杜琪峯：呢個劇真係撼動人心。唔好話我踩佢哋（大台）呀！依家啲電視劇唔好睇㗎！你睇吓 80年代香港嘅電視劇瘋魔全球，今時今日算乜嘢吖！咁落去，實死㗎喎。
媽咪姐
謝謝給我們這個《大時代》
你話吖，我哋香港人究竟捱咗幾耐開電視都「無嘢睇」嘅日子？一套《大時代》，仲要係深夜第 N次重播，第一集都可以有成 41萬人唔怕捱眼瞓，哺住喺電視機前面睇，我哋究竟有幾 dry？ Dry過丁蟹！
師徒有嘢講
周三（ 22日）晚，杜 sir舉行生日 party，被問到《大時代》搞電影版，佢話自己可以幫手做監製，但忍唔住話依家啲劇好唔掂。而《大時代》編劇韋家輝都有去賀恩師，但就低調唔露面，只肯由助手代答問題。
跟住睇吓 fb、報紙同雜誌日日用《大時代》洗版，媽咪姐啲靚太 friend直情驚到放晒啲股票，怕真係會做「蟹」（係呀！真係跌，但後尾又升番。學「股票必勝法」講，「及早離場」）。呢套劇對我哋香港人嚟講，早已經唔止係一套電視劇，叫「集體回憶」都太簡單。明明係 92年播，但嗰種有今生無來世嘅演員陣容，奸人當道但天理循環嘅核心思想（我諗起 689，阿們！），即使擺喺 23年後嘅今日，仍然係我哋最 buy嗰一套！難怪《大時代》編劇韋家輝對於自己套神劇又俾人狂推，都只係講咗兩句：「好開心咁多年前嘅作品仲有人睇，但要講嘅廿年前已經講晒！」
好多香港人一路睇《大時代》一路鬧，話依家啲電視劇勁唔掂，但又零選擇，灰到爆！媽咪姐積極啲，覺得呢個係一個提醒，話俾我哋香港人知，其實我哋係得嘅，千祈唔好放棄呀！人善人欺天不欺，唔止丁蟹講，仲係真理。
網民唔 buy電影版
周三（ 22日）有消息話大台見《大時代》重播 N次都咁收得，諗住開拍電影版。嘩，網民一面倒 dislike，叫大台唔好破壞神劇呀！
尋人檔案
睇《大時代》其中一樣趣味，就係可以睇劇尋人！劇入面唔少主要角色依家已經冇喺電視度出現。 23年喇，有少少掛住佢哋㖭！
邵仲衡 脹爆賣車
51歲嘅邵仲衡，同丁孝蟹一樣火爆，喺大台拍劇辛苦，最後劈炮轉去做汽車同賽車生意。最爆係佢之前曾經暗示同邱淑貞拍過拖，又話俾劉青雲撬走郭藹明。近年老婆仔女移咗民，邵仲衡得閒就拍吓港台劇，上年仲唔收錢拍電影《點對點》做男配角。肥咗又收咗啲火嘅佢，似乎仲好想做星喎！
吳啟明 股海浮沉
其實 51歲、演丁蟹三仔嘅啟明，最鍾意炒股，曾經係細佬吳啟華嘅炒股軍師。 96年退出娛樂圈，又幫過楊受成嘅英皇證券做嘢，當時年入 2千幾萬㗎！但後尾金融風暴炒燶股欠債千幾萬囉。近年佢都幫過大少林建名搞投資，亦有人話佢做埋保險經紀。不過，吳啟明同細佬吳啟華依家好似冇乜偈傾，吳啟華仲話無大佬電話㖭。
吳詠虹 知足潮媽
當年吳詠虹演大妹方芳，唔算搶眼。唔講唔知， 49歲嘅佢同邵仲衡、郭富城等，當年被大台捧為「銀河十星」㗎！不過，吳詠虹後來見事業冇乜大發展，就同前藝人何英偉結婚，後尾仲退出娛樂圈做新娘化妝師，依家吳詠虹個女都十幾歲，但佢仲 keep得好 young呢！
楊羚 幸福 C9
今年 47歲嘅楊羚，演三妹方敏，俾陶大宇強姦，好鬼慘！好在現實中，佢嫁咗圈外人，生咗一仔一女，不知幾 happy。得閒先喺亞視同有線客串做主持，拍港台劇，之前仲同古仔拍《竊聽風雲》㖭！出身單親家庭嘅佢，最重視家庭，仲信埋教，係圈中幸福 C9典範呀。
|
鍾意就快D Share啦！
|
|
|
