掃呢頁CODE去手機

2015年3月5日 星期四

施念慈帶飯局睇辦 羅子喬:佢話冇錢可以幫我 [壹週刊 - 1304] 施念慈,羅子喬,M1,




探熱針

施念慈帶飯局睇辦 羅子喬:佢話冇錢可以幫我

施念慈揸弗的經理人公司 Jacso,除了 DaDa陳靜跑出外,旗下一班女仔包括「向西女」 Celia K(郭穎兒)、「E級超蓮」鍾采羲、以及 D級 Monna林宜芝皆發展平平;一三年出過寫真集的蕭美卡和 Diva許珮榆,近年更在娛圈蒸發。

至於去年有份拍電影《天師鬥殭屍》、《唐伯虎之衝上雲霄》的 D胸羅子喬( Bella),一樣愁爆!日前她向本刊哭訴被施念慈帶去睇辦飯局,對方更經常暗示「冇錢可以幫手」。當羅子喬拒接受潛規則遊戲後,不單零工作,提出解約的她,更被恐嚇封殺。

家人金援

現年二十六歲的 DaDa師妹羅子喬,由於前經理人公司執笠,合約轉售給施念慈,為期五年。轉到新公司,事業依然冇起色,其中有一年半時間,因工作量不足加上拍拖分心,要由澳門家人經濟支援,之後,羅子喬索性搬返澳門,在賭場工作。直至兩年前,施念慈來電表示電影圈等人用,她才回流香港。

「我返嚟客串咗部《爛滾夫鬥爛滾妻》,(王)晶哥之後都有繼續俾機會我,但除此之外,佢(施念慈)冇幫我接其他工作,根本唔理我,甚至連劇本都冇幫我睇。不過就算接到晶哥嘅戲,都不足以維持生活,香港消費高,好大壓力,加上有啲 job佢又冇出糧俾我;我當然有追,但佢都係唔俾,其實呢兩年來都搵唔到咩錢。」羅子喬說。

拒出席飯局後,本來對她冷淡的施念慈已經沒有帶 Bella出席其他活動。

公司旗下一班女仔富貴,身為經理人的施念慈亦周身名牌,出活動著 Hermes皮草,好有米。

飯局被抽水

冇工開,羅子喬指箇中原因,與自己拒絕出席施念慈安排的飯局

有關。

「佢(施念慈)叫過我去食飯,我唔識 social,又唔會同佢哋玩,之後就冇 job俾我。(飯局有咩人?)有公司其他女仔, Celia(施念慈)最初話係普通朋友食飯,我以為傾工作,去到唔係咁,係飲酒同唱卡拉 OK。(有冇被人抽水?)少少,大家第一次見面,佢哋(男人)就好似好熟咁,會摸吓攬吓我條腰,但見我木木獨獨坐埋一角就冇再理我。

「其實一、兩次之後我都冇再去。 Celia暗示過好多次:『你冇錢,我可以幫到你』,又講呢個圈有潛規則,佢話:『你唔做,其他女仔都會做』,但我覺得呢個圈唔一定要跟潛規則先可以做落去,可以靠自己努力,所以我要求解約。」

推飯局變零收入,就連朋友介紹工作,都被施念慈臨門踢走。

「之前陶傑拍《愛.尋.迷》,黎小田都有叫我去 casting做個 miss角色,但 Celia同我講角色乜都要露,所以推咗。我之後問番小田,佢話冇咁嘅事。亦試過其他朋友搵我傾合作,佢又會同人哋講,其他女仔好過我。」羅子喬一臉委屈。



Bella唔聽話,施念慈就算影合照,都特登企在愛將 DaDa及 Celia K中間,擺明大細超。

Bella說王晶一直有俾機會她,上年 DaDa孭重飛做女一的電影《唐伯虎之衝上雲霄》,她(中間)有份做其中一角。

恐嚇封殺

去年底,羅子喬終於離開施念慈公司,最近更有機會接拍廣告扮演超人媽媽,但她依然受到騷擾。「佢(施念慈)都唔放過我,又恐嚇我,佢話太陽城(娛樂)俾咗一千萬美金佢做嘢,又話太陽城成個律師團隊幫佢,會封殺我,唔俾我做呢一行,我都係澳門過嚟,大家係澳門人,太陽城係咪會咁對我呢?」

一直反對女兒在娛樂圈發展的羅母,曾勸羅子喬返澳門結婚嫁人。

「屋企人覺得我花咗五年時間,又冇工作,有嘅都係暴露,媽咪好心痛,叫過我返澳門結婚唔好做,但我冇同佢哋提過飯局嘅事,唔想佢哋擔心。而家有嘢做,我希望做到成績俾屋企人睇。」羅子喬說。

離開經理人公司, Bella學功夫做打女,亦有跟緋聞男友唐文龍學詠春。

一三年出過寫真集,𡃁模出身的許珮榆同蕭美卡已經常接 job出活動。

早前過日本試鏡被選中做超人之母,返港後,她即學空中瑜伽勤練身手。

跟師姐 DaDa關係不錯,她說上年因有一篇報導出街,她慘被公司誤會,連 DaDa都視她為陌路人。

施念慈旗下一班女仔,她經常帶出活動的只有 DaDa及聽話 Celia K,二人的工作量及見報率亦較高。

掃大堆名牌袋

Celia K放了多張富貴生活照在 instagram。

出埠開快艇

揸 Benz代步

離奇富貴

做經理人多年的施念慈,只有一個 DaDa(陳靜)因為《低俗喜劇》,攞到金像獎「最佳女配角」彈出,但公司旗下知名度不高的𡃁模,卻離奇地生活富貴。

Monna(林宜芝)

先後出過兩本寫真集,工作量不多的 Monna, 11年被踢爆入住二千萬豪宅凱旋門,之後又被發現著皮草揸 50萬 Audi跑車,近日更上一層樓住上山頂,開寵物店做老闆。

Celia K(郭穎兒)

曾拍電影《一路向西》及《夜蒲 3》的 Celia K,近日在網上自晒住大屋、揸 Benz跑、豪掃名牌的照片,收入與享受不相稱。

DaDa(陳靜)

未憑《低俗喜劇》彈出前, DaDa已有能力三度入市置業。 19歲花九十萬買唐樓,未幾再以 350萬購入長沙灣泓景臺,之後再掟 350萬掃埋深水埗景怡峯。

鍾意就快D Share啦!