【寸爆冇仔埋身】dry足6年 袁嘉敏撐露點戲份寸人思想狹窄
2015-01-20 11:28:00
(資料圖片)(蘋果日報)
露兩點，賀新歲嘅前港姐袁嘉敏喺今年賀歲片《鴨王》當中，半裸激戰Dominic，但一直有傳佢「自覺紅咗」擺阿姐款，仲有指佢同Jeana不和出晒面，今日更有周刊形容對方係「獨家村」，份人好寸、冇咩朋友，已經dry足6年，冇仔敢埋身，唔通真係慾火太大，先拍露點戲?
今日周刊指，現年30歲嘅袁嘉敏09年參加選美，「三甲不入」，攞咗個「最上鏡小姐」，之後進軍娛圈多年都撈唔起，係有喺「公仔箱」做過下主持，不過唔係好「入屋」，當時離開大台，就爆大台刻薄，每月最多得1萬蚊人工，聲稱唔可以再咁生活落去，佢會抑鬱，跟手就簽咗俾Paco旗下嘅太陽娛樂，有份拍電影，做閒角都有戲接戲，試上過「大銀幕」，有指袁嘉敏拍杜汶澤嘅《豪情3D》出爾反爾，話露又唔露，後尾先講覺得拍嗰套戲，似做配角，焦點去晒班女優身上，佢先唔肯露。
今次拍《鴨王》終於半裸上陣，早前網上仲流出佢同Dominic嘅影片，成功搶去Jeana風頭，未上映已成為焦點，該報道上周六都有問過宣傳新片嘅袁嘉敏，真人係唔係都如戲中一樣咁open先，佢當時就話依家都未有男友，仲成6年冇拍過拖，之前做幕後就有拍過，選港姐就開始冇，被問有冇同前男友玩「人肉刺身」，佢就話唔會。
講到同太陽娛樂合作，佢就喺周刊有啲微言，早前有傳過佢會黐王晶飛Paco，不過依家仲係太陽娛樂嘅佢，就向周刊話有得發展就合作，如果佢呢刻要去歐洲讀書，甚至流浪，公司都會放佢走，覺得做呢行，都係佢哋覺得有利益先會做你經理人。
真係「利」字行先，上年拍《豪情3D》嘅佢仲翻阿澤舊帳，再次喺該報道重提，表示監製、導演、製片最初話佢演嘅角色有得發揮，問佢脫唔脫，當時袁嘉敏話可以，不過睇完劇本覺得角色似《家有囍事》嘅吳君如做「黃面婆」，認為角色唔多啱佢，劇本又似係集中係一班女優身上，覺得人哋露就夠，佢係傾好唔露點嘅方案，先出「友善」嘅價錢，講到尾都係覺得片酬唔啱數。
袁嘉敏仲喺報道指，依家先半裸演出，唔怕家人反對，佢哋對佢事業冇咩意見，覺得自己係外國留過學，比較「西化」，唔會做乜都問屋企人，認為露點演出，係因為呢套戲講情慾關係，要用欣賞電影嘅角度去睇，寸啲批評佢嘅網民，思想唔好太狹窄，如果唔係睇電視劇，呢句唔知係唔係寸緊大台呢?
|
鍾意就快D Share啦！
|
|
|