屢被傳死訊 教年幼子女明白生死 梁繼璋：以心守護你
【《蘋果》專訪】
「下輩子，無論愛與不愛，都不會再見。」這是58歲的電台主持梁繼璋，數年前寫給孩子的備忘錄，今日卻因屢傳死訊被誤當是遺書！大前日梁繼璋精神奕奕現身接受《蘋果》專訪，身形瘦削兩鬢灰灰的他為備忘錄新加第10項：「倘若有一天，我們真的分開了，我的一顆心，也會靜靜地守在你身旁，直到永遠永遠。」梁繼璋嗚咽問兒子：「明唔明白？」
親人只有一次的緣份，電台主持梁繼璋比老婆莊嬿藍大21年，兒子雲翀現年只有12歲，女兒繕喬才9歲，由於年紀相距太遠的關係，人生福禍無常，58歲的梁繼璋不知自己可以活多久，6年前就寫下一篇「給孩子的備忘錄」，內容真摯感人被網友瘋傳，之後網上間歇傳出梁繼璋死訊，日前又傳他撞車被燈柱插胰臟而死，這封備忘錄就被誤傳是遺書。
■梁繼璋和老婆莊嬿藍的忘年戀哄動一時，現兩人育有一子一女幸福滿瀉。
回顧一生當備忘
大前日梁繼璋一家四口到沙田接受本報專訪，活在當下的他雖然外表清癯但精神很好，問當年寫備忘錄是否抱着遺書的心情？他聲線鏗鏘說：「如果講到遺書好似好嚴重，有時當一個人唔開心情緒醞釀，回顧一生好多嘢發生過，將以前做錯或應該咁做嘅寫低，留畀囝囝作為備忘錄，當人生有乜問題解決唔到就攞嚟睇。」
■女兒為媽媽紮辮，兒子則在旁讀爸爸的備忘錄，場面溫馨。
■梁繼璋曾與一對子女一同玩泡泡浴。資料圖片
■梁繼璋（左）擔任DJ多年，即使離開港台仍以主持維生。資料圖片
當年梁繼璋和老婆的忘年戀哄動一時，他比兒子又大46年，坦言擔心子女的將來，才寫下這封備忘錄：「因為我同太太結婚到𠵱家，心結未離開過我，當然唔會成日掛口邊『我會好快走！』不過有推動力要我寫啲嘢，留番畀佢哋。」梁繼璋問兒子對備忘錄哪點印象最深？雲翀說：「親人只有一次緣份，呢個係真囉，由古代到𠵱家冇變過。」問驚唔驚有日爸爸會走？雲翀坦言：「都有少少驚！」
梁繼璋在兒子很小的時候，已解釋甚麼是生與死，他說：「我話第時爸爸會去好遠地方，佢問去邊個星球？我話唔係講嗰啲超人、星球、太陽，總之喺地球上消失咗，最記得當時佢有少少想喊，跟住佢問我：『唔得㗎，你唔可以走㗎，咁屋企垃圾邊個倒呀？』其實𠵱家佢都未必明白生與死，總之將來會明白。」
獲啟發加新結語
自備忘錄在網上瘋傳後，梁繼璋不時被誤傳死訊，日前更傳他撞車走了，他笑說：「我冇死到，請大家放心，但𠵱然不停有人傳，甚至有阿伯見到我好似見鬼話『梁繼璋，你唔係死咗咩？』今次呢件事有少少啟發，想加一條作為結語『倘若有一天，我們真的分開了，我的一顆心仍然會守在你身邊，直至永遠永遠。』」他嗚咽問兒子：「明唔明白？」雲翀乖巧點頭。
【大前日】■兩人結婚多年恩愛如昔，梁太笑得燦爛說：「我唔後悔！」
【99年】
問梁太是否很擔心有日老公離開？梁繼璋搶着說：「佢身體好差，我擔心多啲！」梁太坦言：「當年屋企人反對我嫁畀呢個男人，猛話『佢大你咁多喎，好可能早走過你』，其實世事好難講，可能明日走先嗰個係我，咁多意外冇人知，呢條路我揀嘅，呢個人我揀嘅，所以好簡單，四個字─我唔後悔！」梁繼璋眼紅紅拭淚笑說：「係暫時唔後悔。」
年近六十的他說：「為咗屋企人，我會注意身體健康，𠵱家身體OK啦。」萬一有日不在了，是否有為家人早作安排？他說：「絕對有，買教育基金，努力賺錢，希望微薄入息可以維持耐啲，可以做到嘅都做，不過有啲嘢控制唔到冇法，一個人命有幾長冇人知。」
採訪：皓騫
攝影：陳志嵐
場地：Jenny's Music Studio
|
鍾意就快D Share啦！
|
|
|
