掃呢頁CODE去手機

2015年2月18日 星期三

[FACE - 404] 唔想睇李 明抄瀨嘢 山姐震怒 李思捷吹大:有我點會唔掂 思捷,李思捷,MF,




李思捷一向風騷,上年同胡杏兒、黃智雯、胡定欣和胡蓓蔚 4女去韓國旅行,期間被誤會係杏兒男友添,點會唔得戚?

網上圖片

真面目

唔想睇李 明抄瀨嘢 山姐震怒 李思捷吹大:有我點會唔掂

一向自信爆棚嘅李思捷,自《玩嘢王》成功後,自信繼續爆升,雖然《玩嘢王》因得罪星多冇得添食,但點會打擊到自信王,上年李思捷仲獻計畀綜藝科總監余詠珊,除咗做司儀連監製都想做埋,當時有人曾對山姐豪言:「《玩嘢王》咁收得,有我點會唔掂!」

吹到天花龍鳳,可惜首兩集播映後,收視只得 16點,連口碑都冇,抄足外國節目更被網民插爆。冇收視冇口碑,山姐終於憤怒了,決定以後唔再畀李思捷自把自為。







40歲李思捷同其他小生唔同,一向自信爆棚,除咗經常 chok樣扮靚仔,亦對自己搞笑能力好有信心,前年一輯《玩嘢王》令佢爆紅,可惜得罪太多花旦小生,搞到冇得添食。

首集請到吳君如做嘉賓,不過節目形式同美國 talk騷《 The Tonight Show Starring Jimmy Fallon》一樣,連背景、主持用嘅 iPad都跟足,想冇人插都幾難!

《 The Tonight Show Starring Jimmy Fallon》

浮誇表情係李思捷嘅殺手鐧,不過喺節目入面無限 loop,好笑都變唔好笑啦。

電視畫面

唔想變《爆足一周》腰斬

13年《玩嘢王》李思捷彈起,試過最高收視 24點, myTV點擊稱冠,不過當年有監製黃中濠睇實,思捷唔敢亂嚟。

電視畫面

等咗成年,原本綜藝科總監余詠珊想搵李思捷做節目主持,仲搵嚟愛將監製衞世輝幫手,點知自視過高嘅李思捷話唔使。知情者說:「佢話上次《玩嘢王》所有嘢都係佢諗,一樣收得,有佢點會唔掂,唔使監製幫手喇,一於自己做埋。」

李思捷拍晒心口披甲上陣撈埋監製,余詠珊又見佢《玩嘢王》有收視口碑,咪決定試下囉。但當知道《今晚睇李》成個節目都係抄足外國 talk show時,山姐曾經都勸李思捷唔好抄到咁足,「要有自己嘢!」不過自信王又點會聽入耳,結果首兩集收視只得 16點,而且網民插爆,據知山姐已諗緊計補鑊,唔想步查小欣的《爆足一周》後塵腰斬收場。如今李思捷唔只得罪山姐,原先諗住食住個勢搵老闆揼水開拍電影《金國民 2》的大計,亦因為《今晚睇李》收視仆直而凍過水!睇嚟李生都係專心拍劇好過

計錯數

自信王李思捷,今年撞啱大台小生荒,連佢都可以做男一,原本想借住《八卦神探》加埋《今晚睇李》個勢,以為可以坐穩繼續做男一,順手搵埋老闆科水拍《金國民 2》,𠵱家真係兩頭唔到岸。

李思捷首度孭飛做男一的《八卦神探》,劇中同萬綺雯談情,戲外亦傳過緋聞,不過收視一般,網民連講都冇講。

未播出的《以和為貴》,李思捷變番男二,男一係馬神馬德鐘,又有不死徐子珊,應該好睇好多。

電視畫面

李思捷認真自信爆棚,就連監製都做埋,喺《今晚睇李》 roller尾段,有李監製大名。

電視畫面

08年自資拍電影《金國民》,成套戲講自己喺娛樂圈嘅辛酸,就知李生極度自戀。

網上圖片

鍾意就快D Share啦!