否認拒婚前性行為致偷食 鍾舒漫：原諒吳浩康
吳浩康（Deep）背女友鍾舒漫（Sherman）偷食，一個月內連𠝹六女，吳舒戀冷戰取消結婚，事發後Sherman昨日首度現身出席活動，心軟的她坦言已原諒男友，兩人現處於緩衝期，仍然互相關心，對於被指身為教徒的她拒絕婚前性行為，才令男友出軌偷食，Sherman說：「愛一個人唔係要有呢啲嘢囉！」
鍾舒漫、鍾欣潼（阿嬌）及周麗淇等昨到中環出席活動，日前吳浩康被本報踢爆婚前背正印鍾舒漫偷食，還當街啜爆34E巨乳𡃁模Yvette Chow，Sherman昨刻意表現輕鬆，對男友速食六女說：「冇唔開心，有啲飯局我都在場亦都知道，只不過佢容易俾人影到，成件事加埋唔好睇。」
■鍾舒漫坦言男友吳浩康已認錯並原諒了他，但兩人現處緩衝期。
「keep聯絡keep關心」
Deep是否已道歉求原諒？Sherman說：「有say sorry，我接受佢道歉，亦原諒咗佢，佢講番當日情況知道自己唔啱，我亦都唔認同，我哋處理咗，大家互相溝通，呢個階段需要緩衝期休息吓，我哋會keep聯絡keep關心。」
■鍾舒漫自男友被爆偷食後，昨首度現身回應被大批記者包圍採訪。
有指她是教徒不接受婚前性行為才令男友偷食，Sherman強調：「唔關事，我身份問題而有呢啲傳聞唔make sense，愛一個人唔係要有呢啲嘢囉，而係要有經歷同包容愛。」偷食事件有否影響感情？她說：「感情冇咁容易變第二樣嘢，因為建立於根基上，唔好單憑一件事一個人一個故事去睇，外面嘅人唔係知道晒全部。」Deep有否向她承諾以後唔飲酒唔跟女仔出街？Sherman說：「呢啲好無謂，咁樣好似小朋友拍拖做嘅嘢，佢好清楚社交圈子界線。」
■吳浩康被本報踢爆一個月內連𠝹六女，次次都起雙飛艷福無邊。資料圖片
「將來嘅事唔知」
雖然Sherman已原諒男友偷食，但問到結婚就說：「我哋從來冇實質計劃，只係談論過，唔係大家所諗有一個婚期，但總有一日我會結婚。」問父母有否勸她分手？Sherman說：「父母都好擔心有問過，不過最緊要見到我開開心心，冇加插任何意見。」Deep是否還是結婚對象？她說：「將來嘅事唔知，𠵱家關係有呢個期盼，緩衝期互相關心。」
採訪：黃曉妍
攝影：陳慧安、沈健程
■周麗淇昨着露腰裝出席活動，一騷纖腰。
■陳嘉桓穿上春裝露事業線，十分搶鏡。
|
鍾意就快D Share啦！
|
|
|
