吳若希帶兩男探母：好幸福！
「女神」吳若希（Jinny）近日黑氣纏身，是非多多之餘並與「大隻仔」溫家偉及「大孖」周志文傳緋聞，三角關係錯綜複雜，前日Jinny媽又因炒單車受重傷，Jinny昨日高調孖兩位緋聞男友溫家偉及周志文湊細佬去玩，之後兩位猛男更陪Jinny往醫院探在深切治療部、處半醒狀態的Jinny媽，獲兩男傍實的Jinny直言「好幸福。」
吳若希去年憑歌曲《越難越愛》彈出，人紅即是非纏身，屢傳被富商包養，近月又與同劇演員溫家偉及周志文傳緋聞，正當這段三角關係發展之際，前日Jinny媽踩單車遇意外，其後送院接受開腦手術，令Jinny擔心不已。
Jinny昨午四時許，不避嫌帶溫家偉、周志文及細佬到醫院探母，Jinny所屬唱片公司高層何哲圖之後亦到場。眾人探病至六時左右，Jinny在何哲圖陪同下受訪，溫家偉及周志文則拖Jinny細佬離開。何哲圖全程為愛將擋駕，希望大家畀空間Jinny：「佢好大壓力。」問Jinny是否公開男友身份？何哲圖護駕說：「無謂嘢唔答，有朋友嚟幫手要珍惜。」Jinny就迴避問題。
母親處半醒狀態
昨午Jinny在社交網上載了一張溫家偉、周志文及細佬玩射籃球遊戲的相，Jinny亦承認四人行：「我收工未係探病時間，覺得細佬需要時間放鬆，唔代表我唔關心阿媽病情。Alan（溫家偉）同阿文（周志文）好好，特登陪我細佬又接我收工，覺得依家擁有嘅係恩賜，希望媽咪快啲醒。」問兩位緋聞男友是否與母親相熟？Jinny說：「同我傾到心事嘅人都同媽咪熟，《衝線》嘅人媽咪全部識，同埋葉翠翠都熟。」
談到母親情況，Jinny透露她處半醒狀態：「有同佢講嘢，不過媽咪未講到嘢，情況比尋日（前日）好。」問母親是否有反應？Jinny落淚說：「有，好開心佢有反應，氹佢、話佢都有反應。醫生話佢好似小朋友亂郁，我有叫媽咪睜開眼，雖然佢打開眼冇焦點，但我知佢想同我眼神接觸。（珍惜同媽咪相處？）會更加珍惜同屋企人相處。」
溫家偉昨晚接受訪問時說：「去醫院前係一齊去玩，Jinny心情OK，Jinny媽咪情況穩定，陪吓佢哋（Jinny及細佬），唔想佢哋諗太多嘢同想佢開心。」
每日短訊聯絡父
對於好友慰問，Jinny表示感激：「自己好大壓力，多謝朋友陪伴，我今日好幸福。」問是否不會停工？Jinny說：「多謝公司體諒同台前幕後畀空間我。（繼續開工？）係，會就探媽咪時間，因為每日得個幾鐘探望。」曾患情緒病的Jinny說：「與其一個人匿喺屋企亂諗嘢，不如去做嘢唔會有咁多負面情緒。」問到在內地的父親有否慰問母親？甚少提爸爸的Jinny說：「每日都有傳訊息。（父母已離婚？）分開咗好耐，家事唔想講太多。」問母親男友會否探病？Jinny說：「會，因為探病只可以兩個人，等我走咗佢先嚟，無謂受我影響。」受訪後Jinny駕車直駛九龍灣與林盛斌及魔術師甄澤權繼續開工。
另外，Jinny在醫院受訪期間，自稱是Jinny媽男友的黃先生與一名年約20歲的男子到達深切治療部，兩人在晚上七時半離開，問到Jinny媽病情，黃先生說：「有咩我都講晒。」問同行男子是否其子及他是否Jinny媽男友？黃先生一言不發離開。
採訪：音樂組
|
鍾意就快D Share啦！
|
|
|
