？
胡：我只可以講，佢喺英國時好好，我哋都好好，返到嚟香港就變晒，每逢周末就抱個女返娘家，擺低畀佢爸爸，就同江欣燕出咗去，試過好多次我下晝去佢屋企同佢老竇傾偈到夜晚，江希文都未返屋企。佢個心唔喺我度，處心積慮要誣衊、挑釁我，動不動就錄音，玩嘢。
向母道歉悔冇聽勸
記：你媽咪知唔知你同Liz依家搞到咁？
胡：原來我阿媽畀我嘅勸告係啱，（突然激動）佢當初反對我哋係有理由，佢真係有唔畀我阿媽入屋，情況等同依家我同我嘅仔女都被佢拒諸家門外，佢講到我係暴魔，話有人身安全，我仲點敢返去，我啲仔女頂唔順佢，唔想留喺屋企，佢哋亦得到我前妻同意發咗律師信畀佢，呢幾個月我同仔女都生活得好辛苦，搞到咁，我想藉此同阿媽道歉，（哭泣）希望得到佢原諒，我真係錯喇！
記：件事發展到咁覺唔覺得好丟架？老貓燒鬚？
胡：唔覺，呢個係一個教訓，如果咁講即係要論輸贏，冇贏o架，只會雙輸再咁搞落去。
申令禁江希文霸大宅
記：咁你下一步點做？
胡：我今次交代完，我會馬上入禀法院要求保護個女，要求佢唔好再帶個女出嚟做騷，佢唔好再擺個女上枱，同埋希望佢爸爸可以做個女嘅監護人，容許個孫女可以喺娘家生活，咁樣我比較放心，但沙宣道仍然預留一間房畀囡囡，係冇牴觸嘅兩件事，我亦會向法庭申請禁制令，要求佢唔好再霸住沙宣道，我唔係要趕佢走，佢同個女都可以喺度住，但喺番適當嘅範圍生活。
據知，昨日胡漢清已跟律師傾談，亦正式入禀法院，一切進入法律程序。俗語有云「清官難審家庭事」，二人的恩怨發展如何，仍是未知之數，只希望大人的事不要影響小朋友。
|
鍾意就快D Share啦！
|
|
|