范振鋒胸痛鴛鴦面負傷復工
自稱「黑仔」的藝人范振鋒（Ricky）因與呂姓男鄰居發生爭執及肢體碰撞，面部受創之餘更惹上官非，昨晚「復工」的Ricky，面部傷痕在脫去口罩後首度曝光，可見其右眼充血又瘀又青，臉頰紅腫，他又表示胸口痛楚，有感現居地「唔安全」，加速Ricky搬屋的決定。
現年41歲的藝人兼新城電台DJ范振鋒，大前晚於青龍頭豪景花園寓所樓下，跟同住一大廈的呂姓男鄰居發生口角繼而動武，兩人同告受傷，並以涉嫌在公眾地方打架罪被警方拘捕。Ricky自稱因被打傷面及身心受創，就連前晚原本答應前往吳國敬的紅館騷捧場，亦要臨時缺席留家休養。經過一整天休息後，昨晚他重返工作崗位出席於灣仔舉行的活動。
右面腫兼大細眼
Ricky日前出入警署時一直戴上口罩，其「廬山真面目」昨晚終於曝光，臉容帶點憔悴的他昨晚以黑框鏡遮住右眼傷痕，雖然化了淡妝，但明顯見到右眼瘀青，眼白位置一片血紅，狀甚恐怖，右邊臉頰還有點腫脹，變了鴛鴦面大細眼，他說：「今日右邊身好痛，最初仲以為係輕傷，但愈來愈痛。」見他不停摸住右邊心口，由於擔心傷勢，Ricky會再看醫生檢查清楚，他說：「好多人教我用古法碌雞蛋去瘀，又教我煲啲湯水療傷。」
雖然負傷開工，但未有影響其專業水準，於台上表現自如，現場並獲不少工作人員慰問，他坦言老婆李思欣對他傷勢感到心痛，他說：「可能因為飲咗酒關係，當晚警惕性唔高，喺車度走唔到。」Ricky於現居地只是租住性質，問他可會計劃搬屋？Ricky說：「一直都有諗過搬，依家係加快咗搬屋念頭，因為始終唔方便，而且覺得唔安全。」
感恩獲好友關心
復工前Ricky接受本報電話訪問時，亦有透露傷勢，他說：「對眼爆咗微絲血管，鼻同嘴都有啲瘀，化妝可以遮到啲，唔使戴口罩遮面！」他自言已幾十歲人，並非靠樣搵食，故不怕「傷樣」示人。Ricky坦言面傷不及心傷，自言當災惹官司令他心情差，很疲倦，可是之前已接了不少工作，又要準備開拍電影，不可再停工休息。經歷今次事件，最令他感恩是得到不少人關心：「好多圈中朋友打（電話）嚟之外，圈外朋友、鄰居、警界同法律界朋友都打嚟問候同提供專業意見。」
談及可擔心再和發生肢體碰撞的鄰居相遇？Ricky無懼謂：「冇得避，我係受害者，如果佢要搵我，一定搵到，搬都冇用，香港咁細，但香港係法治之區，單案件警方又調查中。」
文：音樂組
|
鍾意就快D Share啦！
|
|
|