吳孟達歷生死：可能就咁玩完
【《蘋果》專訪】在鬼門關前走了一轉，任誰都會放下執着。六十三歲的吳孟達，去年因心臟急衰竭被送往深切治療部，跟死神相遇後才懂生命可貴，從此謝絕煙酒，一啖普洱一啖叉腸，吃得清淡但活得逍遙。大難過後，思想亦開通了，閒談間達哥處處維護最佳拍檔周星馳，又爆對方力邀合作。一切是非恩仇，早拋到九霄雲外。
撰文：藍文浩
周日早上的觀塘一隅人流不多，達哥一出現就被旅客發現要求合照，笑臉盈盈的他比過往清減。去年三月突然心臟衰竭，達哥戒酒又戒煙，在茶樓呷着普洱茶的他說：「根本冇諗過會發生咁嘅事，自己又唔係七老八十。思想改變晒喇，唔再執着，唔再緊張，成個人放鬆晒，因為世界唔係你想點就點。」出院後乏力氣喘，天天吃藥沒起色，到台灣卻遇到朋友教路，達哥說：「佢教我浸熱水去到肚臍位置，但係唔好過心臟，浸咗一個禮拜就唔同晒，𠵱家小跑步都得！」
■大病初癒的達哥日前到觀塘接受本報專訪，親自領記者走到後巷拍照，親民度爆燈。攝影：陳順禎
■達哥為了身體健康將數十年的煙癮戒掉。
■晚年得女的達哥自言最緊張屋企，其他一切都不強求了。資料圖片
「冇意識到咁嚴重」
達哥去年二月在內地石家莊拍電視劇時，因天氣寒冷患上感冒，當時不以為意，只服食感冒藥。一個月後回港宣傳電影《香港仔》期間，與朋友到深圳辦理私務，出現呼吸困難，朋友急送他到浸會醫院，入住深切治療部，確診是心臟急衰竭，兩度傳出死訊，出院後即立定遺囑。
大膽問達哥有否想過就此與塵世講拜拜？吃着叉燒腸的他微笑說：「根本冇意識到咁嚴重，當時個人係清醒嘅，原來醫生已經搵咗我屋企人簽紙，要我入深切治療部。當時太太唔喺香港，就搵咗細佬嚟。護士推我入去先嚇一跳，見到四個男士都好嚴重，後來要求醫生轉間私家房，真係頂唔順啲氣氛。」
達哥更自爆「屙屎冇心跳」的故事：「當時一直有部儀器，我去到邊都要孭住，有次去廁所擺低咗，點知一除低條褲，護士就衝入嚟拍門猛問我有冇事，我話去廁所咋姑娘，佢哋就話『吳生，我哋以為你暈咗，見到你係冇心跳嘅狀態呀』，其實當時真係有危險，如果身邊人冇急救知識，可能就咁就玩完。」
醫生指九個月時間就會康復，其間只可休養，閒時行公園，帶着嘆息的他無奈地說：「人唔係心想事成嘅，約今日先做訪問都有原因，因為我家姐突然癌症離開咗，所以都要更加注意身體，乜都要順其自然唔好勉強，要正常過日子。」
病中星爺撩合作
預計過完年就可重出江湖的達哥，與星爺的合作無間，「三叔」一角可說最深入民心，星爺現貴為政協和上市公司主席，產量大減之餘同時亦多是非，達哥為這最佳拍檔解釋：「大家對佢太過關注峯，佢可以話係舉足輕重，平時又咁少露面，大家對佢梗係特別關心啦。我同佢合作嘅時候，每一部戲都好愉快。」
大家最關心星爺與達哥這對組合，到底會否再次合作，達哥說：「其實星爺嘅執行導演上年聖誕節期間有搵過我，想我喺《美人魚》幫手，不過當時我嘅身體未得，如果𠵱家搵我就絕對冇問題啦。」無厘頭組合不知何年何月才再放笑彈，達哥卻道：「我最想拍嘅其實係類似《搭錯車》入面，啞嗰個爸爸嘅角色。我想用另一種方法表達同挑戰吓，未玩過呢啲咁另類嘅角色，每樣嘢都試吓吖嘛。」
■與星爺合作十多年的達哥，對這個拍檔有讚冇彈。資料圖片
【睇劇集冇耐性】
吳孟達出身電視台，對於近年電視水準下降，亞視更瀕臨結業邊緣，他都不勝欷歔：「最緊要關心啲職員，我𠵱家睇劇集都冇耐性。互相抄襲，其實都冇辦法，電視台好似一間工廠咁，要屹立不倒幾十年唔易㗎，咁惟有溝嚟溝去抄吓囉。」
至於香港演員方面，達哥就寄語：「演員要有好快適應嘅能力，演員係冇領域可以扣住（限制）嘅，表演冇對白都未必有影響，人哋都會睇得明你演乜。內地人才非常之多，佢哋嘅基本功非常之好，不過每一個人機會都係平均嘅，香港演員需要一啲時間。」
■達哥痛心電視水準下降，更直言在商言商電影界向內地靠攏無可厚非。
|
鍾意就快D Share啦！
|
|
|
