掃呢頁CODE去手機

2015年2月4日 星期三

[FACE - 402] 最經典賀歲片 《家有囍事》冇得輸 MF,




全知言

最經典賀歲片 《家有囍事》冇得輸

賀年必做就係睇賀歲片,未必要買飛入場,叫齊成班朋友上屋企開賭檔,扭開電視,大台、有線必定重播周星馳電影,最受歡迎首選《家有囍事》男金周柏豪仲係呢套戲超級粉絲,他說:「我睇咗超過 50次!所有情節對白我都識背,就算電視冇播,我都會攞出嚟睇!」真係好鍾意喎!

周柏豪 全套背晒

我自己最鍾意嘅賀歲片呢,其實就係《家有囍事》啦,我諗我由頭到尾啲對白情節,我都能夠背得到出嚟,如果最深刻佢同何里玉相遇嗰啲情節啦,又或者星爺揸電單車扮未來戰士啦,又或者佢儍咗之後佢自己猜枚,同自己講嘢嗰啲對白,「邊個淫蕩,我淫蕩」嗰啲我係完全背得哂㗎。《家有囍事》我諗我睇過超過 50次喇!有時就算電視冇播都好,我都會同朋友上網或者攞番啲碟出嚟播。

林嘉欣 專殺殭屍

我農曆新年最喜歡睇係周星馳系列所有電影,另一樣就係殭屍片,因為細個時候都係睇呢啲片,所以會有一種情懷喺度,同呢啲戲有情意結,所以 10種殺殭屍方法我都知㗎,問我都知㗎,呢啲係我童年囉!

許志安 嚦咕嚦咕

我自己最鍾意係《嚦咕嚦咕新年財》,好開心,睇到劉德華、梁詠琪呢 pair感覺好搞笑,自己一見親都睇,睇咗我諗有 7、 8次

關楚耀 《金雞》精神

我最喜愛嘅賀歲片係《金雞》系列,雖然係賀歲片,但做到嗰種精神出嚟,香港人好啱睇囉!當然今年《金鴨》大家都不能錯過啦。最開心其實睇華哥跟君如,佢哋兩個喺度唱下歌呀,嗰啲心情對話呀,嗰一種係 sweet㗎。

陸永 懷念星爺唱〈相逢〉

計自己冇份拍又不停重睇,一定係《家有囍事》,如果計佢每一年都重播,而每一次重播都睇嘅,最記得星爺唱嗰個〈相逢何必曾相識〉嘅客家話版,嗰一段我好記得嘅,咁啱近期又炒返起〈相逢何必曾相識〉,就令我𠵱家就想去睇喇!

羊年賀歲發哥跑出

星爺新年必睇,可惜佢套《美人魚》都唔知幾時上映,今年賀歲片爭崩頭,但一眾年青人好似都係 like發哥套《賭城風雲 2》多啲喎!估唔到 59歲發哥喺後生仔心目中咁有 market!

Jason  19歲

最想睇發哥嘅《賭城風雲 2》呀,因為有發哥喺度囉,發哥又靚仔又型啦,又高大威猛啦,係我呢啲基佬(咁都要出櫃?!)心中最愛囉!最唔想睇係《鴨王》喇,我個人好天真爛漫,呢啲唔係好啱我!

CoCo  18歲

我最想睇係《賭城風雲 2》,因為有周潤發,因為之前搭車見到佢覺得好親民,要支持下。

鍾意就快D Share啦!