掃呢頁CODE去手機

2015年4月16日 星期四

兩個秋官 夾擊股市 [壹週刊 - 1310] 秋官,鄭少秋,M1,



《大時代》嘅丁蟹狂態畢現,「丁蟹效應」亦曾令股民寢食難安。

八卦陣

兩個秋官 夾擊股市

股市重演「大時代」,全民皆股追逐狂牛。不過,兩間免費電視台近日分別重播以股市為題材嘅經典劇集,「股市殺手」秋官再度出場,仲要係打孖上。掃興乎?還是睇淡後市?

秋官喺《世紀之戰》威力不減,首播令港股連跌八日,丁野嘅殺傷力不比丁蟹遜色。

無綫下週一至週五,每日深夜十二時十五分,重播令一眾股民聞風喪膽嘅經典神劇《大時代》,官方原因正正係近日股市暢旺。該劇九二年十月首播,一個月內股市即大挫兩成,跌幅多達 1,283點;之後三度喺 TVB旗下頻道重播,股市都出現波動及下跌。秋官及後每逢有劇集播出,股市都會出現類似情況,衍生所謂「丁蟹效應」,一直是股民夢魘。

啱啱被釘牌嘅亞視,其實本月初已經喺本港台第三度重播《大時代》續集《世紀之戰》。鄭少秋由丁蟹變做丁野,但「秋官效應」仍然不容忽視,因為劇集首播後,八個交易日內股市急瀉 2,469點,大跌近一成半。亞視今次每逢星期六重播,仲一次過播足三個鐘,來勢洶洶。

秋官出場確實令人個心怯一怯,唔通兩個電視台高層用心良苦,趁機提醒小股民冷靜謹慎為上?

王維基泵水 《導火》冇爛尾

插圖:王健威

期被網民封為神劇嘅香港電視出品《導火新聞線》,上週五播放大結局,唔少記者都有煲劇同討論,貪有共鳴感。傳聞呢套劇拍攝期間,適逢港視攞唔到牌差啲爛尾?又有人話王維基好緊張製作工作,套劇由二十五集濃縮到二十四集。編審潘漫紅幫我哋逐一解謎。

潘漫紅話套劇一三年八月拍完,十月食埋煞科飯,開始做後期製作,點知十月十五日政府宣布唔發牌俾港視。佢話當時都有傳聞話音樂、特效同剪接只求其處理,好彩老闆王維基並冇咁做,仲俾佢哋做好所有製作,以現時最完美效果呈現觀眾面前。

至於套劇伶伶仃仃廿四集,係咪被刪走一集?佢話原本都係廿五集,但剪接時要遷就每集結尾留番啲伏線,所以第一集同第十四集加長咗,最後全長變咗廿四集。雖然無緣喺電視平台播放,潘漫紅話能夠喺香港播已經好開心,因為佢最擔心套劇不見天日。

為咗增加節目播放渠道,港視本週一向亞視「求婚」,願意提供一千小時節目俾亞視播放,每日四個鐘,播到本年底。每月俾番至少五百萬「家用」,廣告時段就由港視去搵客,同亞視五五分賬。港視話呢個聘禮下週一下晝五點截止,睇亞視肯唔肯嫁喇。

文世昌病榻中撐雨傘

民主黨的前身、港同盟首批立法局地方直選議員之一文世昌,本月四日喺多倫多因直腸癌病逝,享年七十歲。呢位香港第一代民主鬥士嘅喪禮定於十八日舉行,民主黨將派員到加拿大致祭。

文世昌可謂「民主老將」,九一年香港首次舉行立法機關地方直選,佢夥拍李柱銘參選,在雙議席雙票制下聯袂奪得港島區議席。連同區議會和市政局議席,文世昌係香港首批三料議員。擔任一屆立法局議員後,文世昌移居加國,但仍關心香港政事。去年九月香港爆發雨傘革命,抱病在身嘅文世昌強烈譴責警方暴力鎮壓民主運動。

回首前塵,十三名勝出首屆立法局直選嘅港同盟成員,現時只剩涂謹申和陳偉業仍留喺議會;吳明欽、司徒華和文世昌俱已作古。

文世昌(左二)係李柱銘(右一)第一個立法局選舉拍檔,九一年雙雙奪下港島東議席。

一九八六年,文世昌(第二排中)出席「高山大會」,同香港最早期嘅民主派核心成員向港英政府爭取民主。

IT人追擊種票局

刊早前揭發「世貿聯合基金總會」主辦活動,附送自動加入「香港資訊科技聯會( ITJC)」會員資格,變身做埋資訊科技界選民,明顯種票。 IT人睇到呢段報導好火滾,摷番立法會文件,話政府一一年俾 ITJC成為 IT界功能組別團體時,話成員主要係 IT團體現任或曾任會長、副會長,只會增加約一百個合資格選民,但 ITJC近年放寬會員資格,合資格 IT人就可以入會,令會員人數急升至一千八百人,即係變相谷大選民人數,隨時左右立法會 IT界別選舉結果。

由 IT界組成嘅前線科技人員議政小組,發表公開信追擊政制事務局長譚志源,要求佢解釋。據聞,有 IT人更有創意,諗住加入 ITJC進行內部反攻,睇清楚 ITJC點樣做。

本刊早前報導 IT界種票飯局, IT人睇完好憤怒,發公開信要求政府重新審視 ITJC嘅資格。

鍾意就快D Share啦!